Kuli Vakua Loma
4 Nga mukemuo, tu handeka nguetu vika ua tambuile Avilahama uze uapua nkaka yetu ku muvila ua ntsitu? 2 Ca ku muenako nga Avilahama ve kumu tumbuile kupua mukua vuviuke omo lia vilinga viendi, omuoni nga ali naha ha ku lipambela, vunoni kati ku meso a Njambi. 3 Muomu vika via handeka visoneka? Via handeka nguavio, “Avilahama ua tsilielele muli Yehova,* kaha evi via mu puisile mukua vuviuke.” 4 Mua vusunga, mukua kupanga, fueto yendi kava imono kupua ngozi ya kama, vunoni va imona kupua cuma civa na pande ku muhana.* 5 Kaha muntu uze ke kupanga vunoni atsiliela muli Uze aluluisa mukua vupi kupua mukua vuviuke, vamu puisa mukua vuviuke omo lia lutsilielo luendi. 6 Mukemuo naua, Ndaviti ua handekele via ndzolela ye kuivua muntu ya tumbula Njambi kupua mukua vuviuke, kati omo lia vipanga via na lingi, nguendi: 7 “Vavezika vaze vava na konekela laza ku vilinga viavo via kuvihia, kaha vipi viavo va nava fuikilavio.* 8 Na vezika muntu uze Yehova kaka vuluka vupi vuendi.”
9 Vuno eyi ndzolela yaco, ya vaze lika va kulovoka ni na vaze va kuhona kulovoka? Muomu tue kuhandeka nguetu: “Lutsilielo lua Avilahama lua mu puisile mukua vuviuke.” 10 Mu ntsimbu ika vamu puisile mukua vuviuke? Tele na lovoka laza ni kanda? Tele kanda alovoke, tele cilima. 11 Kaha ua tambuile citantekeyeso, cikeco vene kulovoka, mu kupua citantekeyeso* ca vuviuke vua lutsilielo luakele naluo ntsimbu tele kanda alovoke. Linga apue ise ya vose vaze vali na lutsilielo vutuhu kanda valovoke, linga navo vava puise vakua vuviuke. 12 Uapua ise ya vakua kulovoka, kati nguavo ya vaze lika vakua* kuniunga lisiko lia kulovoka, vunoni na vaze vali na kuendela mu lutsilielo luakele naluo tatetu Avilahama tele kanda alovoke.
13 Muomu Avilahama cipue mbuto yendi, kava tambuile cikulaheso ca kusuana mavu kuhitila mu masiko, houe, vunoni kuhitila mu vuviuke omo lia lutsilielo luakele naluo. 14 Muomu nga vakua kuniunga masiko vakevo vanapu vasuana, kaha lutsilielo lunapu lua ngoco, na cikulaheso va naci zimangana. 15 Muomu Masiko ekuneha vutenu, vunoni kuze kakuesi masiko, na kutsiha masiko cahiko.
16 Ngeci mukemuo, mu kupua vuana vua ngozi ya kama ya Njambi, cikulaheso caco cezile kuhitila mu lutsilielo. Linga cikulaheso caco cipue ca vusunga ku mbuto yose ya Avilahama, kati lika kuli vaze vali na kuniunga Masiko, vunoni na vaze vali na lutsilielo ngue lua muesele Avilahama, ise yetu vose. 17 (Muomu vasoneka nguavo: “Nji na kupuisa ise ya miyati yayingi.”) Mukemuo mua mumuene Njambi uze ya tsilielele, uze mukua kuyoyesa vatsi na kutumbula vize viahiko ngue kuvili. 18 Avilahama uakele na lulavelelo na kutsiliela nguendi, ueku puile ise ya miyati yayingi, vutuhu viuma viaco via solokele ngue ka vihasa kulingika. Ikeye ua tsilielele ngue muze mu vamu lekele nguavo: “Mukemuo mu ikafua mbuto yove muze.” 19 Vutuhu kazeyele mu lutsilielo, vunoni ua muene muvila uendi ngue unatsi laza, muomu tele ali na miaka kampe 100. Kaha ua muene naua nguendi, Sala na tuvakana ha miaka ya kusema.* 20 Vunoni omo lia cikulaheso ca Njambi, Avilahama ka takanyene na kuhona lutsilielo. Vunoni lutsilielo luendi lua mu kanyamesele kaha uahele Njambi vumpahu, 21 oku ali na vusunga vua kusula nguendi, viuma via mu kulahesele Njambi ahasa* naua ku vipuisamo. 22 Ngeci mukemuo, “evi via mu puisile mukua vuviuke.”
23 Vunoni aa mezi, “evi via mu puisile,” ka va asonekele lika omo liendi, 24 vunoni va asonekelele naua yetu, vaze vava kapuisa vakua vuviuke, muomu tua tsiliela muli Uze ua sanguile Muangana uetu Yesu ku vatsi. 25 Yesu vamu hanene omo lia vivulumuna vietu, kaha vamu sanguile linga vaka tupuise vakua vuviuke.