Kuhitila Muli Yoano
13 Kaha omo cilika ca Paskua tele kanda ci hete, Yesu ua tantekeyele nguendi inapuho ola yendi ya kuseza ano mavu, na kuya kuli Ise. Mu kulinga ua lemene vantu vendi vaze vakele ha mavu, uava lemene naku ntsongo. 2 Mu vakele na kulia ku cinguezi, Ndiavu tele na haka laza mu mutima ua Yundasa Iskaliota muana Simone, cisinganieka ca kuenda Yesu vungungu. 3 Mu kulinga Yesu ua tantekeyele nguendi Ise na kundika viuma viose mu mavoko endi kaha ua tundile kuli Njambi, naua uakele na kuya kuli Njambi, 4 ua katukile ku mesa na kusulula cikovelo cendi ca helu. Kaha uambatele tualia* naku likutayo mu mbunda. 5 Mu nima yaco, ua hakele mema ha mbasiya, kaha ua putukile kutanesa viliato via vandongesi vendi naku vi hunda na tualia ya zitikile mu mbunda. 6 Mua hetele kuli Simone Petulu, Petulu ua handekele nguendi: “Muangana, utonda kutanesa viliato viange?” 7 Yesu uamu kumbuluile nguendi: “Vi njili na kulinga mu ntsimbu ino, ka vi kulumbunuka, vunoni uka vivuisisa mu nima yaco.” 8 Petulu uamu lekele nguendi: “Na limo litangua liahi utanesa viliato viange.” Yesu uamu kumbuluile nguendi: “Kuvanga nji ku tanese, kati ngoco ka ulikata nange.” 9 Simone Petulu uamu lekele nguendi: “Muangana, nga ngoco ni, kati unji tanese lika ku viliato, vunoni nji tanese naku mavoko naku mutue.” 10 Yesu uamu lekele nguendi: “Uose na tana laza, atondeka lika kutana ku viliato, muomu muvila uendi uose una lele laza. Kaha enu muna lele, vunoni kati mu vose.” 11 Muomu ua tantekeyele iya ueku muendele vungungu. Ngeci ua handekele nguendi: “Kati mu vose muna lele.”
12 Mua manusuile ku va tanesa ku viliato, ua zalele cikovelo cendi ca helu, kaha ua tumamene naua ku mesa naku vehula nguendi: “Evi vi njina lingi kuli yenu, vina mi lumbunuka ni? 13 Muli naku nji sana nguenu ‘Mulongisi na Muangana,’ kaha muli na vusunga, muomu mukemuo vene mu njapua. 14 Ngeci mukemuo, nga yange nji Muangana na Mulongisi, njina tanesa viliato vienu, nenu naua mua pande ku litanesa viliato via umo na mukuavo. 15 Muomu njina mi hana cimueso, linga nenu naua mu linge ngue mu njina lingi. 16 Mua vusunga nji mileka nguange, ngamba ka hiana sukuluendi, kaha uze iva na tumu ka hiana uze namu tumu. 17 Nga muna tantekeya viuma evi, mu vezika nga muvi linga. 18 Kanjesi na kuhandeka vienu vose, nji tantekeya vaze va njina hangula. Vunoni linga vi lipuisemo visoneka via muesa nguavio: ‘Uze ua lile mbolo yange nanji tengulukila.’* 19 Tunde hano, nji mi lekela vualumo ntsimbu kanda vi soloke, linga mu vi ka soloka muka tave nguenu yange vene ikeye. 20 Mua vusunga nji mileka nguange, uose atambula uze inji tuma, nange nanji tambula. Kaha uose anji tambula, na tambula na Uze uanji tumine.”
21 Mu nima ya kuhandeka evi viuma, Yesu uavuile vusiua vua kama, kaha ua hanene vukaleho nguendi: “Nji mileka vusunga nguange, umo uenu anjenda vungungu.” 22 Vandongesi vendi vaputukile kulitala umo na mukuavo, muomu ka va tanteyele iya mpundu uakele na kuhandeka Yesu. 23 Umo ndongesi ya lemene cikuma Yesu, ua tumamene ku mukulo* uendi. 24 Ngeci Simone Petulu uamu sovueyele na mutue naku muleka nguendi: “Tu leke vieya ali na kuhandeka.” 25 Kaha uze ndongesi ua suenene kuli Yesu naku muihula nguendi: “Muangana, iya honi ouo?” 26 Yesu ua kumbuluile nguendi: “Ou inji hana civalavala ca mbolo inji tanta.” Ngeci mu nima ya kutanta mbolo yaco, ua ihele kuli Yundasa muana Simone Iskaliota. 27 Kaha omo Yundasa ua tambuile cize civalavala ca mbolo, Satana ua kovelele muli ikeye. Ngeci Yesu ua lekele Yundasa nguendi: “Evi viuli na kulinga, vi linge vuasi.” 28 Vunoni vaze va tumamene ku mesa, ka vevuisisile omo lia vika uamu lekelele ngoco. 29 Mu kulinga Yundasa ikeye uakele na kuniunga cikasa ca vimbongo, vamo va singaniekele nguavo Yesu uamu lekele nguendi, “Ya uka lande viuma vi tu tondeka ha cilika,” ni nguavo, ahaneko vimo viuma ku vihutu. 30 Ngeci Yundasa mua tambuile civalavala ca mbolo, haze vene ua tuhukile. Vuapuile vutsiki.
31 Ngeci mu nima ya kutuhuka cendi, Yesu ua handekele nguendi: “Hano honi Muana muntu va namu hana vumpahu, na Njambi atambula vumpahu kuhitila muli ikeye. 32 Vavenya Njambi amu hana vumpahu,* kaha amu hana vumpahu hano vene. 33 Vana vange va njalema,* njili nenu mu ntsimbu ya indende lika. Muka nji tonda. Kaha ngue mu nja lekele vaYundeya nenu naua nji mileka nguange, ‘Ku njiya ka mu hasa kuyako.’ 34 Njili naku mi hana lisiko lia liha, nguange mu lileme umo na mukuavo. Ngue mu njina mi leme yange, nenu naua lilemenu umo na mukuavo. 35 Vantu vose vaka tantekeya nguavo mu vandongesi vange, nga mu lilema umo na mukuavo.”
36 Simone Petulu ua muihuile nguendi: “Muangana, uya kuiko?” Yesu uamu kumbuluile nguendi: “Oko ku njiya, ka uhasa kunji kava mu ntsimbu ino, vunoni uka nji kava ku lutue.” 37 Petulu ua muihuile nguendi: “Muangana, vika kanji hasela ku kukava mu ntsimbu ino? Nji hana muono uange omo liove.” 38 Yesu uamu kumbuluile nguendi: “Nguove uhana muono uove omo liange? Nji kuleka vusunga nguange, ntsimbu ndemba kanda atambeke, unji viana lutatu.”