Kuli Vakua Efesu
5 Ngeci mukemuo, temunuinenu* Njambi mu kupua vana va alema. 2 Tualelenuho kuenda mu cilemo ngue muze vene mua tu lemene* Kilistu, kaha ua lihanene vavenya omo lietu* mu kupua vuana na cikombelo ca vueko vua cili kuli Njambi.
3 Vupangala* na mazilo ose, cipue lizangamena, ka via pandele ambe ku vi tumbula hakati kenu, ngue muze mua pande vakua kulela, 4 cipue vilinga via ntsoni, ni vihandeka via vuheve, ni ku lisakalala ca kuvihia, evi viuma ka via pandele, vunoni santselenu Njambi. 5 Muomu mu tantekeya evi, kaha mu tantekeya vuino enu vavenya nguenu muntu naumo uahi mukua kulinga vupangala, ni mukua vilinga via mazilo, ni mukua lizangamena, kulumbunuka mukua kulemesa tumponya, aka kala na vusuana mu Vuangana vua Kilistu na vua Njambi.
6 Kati kukale muntu ami kuisa na mezi a ngoco,* muomu omo lievi viuma, vutenu vua Njambi vuiza ha vana va lisino. 7 Ngeci mukemuo, kati mu lipandakane navo. 8 Muomu laza, mua puile milima vunoni hano munapu ceke mu kulikata na Muangana. Tualelenuho kuenda ngue vana va ceke, 9 muomu vusuka vua ceke, vuapua viuma viose via cili, via vuviuke na via vusunga. 10 Tualelenuho ku tantekeya viuma via tava Muangana; 11 kaha likelenu ku lipandakana navo mu vipanga via milima vize ka vie kuima vusuka, vunoni vi sahulenu. 12 Muomu viuma vi ve kulinga mu vusueke, viapua via ntsoni ambe vene ku vi tumbula. 13 Kaha viuma viose vici na sahula* ceke vi soloka, na viose viva na solola vinapu ceke. 14 Ngeci mukemuo, ve kuhandeka nguavo: “Hinduka, Ove una kosa, sanguka ku vatsi kaha Kilistu aka kutuila ceke.”
15 Ngeci zangamenu cikuma linga kati muende ngue visiname vunoni ngue vakua mana, 16 pangesenu vuino ntsimbu* yenu, muomu matangua ano a api. 17 Omo liaco, likelenu kupua va kukaluua, vunoni tualelenuho ku tantekeya cizango ca Yehova.* 18 Cikuavo naua, kati mu pende na vinyu, muomu vie kulingisa muntu ku likovelesa mu vilinga via kuvihia,* vunoni tualelenuho kusula na sipilitu. 19 Likanyamesenu umo na mukuavo mu kuimba visamu, ku sangaziala Njambi na miaso ya ku sipilitu, na kuimba miaso ya ku sangaziala Yehova mu mitima yenu. 20 Ntsimbu yose santselenu Njambi yetu ikeye Tatetu, omo lia viuma viose mu lizina lia Muangana uetu Yesu Kilistu.
21 Liononuesenu kuli umo na mukuavo, omo lia ku singimika* Kilistu. 22 Vampuevo va liononuese* ku vamala vavo, ngue mu ve kulinga kuli Muangana, 23 muomu yala ikeye mutue ua mpueyendi, ngue omo Kilistu ikeye mutue ua cikungulukilo na muovole ua muvila uaco. 24 Ngue omo cikungulukilo ce ku liononuesa kuli Kilistu, vampuevo navo va na pande ku liononuesa ku vamala vavo mu viose. 25 Enu vamala, tualelenuho kulema vampuevo venu ngue omo Kilistu ua lemene cikungulukilo na kulihana omo liaco, 26 linga alelese cikungulukilo naku ci tanesa na mema kuhitila mu lizi, 27 linga cikungulukilo cipue ca cili ku meso endi ca kuhona citoma, ambe minkonya ni viuma viose-ovio via kulifua nevi, vunoni cipue ca kulela ca kuhona kapenga.
28 Na vuno vene, vamala va na pande kulema vampuevo vavo ngue mivila yavo vavenya. Yala ua lema mpueyendi ua lilema ikeye vavenya. 29 Muomu ka kuakele muntu ua zinda muvila* uendi, vunoni ue ku ulisa naku uniunga, ngue omo Kilistu naua ue kulinga na cikungulukilo, 30 muomu tunapu vilio via muvila uendi. 31 “Ngoco vene, yala aka seza ise na naye aka lipandakana* na mpueyendi, kaha ava vavali va kapua ntsitu imolika.” 32 Eli lihungu lia kulela linapu lia kama. Hano njili na kuhandeka via Kilistu na cikungulukilo. 33 Vutuhu ngoco, muntu ku muntu na pande kulema mpueyendi ngue mua lilema ikeye vavenya, kaha mpuevo na pande ku singimika cikuma yaliendi.