Mukanda ua Tiango
1 Yange Tiango, ngamba ya Njambi na Muangana Yesu Kilistu, njili naku sonekela miyati 12 ize ina lisanduoka muaya mavu nguange:
Nja mi meneka!
2 Vamuanetu, viukililenu omo mu hita mu vieseko via kuliseza-seza. 3 Muomu mua tantekeya nguenu nga mu lingamo, lutsilielo luenu lu va neseka lu kami kuasa kukolesa. 4 Tavesenu kukolesa ci manusule cipanga caco, linga muhase kupua va mutuntu na va kulela mu viuma viose ca kuhona kapenga.
5 Ngeci mukemuo, nga kuli umo hakati kenu na honoua mana, atualeleho ku avundila kuli Njambi kaha aka mu hanauo, muomu Njambi uapua cihuanga ku vose kaha ke ku tozekela.* 6 Vunoni atualeleho kuvundila na lutsilielo ca kuhona kutakanya,* muomu mukua kutakanya, napu ngue mankimba amu kalunga ndonga aya oku noku na luhundzi. 7 Kuhandeka vusunga, muntu uaco kati avandamene nguendi atambula vimo kuli Yehova,* 8 muomu ali na mitima ivali kaha mukua ku luhuaziala* mu viose via linga.
9 Vunoni muanetu mukua vundende* aviukilile* omo lia kumu haka ku vukama, 10 kaha mpite aviukilile omo lia kumu kehesa; muomu aka nonga ngue ntemo ya mu musenge. 11 Muomu ngue omo litangua lituhuka na ntuima yalio kaha lizuzisa visoka naku lalumuna vintemo kaha kuviuka cavio cinonga, mukemuo naua, mpite nendi aka nonga mu ku sekasiana* cendi.
12 Na vezika uze atualelaho kukolesa mu vieseko, muomu omo vamu tava, aka tambula cilongo ca muono cize ca akulahesa Yehova kuli vaze va tualelaho kumu lema. 13 Nga muntu ahita mu ceseko, kati ahandeke nguendi: “Njambi ali naku njeseka.” Muomu ka citava kueseka Njambi na viuma via kuvihia, kaha nendi ke kueseka naumo uahi na viuma via kuvihia. 14 Vunoni muntu ku muntu masungu endi vavenya akeo eku mueseka, mu kumu kokueya naku mu songangeya. 15 Kaha masungu nga ana kolo* asema vupi, kaha vupi nga navu lingi, vusema kutsa.
16 Vamuanetu vanja lema, kati mu tave kumi hungumuna. 17 Vuana vuose vua cili na vuana vuose vua ku tantuluka, vua tunda muilu kuli Tata ua vieke via muilu, uze ke kualuluka ngue vimbembe.* 18 Ku cizango cendi, ua lingisile tu kaleko kuhitila mu lizi lia vusunga, linga tupue va kulivanga* ku via kutanga viendi.
19 Vamuanetu vanja lema, tantekeyenu nguenu: Muntu uose akale na vuasi vua kuivua, vunoni alivandeke kuhandeka, kaha kati anyengue vuasi. 20 Muomu nga muntu na nyengua, ke kulinga viuma via cili* ku meso a Njambi. 21 Ngeci mukemuo, mbilenu kuti mazilo ose, na indzi* yose, kaha tambulenu na kukonkama lizi lia Njambi li vali na kukuna mu mitima yenu lize lihasa kuohiela miono yenu.
22 Vunoni, puenu vakua kulinga vili mu lizi lia Njambi, kati vakua kuivua lika, oku mu likuisa enu vavenya na visinganieka via makuli. 23 Muomu nga muntu napu lika mukua kuivua lizi, kaha ke kulinga vie kuivua, na lifu na muntu ue kulitala ha katalelo. 24 Muomu alitala lika kaha aya, haze vene asuva cifua cali naku solokelamo. 25 Vunoni uze ahilula vuino mu lisiko lia ku tantuluka lize lituala ku kupatuka naku tualelaho ku liononoka, napu mukua kulinga cipanga, kati mukua kuivua lika na kusuva. Kaha aka viukilila mu viuma via linga.
26 Nga umo asinganieka nguendi uapua mukua kulemesa Njambi, vunoni kaniungu ndaka* yendi, ali na kukuisa lika mutima uendi vavenya kaha kulemesa cendi ca ngoco. 27 Kulemesa* ca kulela, cize kacesi na mazilo ku meso a Njambi yetu Tatetu, cikeco eci: kuniunga vana vantsiua na vantuluue mu tuyando tuavo, kaha na kuliniunga linga kati tukale na citoma ca mavu.