Ua Kulivanga ua Petulu
3 Mukemuo naua enu vampuevo, liononuesenu ku vamala venu linga nga kuli vamo ka ve kuononoka lizi lia Njambi, vahase ku va kokueya ca kuhona mezi, kuhitila mu vilinga via vampuevo vavo 2 muomu va limuena vilinga vienu via kulela, na kasingimiko kenu ka kama. 3 Ku liviukisa cenu, kati cipue lika ca ha mbandza, ngeci mua kuvinda vinkambu, ku licakeya viuma via olu, ni kuzala vizalo via cili. 4 Vunoni cipue ca vuntu vua mukati, vua ku mutima, ku liviukisa cize ka cihasa kuvola, ca kulembama na kuua mutima,* cize ca seho ya kama ku meso a Njambi. 5 Muomu mukemuo mu vakele naku liviukisa vampuevo va kulela va ku laza, vaze va lavelelele muli Njambi, va liononuesele ku vamala vavo, 6 ngeci mua Sala uononokele Avilahama, naku mu sana nguendi sukulu. Nenu mupua vana vendi nga mu tualelaho kulinga via cili, na kuhona kukala na liova.
7 Mukemuo naua enu vamala, tualelenuho kukala na vampuevo venu, na kuivuisisa.* Va singimikenu, muomu vapua ngue citenga ca hiana kuvotsika, kaha ku ngozi ya Njambi, vaka suana muono hamolika nenu. Kati ngoco, Njambi ka kevu vivundilo vienu.
8 Mu ku manusuila, mu vose kalenu na mutima umolika, livuilenu nkeke, kalenu na cilemo ca vana va umo, vakua cikeketima, na kulikehesa. 9 Kati mu hiluise vupi na vupi, cipue vituka na vituka. Vunoni vezikisenu, muomu vikevio viva mi sanenene, linga muka suane civezikiso.
10 Muomu “uose ua lema muono, kaha atonda kuka mona matangua a ndzolela, aniunge lilimi liendi ku vupi, na kanua kendi ku kuhandeka makuli. 11 A likele kulinga vupi kaha alinge via cili; atonde ciyulo naku cikava. 12 Muomu meso a Yehova,* ana tala vakua vuviuke, na matuitui endi ali naku halakana ku lambelela cavo. Vunoni cihanga ca Yehova, ci na luvalela vakua kulinga via kuvihia.”
13 Cili vene, iya aka mi linga mua kuvihia nga mu lihakela kapandi ka kulinga via cili? 14 Vunoni ambe nga mu yanda omo lia vuviuke, mupua vakua ndzolela. Ngeci kati muivue liova* lia viuma vi vavuila vakevo liova, cipue kuma mutima. 15 Vunoni, tavenu Kilistu mu mitima yenu nguenu uapua ua kulela, kaha Muangana. Ntsimbu yose livuaheselenu ku kumbulula uose-ouo a mihula via lulavelelo luenu, vunoni lingenumo na kulikehesa,* kaha na kasingimiko ka kama.
16 Tualelenuho kukala na mutima* ua cili, linga ntsimbu yose iva ka mi handeka mua kuvihia, va kevue ntsoni omo lia vilinga vienu via cili, mu kupua vakua kukava Kilistu. 17 Muomu ci li kulutue kuyanda omo lia kulinga via cili, nga Njambi avi tavesa, ku tuvakana kuyanda omo lia kulinga via kuvihia. 18 Muomu Kilistu uatsile lumolika omo lia vupi vua vantu, ou mukua vuviuke ua tsililile vakua vuhenge, linga ami tuamene kuli Njambi. Vamu tsihile na muvila ua ntsitu, vunoni vamu yoyesele na muvila ua sipilitu. 19 Kaha mu cifua eci, uaile mu kuambuluila vasipilitu vali mu kamenga, 20 vaze va muesele lisino omo Njambi uakele naku vandamena na ntsintsa ku matangua a Noa, muakele na kutunga vuato vuze vuovuele vantu vavandende ku mema, ni nguetu, miono* 8.
21 Mbatizimu ize ina lifu na vino viuma, hano nayo ili naku miovola kuhitila mu cisangukilo ca Yesu Kilistu, (mbatizimu yaco, kaya lumbunukile kukusa mazilo aku ntsitu, vunoni ku lambelela Njambi ami kuase kukala na mutima ua kulela). 22 Yesu Kilistu ali ku livoko lia cilio lia Njambi, muomu uaile muilu, kaha tungelo, vakua kusika, na vindzili, va viononuesele kuli ikeye.