Ua Kulivanga ua Petulu
2 Ngeci mukemuo, mbilenu kuti vupi vuose, na makuli ose, na civembulu, na cipululu, na kutuaha cose. 2 Ngeci mua tukeke va na semuka vuovuno, kalenu na cizango ca kama ca kuamua mavele a lizi lia Njambi a kuhona kupesula,* linga ami kuase kukola na kuovoka, 3 mu kulinga mua limuena nguenu, Muangana uakala na ngozi.
4 Kaha omo mu suena ku livue lia muono, lize li va vianene vantu, vunoni Njambi na lihangula na kulimona kupua lia seho, 5 nenu naua, ngeci mua mavue a muono, vali naku mi tunga ngue ndzivo* kuhitila mu sipilitu santu ya Njambi, mupue vusasendote vua kulela, linga mu hane vikombelo kuliya na sipilitu* ya Njambi, vize via tava ikeye kuhitila muli Yesu Kilistu. 6 Muomu Visoneka nguavio: “Talenu! Nji haka mu Siono livue linja hangula, livue lia seho lia mu mbango, lia luvula, kaha uose ali tsiliela ka ka liveye na limo litangua liahi.”
7 Ngeci mukemuo, ikeye napu ua seho ya kama kuli yenu, muomu munapu vakua kutsiliela. Vunoni kuli vaze ka va tsilielele, “lize livue li va vianene vakua kutunga, likelio linapu livue lia seho lia mu mbango” 8 kaha linapu “livue lia kusuntsuisa, livue lia kuuisa.” Ve kusuntsuka muomu ka ve kuononoka lizi. Vikevio viva va hanguila. 9 Vunoni enu munapu “muyati ua kuhangula, vasasendote va vumuene, muyati ua kulela, vusuana vuendi vua kulifuila, linga muambulule kuose vucili” vua Uze ua mi sanene, muku mi tundisa mu milima naku mi neha mu ceke cendi ca cili. 10 Muomu laza ka mua puile muyati, vunoni hano honi munapu muyati ua Njambi. Laza kava mi muesele nkeke, vunoni hano honi va li naku mi muesa nkeke.
11 Vakua cilemo cange, mu kupua vakua kuiza kaha na vangendzi ha mavu, nji mi lambelela nguange, tualelenuho kutina ku masungu a ntsitu, aze ali naku mi luisa. 12 Tualelenuho kukala na vilinga via cili hakati ka vakua vifuti, linga mu vami vangeya nguavo mu vakua kuvihisa, vakevo vavenya vapue vakaleho va vilinga vienu via cili, linga va hane Njambi vumpahu, ha litangua liendi lia kuhilula.
13 Omo lia Muangana, liononuesenu ku vose vaze vali na mpoko, apue muangana muomu ua mi hiana, 14 cipue vanguvulu, muomu uava hangula linga vahane kasitiku kuli vakua kulinga via vipi, na kusangala vaze va linga via cili. 15 Muomu cizango ca Njambi nguendi, mu linge via cili, linga muhase ku holuesa vihandeka via vuheve, via vantu va kuhona mana. 16 Puenu vantu va kupatuka,* vunoni kati mu pangese kupatuka cenu kupua vukovelelo* vua kulinga vupi, vunoni puenu vandungo va Njambi. 17 Singimikenu vantu vose, kalenu na cilemo ku civunga cose ca vamuanetu, singimikenu Njambi,* singimikenu muangana.
18 Vangamba vononoke ku vasukuluavo na vuoma vuose vua va pande, kati lika ku vasukulu va cili kaha veku vevuisisa, vunoni naku vasukulu vaze va vakalu. 19 Muomu cinapu ca cili nga muntu akolesa mu visoti, naku mu yandesa ca kuhona mulonga, omo lia kutonda kukala na mutima* ua kulela ku meso a Njambi. 20 Muomu fueto ika mu uanaho, nga mu kolesa ku vipupa omo lia kulinga vupi? Vunoni nga mu kolesa omo lia kulinga via cili, cinapu ca cili ku meso a Njambi.
21 Cili vene, evi vikevio viva mi sanenene, muomu Kilistu nendi ua yandele omo lienu, naku mi sila cimueso linga mu kave vuino lungano luendi. 22 Ka lingile vupi, kaha mu kanua kendi ka muakele visaki. 23 Mu vakele naku mu tuka, ka va hiluisilile matuka. Muakele na kuyanda, ka lihalelelevo, vunoni ua kundikile viose mu mavoko a Mukua kusompesa mu vuoloke. 24 Ikeye uambatele vupi vuetu mu muvila uendi ha citi, linga tu patuke ku vupi, kaha tu yoye mu kulinga via cili. Kaha “omo lia vimbandu viendi, mu na kanguka.” 25 Muomu muapuile ngue vampanga va kuzimbala, vunoni hano honi, mua hiluka kuli kaniungi, na ntuamena* ua miono yenu.