Ua Kulivanga Kuli Vakua Kolintu

13 Nga nji handeka mu malimi a vantu na malimi a tungelo, vunoni kanjesi na cilemo, njinapu ngue kuohia ca ngunga na kalua ka ngendzo.* 2 Kaha nga njili na vuana vua kuambulula vupolofeto na vua kuivuisisa mahungu ose akulela, na vusunga vuose, kaha nga njili na lutsilielo lua kama lua kuhasa kunungulula mincinda vunoni kanjesi na cilemo, nji cilinge ca ngoco.* 3 Nga njihana viuma viange viose mu kulisa vakuetu, ni kuhana muvila uange uose na vutumbe vua kulihalesa, vunoni nga kanjesi na cilemo, nevi vinji uanaho vene viahi.

4 Cilemo cili na ntsintsa,* na ngozi. Cilemo ka cakele na cipululu. Cilemo kace ku lihalesa, kace kulipamba. 5 Kace kulinga viuma via ntsoni,* kace ku lituameka lika civene, kace kunyengua vuasi, ka cakele na nkulundundu.* 6 Kace kuzolela na vuhenge vunoni ce kuzolela na vusunga. 7 Cifuika viuma viose, citava viuma viose, ci lavelela viuma viose, kaha cikolesa mu viuma viose.

8 Cilemo kace kuhua.* Vunoni nga kuli vuana vua kuambulula vupolofeto, vukahua. Nga kuli vuana vua kuhandeka mu malimi,* vukahua. Kaha nga kuli mangana aku tantekeya viuma, akahua. 9 Muomu tu tantekeya mutamba ua viuma kaha vupolofeto vu tue kuambulula kavua puilemo. 10 Vunoni mu vukeza vua kupuamo, ou mutamba ua viuma vi tu tantekeya, ukahuako. 11 Mu njapuile kanike, njakele na kuhandeka ngue kanike, njakele naku singanieka ngue kanike, njakele na kuhilula ha viuma ngue kanike. Vunoni hano njina kolo,* njina mbila kuti vifua viose via vunike. 12 Mu ntsimbu ino tuli na kumona viuma ha katalelo* kaku tsitsivala, vunoni kulutue tu ka vimona vuino ngue citona meso vene. Mu ntsimbu ino, nji tantekeya lika mutamba ua viuma, vunoni kulutue njika tantekeya vuino,* ngue muze mu vanji tantekeya yange. 13 Vutuhu ngoco, evi viuma vitatu vikevio via salaho: lutsilielo, lulavelelo na cilemo. Vunoni cilemo cikeco ca hiana viose.