Kuli Vakua Loma

8 Vaze va likata na Kilistu Yesu, kavesi na hamo hahi ha ku va hisila. 2 Muomu lisiko lia sipilitu lize lie kuhana muono mu kulikata na Kilistu Yesu, lia mi patula ku vupi na kutsa. 3 Vize vi ahonouele kupuisamo Masiko omo lia vuzeye vua ntsitu, Njambi ua vilingile mu kutuma Muanendi mu cifua ca vantu* vakua vupi, linga atundiseko vupi. Mu kulingamo, ua hisile vupi vuli mu ntsitu. 4 Linga viuma via vuoloke vi vapinga mu Masiko, vi lipuisemo hali yetu tuli na kuenda kuliya na sipilitu kati kuliya na ntsitu. 5 Muomu vaze ve kuyoya kuliya na ntsitu, ve ku singanieka lika ha viuma via ntsitu. Vunoni vaze ve kuyoya kuliya na sipilitu, ve ku singanieka lika ha viuma via sipilitu. 6 Muomu ku singanieka lika ha viuma via ntsitu cikoka kutsa. Vunoni ku singanieka lika ha viuma via sipilitu cineha muono na ciyulo. 7 Muomu ku singanieka lika ha viuma via ntsitu, ce kukoka vutozi na Njambi. Muomu ntsitu kaye ku liononuesa ku Masiko a Njambi, kaha mua vusunga ka ihasa ku liononuesa vene. 8 Ngeci mukemuo, vaze ve kuyoya kuliya na ntsitu ka vahasa kuya Njambi ku mutima.

9 Nga sipilitu ya Njambi ya kala mpundu muli yenu, kaha kamuesi na kuyoya kuliya na ntsitu, vunoni na sipilitu. Vunoni nga kuli umo kesi na sipilitu ya Kilistu, ouo ka kundamene kuli ikeye. 10 Vunoni nga Kilistu ua likata nenu, kaha muvila una tsi omo lia vupi. Vunoni sipilitu ikeyo muono omo lia vuviuke. 11 Ngeci mukemuo, nga sipilitu ya uze ua sanguile Yesu ku vatsi ili muli yenu, kaha uze vene ua sanguile Kilistu Yesu ku vatsi, aka hana naua muono ku mivila yenu ize ye kutsa, kuhitila mu sipilitu yendi ize ya kala muli yenu.

12 Ngeci mukemuo vamuanetu, tuli na kamo kapandi, vunoni kati ka kuononoka ntsitu, ni nguetu ka kuyoya kuliya na ntsitu, houe. 13 Muomu nga mu yoya kuliya na ntsitu, cili vene mu katsa. Vunoni nga mu tsiha vilinga vienu via muvila mu kupangesa sipilitu, kaha mu ka yoya. 14 Muomu vose vaze va ituamenena sipilitu ya Njambi, cili vene vapua vana va Njambi. 15 Muomu enu ka mua tambuile sipilitu ya vundungo, ize imi lingisa kuivua naua liova, vunoni mua tambuile sipilitu ya kumi puisa vana. Sipilitu yaco ikeyo ye ku tu lingisa kutambeka nguetu, “Aba,* Tata!” 16 Sipilitu yaco vene, ye kuhana vukaleho hamolika na sipilitu yetu nguayo tu vana va Njambi. 17 Kaha nga tu vana, omo tunapu naua vasuana, vasuana va Njambi vene, vunoni tu vasuana hamo na Kilistu, ca kama lika nga tu yandela hamo nendi, linga tu ka tambule hamo nendi vumpahu.

18 Ngeci mukemuo, ange nje kumona nguange tuyando tu tuli na kumona mu ntsimbu ino, ka tu lieseka cipue kamandende na vumpahu vu vaka solola muli yetu. 19 Muomu via kutanga viose vili na kulavelela mua kama kusoloka ca vana va Njambi. 20 Muomu via kutanga via liononuesa ku vungoco, kati ku cizango cavio vivene, vunoni ku cizango ca uze ua viononuesele kaha ua vihanene naua na lulavelelo 21 nguendi, via kutanga vaka vi patula naua ku vundungo vua kupola na kukovela mu kupatuka ca vumpahu vua vana va Njambi. 22 Muomu tua tantekeya nguetu, viuma viose via kutanga vili naku tualelaho kuvindzuoka na kuyandela hamolika na lelo lino. 23 Kaha kati ovio lika, vunoni netu vene naua tuli na vusuka vua kulivanga, vukevuo sipilitu vene, eyo, netu vene tuli na kuvindzuoka mu mitima yetu, ntsimbu tua lavelela na mutima uose ku tu puisa vana. Ha ntsimbu yaco, vaka tu patula ku mivila yetu kuhitila mu ndando ya kupatula. 24 Muomu va tuovuele mu lulavelelo olu. Vunoni cuma ci vali naku lavelela nga ca moneka, ku va cilavelela naua, muomu iya ueku lavelela cuma ca na mono laza? 25 Vunoni nga tua lavelela vize vintsa katua muene, tu tualelaho ku vi vandamena na kukolesa cose.

26 Mukemuo naua, sipilitu nayo ye ku tu kuasa ku vuzeye vuetu. Citanga lika ka tu tantekeya kuvundila ngue mu tua pande, vunoni sipilitu ye kutu lambelelako ku mivindzo yetu ize ka tua hasele kutumbula. 27 Vunoni uze ue kuhilula mitima atantekeya vutumbe vua sipilitu, muomu ye ku lambelelako vakua kulela mu ku litombola na cizango ca Njambi.

28 Tua tantekeya nguetu, Njambi ue kulingisa vipanga viendi viose vipangele hamo, linga vikuase vaze valema Njambi, vaze vene vava sana kuliya na vutumbe vuendi. 29 Muomu vaze va alivangele kutava, vakevo naua va ahanguile vualumo, linga vaka lifue na Muanendi, linga ikeye akapue ndala hakati ka vamuanaye vavengi. 30 Cikuavo naua, vaze va ahanguile vualumo vakevo va asanene naua, kaha vaze va asanene, vakevo va apuisile vakua vuviuke naua. Muku manusula, vaze va apuisile vakua vuviuke, vakevo va ahanene vumpahu naua.

31 Vika honi tu handeka ha viuma evi? Nga Njambi ali netu, iya atu luisa? 32 Mu kulinga ka tetelele cipue vene Muanendi, vunoni ua muhele kuli yetu vose, vuno mu kuvueza ku Muanendi ka ka tuhana vene viuma vikuavo viose ni? 33 Iya atuika mulonga ava va ana hangula Njambi? Vavenya Njambi uava tumbula kupua vakua vuviuke. 34 Iya ava hisa? Muomu Kilistu Yesu ikeye uze uatsile, ikeye naua uze iva sanguile ku vatsi, uze ali ku livoko lia cilio lia Njambi kaha ueku tu hakuila.

35 Iya ahasa kutu hangununa ku cilemo ca Kilistu? Lamba ni? Visoti ni? Ku tu luisa ni? Ndzala ni? Muzi* ni? Vusonde ni mukuale? 36 Ngue mu vasoneka nguavo: “Omo liove, vali naku tu tsiha ntsimbu yose. Va natu puisa ngue vampanga va va tuala ku vutsihilo.” 37 Vunoni mu viuma viose evi, etu tuna vulu cikuma-kuma kuhitila muli uze ua tu lemene. 38 Muomu njili na vusunga nguange, cipue kutsa, cipue muono, cipue tungelo, cipue vanguvulu, cipue viuma viliko lelo lino, cipue viuma vize vikeza, cipue vindzili, 39 cipue vulahe, cipue kulova, cipue cuma ceka cose-oco, ka cihasa ku tu hangununa ku cilemo ca Njambi cize cili muli Kilistu Yesu Muangana uetu.