Ua Kulivanga ua Petulu
5 Ngeci mukemuo, mu kulinga nange nji mukuluntu ngeci muenu, mukaleho ua tuyando tua Kilistu, kaha nji ka tambuila hamo nenu vumpahu vuze vu vaka solola, njili naku lambelela* vakuluntu vali hakati kenu nguange: 2 Niungenu vutanga vua Njambi vu vami kundika, mu kupua tuniungi, kati na ntsindiye, vunoni pangenu na mutima uose ku meso a Njambi. Kati na vutumbe vua ku uanenaho fueto, vunoni na kulihana cose. 3 Kati kutumina ava vapua vusuana vua Njambi, vunoni puenu lungano ku vutanga. 4 Kaha omo kaniungi ua kama va namu solola, muka tambula cilongo ca vumpahu cize ka ce kunonga.
5 Na vuno vene, enu vakuendze, liononuesenu ku vakuluntu.* Vunoni enu vose, puenu* va kulikehesa* ku umo na mukuavo, muomu Njambi ua zinda vakua ku lihalesa, vunoni ue kumuesa ngozi ya kama ku vakua kulikehesa.
6 Ngeci mukemuo, likehesenu muintsi lia livoko lia Njambi lia ngolo, linga ami hake ku vukama ha ntsimbu ina pande. 7 Mbilenu visoti vienu viose kuli ikeye, muomu ikeye ueku mi lela.* 8 Niungenu vuhasi vuenu vua ku singanieka vuino! Vingilenu, citozi cenu Ndiavu, ali na kuendangana ngue ndumba ohia, mu kutonda ya alia. 9 Vunoni mu vianenu, na kukanyama mu lutsilielo, oku mu tantekeya nguenu lamba imuli na kuhita, ikeyo i vali na kumona vamuanoko mu mavu ose. 10 Vunoni mu nima ya kuyanda mu kantsimbu ka kandende, Njambi uze ua sula na ngozi ya kama, uze uami sanene ku vumpahu vuendi vua yaye mu kulikata na Kilistu, aka manusula kumi longesa. Aka mi kanyamesa, aka mi kolesa, naku mi hana ndzili ya kuzikiza.* 11 Kuli ikeye ku kale ngolo, ku miaka yose. Ame.
12 Nja mi sonekela mezi a andende, na vukuasi vua Siluano,* muanetu uaku kulahela, linga nji mi kanyamese, naku mihana vukaleho vua vusunga nguange, eyi ikeyo ngozi ya kama ya Njambi, ya vusunga. Likuatelelenu ku ikeyo, na ndzili yose. 13 Mpuevo ali mu Mbambilone, uze iva hangula ngeci muenu, nami menekaho. Na muanange Mako, nendi nami menekaho. 14 Limenekenu umo na mukuavo na kulitsemba ca cilemo.
Ciyulo cikale nenu vose mua likata na Kilistu.