Ua Kulivanga Kuli Vakua Kolintu

10 Vamuanetu, hano nji tonda mu tantekeye ngecize, vakukuluila vetu vose vakele muintsi lia liselua, kaha vose vahitile mu kalunga ndonga. 2 Vose va vambatizile muli Mosesa, kuhitila mu liselua namu kalunga ndonga. 3 Vose valile viakulia vimolika via ku sipilitu. 4 Kaha vose vanuine viakunua vimolika via ku sipilitu. Muomu vakele na kunua ku livue lia ku sipilitu lize liakele naku vakava, kaha livue liaco, liemanenene* Kilistu. 5 Vunoni cingi cavo ka vaile Njambi ku mutima, ngeci vava tsihile mu likango.

6 Evi via va solokelele mu kupua cimueso kuli yetu, linga kati tu sunguiye viuma via vipi ngue mu valingile vakevo. 7 Kati mupue vakua kulemesa tumponya ngue mu valingile vamo vavo, ngue mu vasoneka nguavo: “Vantu va tumamene mu kulia na kunua. Kaha va katukile na kuputuka kulisamba.” 8 Kati tulinge vupangala,* ngue mu valingile vamo vavo, kaha kua tsile vantu 23.000 mu litangua liangongo. 9 Kati tueseke Yehova,* ngue mu va muesekele vamo vavo kaha vatsile ku manoka. 10 Kati mupue vakua ku linyenyeta, ngue mu valingile vamo vavo kaha vava nongesele kuli mukua kunongesa. 11 Evi viuma via va solokelele mu kupua cimueso kuli yetu, kaha va vi sonekele mu kupua cilungula kuli yetu tuli na kuyoyela ku vintsimbu* via kumanusuila.

12 Ngeci mukemuo, uze asinganieka nguendi nemana, azangame, kutina aua. 13 Ceseko cose cimu lihita naco, cikeco naua ci ve kulihita naco vantu vose. Vunoni Njambi uapua mukua vucili, kaha ka kecela va mieseke na haze ha lengela ndzili yenu. Vunoni omo muhita mu ceseko, Njambi akami sokoluela njila linga muhase kukolesa mu ceseko caco.

14 Ngeci mukemuo, vakua cilemo cange,* tinenu ku kulemesa tumponya. 15 Njili naku mileka evi viuma mu kupua vantu vaze vali na vuhasi vua kunanguka. Tantekeyenu enu vavenya viuma vinjili na kuhandeka. 16 Vuno ngandza ya civezikiso itue ku vezikisa, kati ikeyo yeku tu pandakana ku maninga a Kilistu ni? Vuno mbolo itue ku pazula, kati ikeyo yeku tu pandakana ku muvila ua Kilistu ni? 17 Mu kulinga kuli mbolo imolika, vutuhu tuapua tu vavengi tuapua muvila umolika, muomu tu vose tue kulia ku mbolo imolika.

18 Aci singaniekenu ha vaIsaleli va ku ntsitu: Vuno vaze ve kulia ku vikombelo, kati vakevo veku lipangela na mutula ni? 19 Vika nji tonda ku lumbununa? Vuno vize vive ku kombeleya ku tumponya viapua via seho ni? Cipue kamponya uapua ua seho ni? 20 Houe. Vunoni njili na kuhandeka nguange, vize vive ku kombeleya vakua vifuti, ve ku vi kombeleya ku vandemone kati kuli Njambi. Kaha kanji tondo mu lipandakane na vandemone. 21 Ka citava munue ku ngandza ya Yehova naku ngandza ya vandemone. Ka citava mulie ku mesa ya Yehova naku mesa ya vandemone. 22 Ni tuli na kutonda ku sangumuna lifuua lia Yehova? Vuno tu va kukanyama ku tukavana ikeye ni?

23 Viuma viose va vitavesa, vunoni kati viose vikuasa. Viuma viose va vitavesa, vunoni kati viose vi kanyamesa.* 24 Muntu ku muntu atualeleho kutuameka vizango via vakuavo, kati viendi.

25 Lienu viose vive kulandesa ha vitanda via ntsitu ca kuhona kuihula, omo lia mutima* uenu. 26 Muomu mavu na viose via kalaho viapua via Yehova. 27 Nga muntu ua kuhona kutsiliela ami lania ku viakulia kaha mutonda kuyako, lienu viose viva kami zumbula ca kuhona kuihula, omo lia mutima* uenu. 28 Vunoni nga umo amileka nguendi, evi va na vikombeleya ku tumponya, kati mu vilie, omo lia uze na mileka na omo lia mutima.* 29 Kanjesi na kuhandeka via mutima uove vavenya, vunoni ua mukuenu. Muomu kanji tondo nguange, nga nja pangesa mpoko yange ya ku lihanguila viuma, kaha munima yaco, kukala muntu anji hisa omo lia mutima uendi. 30 Vutuhu omo njilia nji santsela kuli Njambi, vuno nja pande vene kulia nga viakulia viaco vilingisa vakuetu vanji hise ni?

31 Ngeci mukemuo, cipue nga mulia, cipue nga munua, cipue nga mulinga cuma cose-oco, lingenu viuma viose mu kuhana Njambi vumpahu. 32 Kati mupue cisuntsuiso kuli vaYundeya, cipue kuli vaNgelengu ni ku cikungulukilo ca Njambi, 33 ngue mu njili naku lihakela kapandi ka kuvuisa vantu vose ndzolela mu viuma viose. Kanjesi na kutuameka cizango cange vavenya, vunoni cizango ca vavengi linga vakovoke.