Kuli Vakua Efesu
6 Enu vana, ononokenu visemi venu mu kulikata na Muangana, muomu evi vikevio via viuka ku meso a Njambi. 2 “Singimika iso na noko,” eli likelio lisiko lia kulivanga lize lili na cikulaheso nguaco: 3 “Linga viuma vi kuendele vuino* kaha naua uhase kuyoya ntsimbu ya kama ha mavu.” 4 Kaha enu vaise ya vana, kati mu nyenguese vana venu, vunoni tualelenuho ku valela kuhitila mu vimamuna* na vilongesa via Yehova.*
5 Enu vangamba, ononokenu vasukuluenu va vantu, lingenumo na liova na kuzaza na mutima uenu uose ngue mu mue kulinga kuli Kilistu, 6 kati lika ha ntsimbu ivali naku mi talela linga muye vantu ku mitima, vunoni mua pande kuononoka muomu mu vangamba va Kilistu, vaze ve kulinga cizango ca Njambi na muono uavo uose. 7 Pangenu na visinganieka via cili, ngue vaze va pangela Yehova kati vantu, 8 muomu mu tantekeya nguenu viose-ovio via cili via linga muntu, aka vi tambula naua kuli Yehova, ambe nga uapua ngamba ni ua kuzituka. 9 Nenu vasukulu, tualelenuho kuyoya vuino na vangamba venu, kati mu ku lihalelavo,* muomu mu tantekeya nguenu, Muangana uavo uze vene naua uapua Muangana uenu, ali muilu, kaha kuli ikeye ka kuakele kahangu.
10 Mu ku manusuila, tualelenuho kuuana ndzili muli Muangana namu vukama vua ngolo yendi. 11 Zalenu* vitua viose via ndzita via kutunda kuli Njambi linga muhase kukanyama* ku miheto ya Ndiavu, 12 muomu ndzita yetu, kati na maninga na ntsitu, vunoni tuli na kulua na vanguvulu, na vaze vali na mpoko ya kusika, na vakua kusika ano mavu ali mu milima, na vasipilitu va kuzuala vali muilu. 13 Ngeci mukemuo, zalenu* vitua viose via ndzita via kutunda kuli Njambi, linga muhase kukanyama ha litangua lia lipi kaha mu mu manusula viuma viose, muimane ngo.
14 Ngoco vene, manenu ngo, oku mua zitika mu vimbunda vienu muiva ua vusunga, na kuzala ntelo ya ha ntulo ya vuviuke, 15 na kuzala vinkaku ku mikono yenu, mu ku liviukisila kuambulula muzimbu ua cili ua ciyulo. 16 Mu kuvueza kuli evi, ambatenu ntelo ya kama ya lutsilielo imu hasa kuzima nayo mivi yose ya tuhia ya uze mukua vupi. 17 Cikuavo naua, tambulenu cikoko* ca vuovoke, na mukuale ua sipilitu, ni nguetu, lizi lia Njambi, 18 oku naku tuamenena ca sipilitu, tualelenuho kuvundila mu vifua viose, naku lambelela ntsimbu yose. Kaha omo liaco, vingilenu naku tualelelaho ku lambelelako vakua kulela vose. 19 Nange nji kundikenuko mu vivundilo, nguenu va nji hane mezi a kuhandeka omo nji asama kanua kange, linga nji handeke na kusimpa omo njambulula lihungu lia kulela lia muzimbu ua cili. 20 Muzimbu uaco, ukeuo unji na puila muluua oku njili mu malienge, kaha naua linga nji uhandeke na kusimpa ngue munji na pande ku uhandeka.
21 Kaha nga mu tonda ku tantekeya viange na vati njili, muanetu itua lema, Tikiku, mukua kupanga vuino muli Muangana, aku mileka viuma viose. 22 Vikevio vi njili naku mu tumina kuli yenu, linga mu tantekeye vati tuli, kaha naua aku lembezieke mitima yenu.
23 Ciyulo, cilemo, na lutsilielo via kuli Njambi Tata na kuli Muangana Yesu Kilistu, vikale nenu vamuanetu. 24 Ngozi ya kama ikale na vose vaze va lema Muangana uetu Yesu Kilistu na cilemo cize ka ce kuhua.