Mukanda ua Tiango
2 Vamuanetu, vati honi muli naku singanieka nguenu mua kakatela ku lutsilielo lua Muangana uetu Yesu Kilistu ua vumpahu, oku mu limuesa kahangu hakati kenu? 2 Ca kumuenako, nga mu ciuano cenu mu kovela umo mpite na zala tundzeya va olu na vizalo via cili, kaha naua mu kovela umo cihutu na zala vizalo via kuvihia, 3 vati mu linga? Vuno mu singimika mpite na zala via cili naku muleka nguenu, “Tumama aha ha cili” vunoni cihutu mu muleka nguenu, “Yove acimane aha,” ni nguenu, “Ya uka tumame kuze kuhiehi na kacituamo ka viliato viange”? 4 Nga mukemuo, vuno kamuesi na kukoka matepeso hakati kenu ni? Kati muli na kupua vangazi va vapi ni?
5 Vamuanetu vanja lema, halakanenu. Vuno vaze vave kumona vakua mavu nguavo vihutu, kati vakevo va hanguile Njambi naku vapuisa vampite mu lutsilielo ni? Kaha kati vakevo va ahangula mu kupua vasuana va Vuangana vua kulahesele vaze va alema ni? 6 Vunoni enu mue kusahula vihutu. Ava vampite kati vakevo ve kumi yandesa na kumi kokangeya muaya vindzango ni? 7 Kati vakevo ve kusahula lizina lia cili li vami luka ni? 8 Nga mue kuononoka lisiko lia Muangana kuliya na visoneka ngualio, “Uapande kulema mukuenu, ngue mu ua lilema ove vavenya” kaha muli na kulinga vuino. 9 Vunoni nga mu tualelaho kumuesa kahangu kaha muli na kulinga vupi, na masiko ami hisa muomu kamuesi na kuononoka.
10 Muomu nga muntu ononoka Masiko ose vunoni apokolaho limo, na pokola Masiko ose. 11 Muomu uze ua handekele nguendi “Kati u kalinge vukoyi,” ikeye naua ua handekele nguendi “Kati uka tsihe muntu.” Ngeci mukemuo, nga ka ulingi vukoyi vunoni utsiha muntu, una pokola* masiko. 12 Tualelenuho kuhandeka na kulinga viuma ngue vantu vava ka sompesa na masiko a vantu va kupatuka.* 13 Muomu uze kamuesa vakuavo nkeke, nendi ka vaka mu muesa nkeke mu vaka mu sompesa. Muomu nkeke ye kuvula ha kusompesa.
14 Vamuanetu, seho ika iliho nga muntu ahandeka nguendi ali na lutsilielo, vunoni keku lusolola mu vilinga? Vuno lutsilielo luaco luhasa ku muovola ni? 15 Nga umo muanetu ni ndumbuetu ali mu muzi,* ni kesi na viakulia via kupuamo via tangua na tangua, 16 vunoni umo uenu amu leka nguendi, “Ya mu ciyulo, ya ka lifutungiye, viakulia vika tovale,” vunoni ka muhana mpundu via tondeka, kaha seho ika iliho? 17 Na vuno vene, lutsilielo haluo lika lua kuhona vilinga, lu natsi.
18 Vutuhu ngoco, umo ahasa kuhandeka nguendi: “Ove uli na lutsilielo, ange njili na vilinga. Nji muese lutsilielo luove lua kuhona vilinga, kaha nange nji kumuesa lutsilielo luange kuhitila mu vilinga viange.” 19 Nguetu ua tava nguove kuakala Njambi umo lika ni? Una lingi vuino. Vunoni vandemone navo vikevio viva tava kaha veku lizazela na liova. 20 Ove yala ua kuhona mana, vuno utonda vukaleho vua muesa nguavo lutsilielo lua kuhona vilinga, ka lu silivila* ni? 21 Vika via lingisile Njambi atumbule tatetu Avilahama nguendi mukua vuviuke? Kati omo lia vilinga viendi mu nima ya kutonda ku kombeleya muanendi Isake ha mutula ni? 22 Tantekeyenu nguenu lutsilielo luendi luendelele hamolika na vilinga, kaha lutsilielo luendi va lupuisile lua mutuntu* omo lia vipanga viendi. 23 Ngeci via lipuisilemo visoneka via handeka nguavio: “Avilahama ua tsilielele muli Yehova,* evi via mupuisile mukua vuviuke,” ngeci vamu sanene nguavo kavusamba ka Yehova.
24 Mua mono nguenu muntu vamu tumbula nguavo mukua vuviuke omo lia vipanga viendi, kati omo lia lutsilielo luendi lika. 25 Na vuno vene, cikoyi Lahave kati vamu tumbuile mukua vuviuke omo lia vipanga, mu nima ya kutambula vuino tunganda naku valeka vaile njila yeka ni? 26 Cili vene, ngeci mua muvila nga kauesi na sipilitu* unatsi, na lutsilielo lua kuhona vilinga, lu natsi.