Ua Kulivanga Kuli Vakua Kolintu
6 Nga hakati kenu hali umo na vihisila mukuavo, vuno cipua ca cili vene kumu tuala ku vantu vakua vuhenge linga vaka mu sompese, mu cihela ca kumu tuala kuli vakua kulela ni? 2 Ni kamu tantekeya nguenu vakua kulela vakevo vaka sompesa mavu? Kaha nga yenu mu ka sompesa mavu, vuno ka muhasa kusompa tuvimpande tua tundende ni? 3 Vuno kamu tantekeya nguenu yetu tu ka sompesa tungelo ni? Nga mukemuo, vati tu honoua kusompa tuvimpande tua mu muono uno? 4 Nga muli na vimpande mu muono uno vi mua pande kusompa, nkuma musana vantu vaze va ce kumona cikungulukilo kupua va ngoco linga vapue vangazi ni? 5 Njina handekamo linga mukale na ntsoni. Vuno hakati kenu kahesi muntu ali na mana ahasa kusompa milonga ili hakati ka vamuanaye ni? 6 Vunoni mu uana ngecize muanetu atuala muanaye ku ndzango ya kusompela, ku vantu vaze ka va tsilielele!
7 Mua vusunga vene, nga muli na kulituala ku vindzango umo na mukuavo, omuo ni mua honoua laza. Vika ka muecelela vakuenu vami vulumuine? Vika ka muecelela vakuenu vami zangamene? 8 Vunoni yenu muli naku vulumuina vamuanoko naku va zangamena!
9 Vuno kamu tantekeya nguenu vakua vuhenge ka vaka suana Vuangana vua Njambi ni? Kati mu likuise. Muomu vakua kulinga vupangala, vakua kulemesa tumponya, vakua vukoyi, vamala ve kutava ku va tenga vampuevo, cipue vamala ve kulimona ku mivila na vakuavo vamala,* 10 cipue vezi, cipue vakua kuenda vakuavo ha vuongo linga vava zangamene, cipue vakua kupenda,* cipue vakua kutuka* na vakua lizangamena,* ka vaka suana Vuangana vua Njambi. 11 Nenu vamo mukemuo mu muafuile. Vunoni va nami tanesa naku mi lelesa. Kaha va nami puisa vakua vuviuke mu lizina lia Muangana Yesu Kilistu na mu sipilitu ya Njambi yetu.
12 Njili na mpoko ya kulinga viuma viose, vunoni kati viose vihasa kunji kuasa. Njili na mpoko ya kulinga viuma viose, vunoni ka njika tavesa na vimo viahi vinji tumine.* 13 Viakulia via kalako omo lia lizimo kaha lizimo omo lia viakulia, vunoni Njambi aka nongesa viose vivali. Muvila kati ua vupangala, vunoni uapua ua Muangana, kaha Muangana ikeye vavenya muvila. 14 Vunoni Njambi ua sanguile Muangana ku vatsi, netu vene aka tu sangula kuhitila mu ngolo yendi.
15 Vuno ka mu tantekeya nguenu mivila yenu yapua vilio via Kilistu ni? Vuno nja pande kuambata vilio via Kilistu naku vi tokakana kuli cikoyi ni? Na limo litangua liahi! 16 Vuno ka mu tantekeya nguenu, uze alitokakana kuli cikoyi, napu ntsitu imolika nendi ni? Muomu Njambi nguendi “vavali vakapua ntsitu imolika.” 17 Vunoni uose alinungakana na Muangana, akapua muvila umolika nendi mu sipilitu. 18 Tinenu vupangala!* Muomu vupi vuose vua linga muntu, vuli ha mbandza ya muvila uendi, vunoni uze ue kulinga vupangala, ali naku vulumuina muvila uendi vavenya. 19 Kamu tantekeya nguenu muvila uenu uapua tembele ya sipilitu santu, ize ili muli yenu, imua tambuile kuli Njambi ni? Cikuavo naua, ka mua kundamene kuli enu vavenya, 20 muomu vami landele na ndando. Ngeci mukemuo, lingenu cose mu zumbangeye Njambi na mivila yenu.