Kuli Vakua Loma
15 Vunoni etu tu na kanyama mu lutsilielo, tua pande kukuasa vaze ka va kanyamene kaha kati tu tuameke lika ndzolela yetu vavenya. 2 Muntu ku muntu hakati ketu, avuise mukuavo ndzolela mu kumu lingila via cili, linga amu kanyamese. 3 Muomu cipue vene Kilistu ka lingile viuma vize via muvuisile ndzolela ikeye lika, vunoni ngue mu vasoneka nguavo: “Kasahuntu ka vaze vali naku kusahula, ka na uila hali yange.” 4 Muomu viuma viose viva sonekele ku laza, va vi sonekelele ku tu longesa, linga omo lia kukolesa naku lembezieka ci tue kuuana mu Visoneka, tukale na lulavelelo. 5 Ngeci mukemuo, Njambi uze ue kukuasa kukolesa naku lembezieka, ami hane visinganieka vimolika, ngue vize viakele navio Kilistu Yesu, 6 linga mu likate kumo kaha na lizi limolika,* mu zumbangeye Njambi Ise ya Muangana uetu Yesu Kilistu.
7 Ngeci mukemuo, litambulenu umo na mukuavo ngue mua mi tambuile Kilistu, linga muhane Njambi vumpahu. 8 Muomu nji mileka vusunga nguange, Kilistu uaku puile ngamba ya vakua kulovoka, linga amuese vusunga vua Njambi na kumuesa cili-cili nguendi, vikulaheso via lingile Njambi ku vakukuluila vavo viapuile via vusunga. 9 Cikuavo naua, linga vakua vifuti vahane Njambi vumpahu omo lia nkeke yendi. Ngue mu vasoneka nguavo: “Vikevio vi njika ku zumbangeyela hakati ka vakua vifuti, kaha nji kemba miaso ya ku sangaziala lizina liove.” 10 Kaha na handeka naua nguendi: “Viukililenu, enu vakua vifuti, hamolika na vantu vendi.” 11 Lukuavo naua nguendi: “Sangazialenu Yehova,* enu vakua vifuti viose, kaha na vantu vose vamu sangaziale.” 12 Isaya ua handekele naua nguendi: “Ku kakala muzi* ua Njese uze aka katuka na kusika vifuti viose, kaha vifuti viose vika lavelela muli ikeye.” 13 Nja vundila nguange Njambi uze ue kuhana lulavelelo, ami sulise na ndzolela yose, na ciyulo, muomu mua mu kulahela, linga mu sumpuoke na lulavelelo kuhitila mu ndzili ya sipilitu santu.
14 Vamuanetu, ange njili na vusunga vua kusula kutuala hali yenu nguange, mua sula na vucili, mua sula na mangana, kaha muhasa naua ku limamuna umo na mukuavo. 15 Vutuhu ngoco, nja mi sonekela vino viuma ha toma mpundu, linga nji mi vuluisevio naua. Njina lingimo, omo lia ngozi ya kama ya nanji muesa Njambi, 16 linga njipue ngamba ya Kilistu Yesu ku vakua vifuti. Njili na kulinga cipanga ca kulela ca muzimbu ua cili ua Njambi, linga ava vakua vifuti vapue vuana vua tava Njambi, vua kulelesa na sipilitu santu.
17 Ngeci mukemuo, njili na vusunga vua kulipamba muli Kilistu Yesu na vipanga vianji hana Njambi. 18 Muomu ka njika handeka na vimo viahi, kuvanga lika via na lingi Kilistu kuhitila muli yange, linga vakua vifuti vononoke Kilistu kuhitila mu mezi namu vilinga viange, 19 namu ndzili ya vitantekeyeso na vikomoueso, namu ngolo ya sipilitu ya Njambi, tunde vene ku Yelusalema na kulizenga membo ose kuheta naku Yililiku, nji nambulula mu vutuntu muzimbu ua cili kutuala hali Kilistu. 20 Omo liaco, nja lingile cose linga kati njambulule muzimbu ua cili kuze ku va tantekeya laza lizina lia Kilistu, linga kati nji tunge ha luvula lua mbala. 21 Vunoni ngue mu vasoneka vene nguavo: “Vaze ka va tambuile muzimbu kutuala hali ikeye, vaka mona. Na vaze ka vevuile viendi, va kevuisisa.”
22 Vikevio vianji honouesele vintsimbu viavingi kuiza kuli yenu. 23 Vunoni mu ntsimbu ino, kakuesi cihela na cimo cahi ka njambuluilile mu mitambela eyi, kaha mu miaka yayingi,* njili na cizango ca kama* ca kua kumi meneka. 24 Ngeci mukemuo, mu njiya ku Spanya, nja lavelela kua kumi mona. Kaha mu nima ya kusikama nenu kantsimbu ka kandende, muka nji sindikiyako kavundende. 25 Vunoni mu ntsimbu ino, nji tonda kuya ku Yelusalema linga njika pangele vakua kulela. 26 Muomu vamuanetu vali mu Masendonia namu Akaya, vali na ndzolela ya kuhana viuma viavo mu kupua vuana, ku vihutu vali hakati ka vakua kulela vamu Yelusalema. 27 Cili vene, vanevu ndzolela ya kulingamo, muomu vakele na makongo avo. Muomu nga vakua kulela vamu Yelusalema va haneneko vakua vifuti viuma viavo via mu lutsilielo, kaha vakua vifuti navo, va na pande kuhanako vakua kulela viuma viavo via ku muvila. 28 Kaha munji manusula evi na kuhetesa vuino vuana* vuavo, nja kuhita kuli yenu mu njiya ku Spanya. 29 Cikuavo naua, nja tantekeya nguange mu njiza kuli yenu, njiza na vivezikiso via kusula via Kilistu.
30 Vamuanetu, njili naku mi lambelela kuhitila mu lizina lia Muangana uetu Yesu Kilistu, namu cilemo ce kuiza kuhitila mu sipilitu santu nguange, kolesenu hamolika nange, mu kunji kundika mu vivundilo vienu kuli Njambi, 31 linga njovoke ku mavoko a vakua kuhona kutsiliela vamu Yundeya. Cikuavo naua, linga vakua kulela vamu Yelusalema vaka tambule na ndzolela vukuasi vuange. 32 Ngeci mukemuo, nga Njambi atava, nja kumi meneka na ndzolela yose, linga tua ku likanyamesele hamolika. 33 Nja vundila nguange Njambi uze ue kuhana ciyulo, akale nenu vose. Ame.