Ua Kulivanga Kuli Vakua Kolintu
1 Yange Paulu, uze iva sanene kupua kapostolo ua Kilistu Yesu ku cizango ca Njambi, njili hamo na muanetu Sostene, 2 njili naku sonekela cikungulukilo ca Njambi cili mu Kolintu, yenu vene vava lelesa mu kulikata na Kilistu Yesu, kaha vami sana kupua va kulela, hamo na vose va tambeka lizina lia Muangana uetu Yesu Kilistu ku vihela viose, ikeye Muangana uavo vene na uetu, nguange:
3 Ngozi ya kama na ciyulo via kutunda kuli Njambi Tatetu na kuli Muangana Yesu Kilistu, vikale nenu.
4 Ntsimbu yose nje kusantsela kuli Njambi omo lienu, muomu va nami muesa ngozi ya kama ya Njambi kuhitila muli Kilistu Yesu. 5 Muomu mu viuma viose va nami fukisa muli ikeye, mu vuhasi vuose vua kuhandeka namu mangana ose, 6 ngue omo va na kolesa vukaleho vua Kilistu hakati kenu, 7 linga kati mu hone vuana na vumo vuahi, ntsimbu muli naku vandamena cikuma kusoloka ca Muangana uetu Yesu Kilistu. 8 Kaha naua, aka mi kanyamesa na ha kukotoka, linga kati mukale na ha kumi hanena mulonga ha litangua lia Muangana uetu Yesu Kilistu. 9 Njambi uapua mukua vucili,* ikeye uami sanene linga mu likate kumo na muanendi Yesu Kilistu Muangana uetu.
10 Vamuanetu, njimi lambelela mu lizina lia Muangana uetu Yesu Kilistu nguange, litombolenu mu vihandeka, hakati kenu kati ha kale matepeso, vunoni likatenu kumo mu kukala na visinganieka vimolika na matumbe amolika. 11 Muomu vamo vakua ndzivo ya Koloue, va nanji leka vienu vamuanetu nguavo, hakati kenu hali kulihoya.* 12 Vinji tonda kumi lumbunuina evi: muntu ku muntu hakati kenu, ali na kuhandeka nguendi: “Ange nji ua Paulu.” Vakuavo nguavo “Ange nji ua Apolo.” Ava nguavo: “Nji ua Kefasi.”* Vakuavo co nguavo: “Nji ua Kilistu.” 13 Vuno Kilistu na litepe ni? Vuno Paulu ikeye uami tsililile ha citi ca kayando* ni? Ni vami mbatizile mu lizina lia Paulu? 14 Nji santsela kuli Njambi, muomu naumo uahi uenu inja mbatizile, kuvanga Kilispu lika na Ngayu, 15 linga naumo uahi hakati kenu ahandeke nguendi vamu mbatizile mu lizina liange. 16 Eyo, nja mbatizile naua va ku ndzivo ya Setefanasi. Vunoni kutuala hali ava vakuavo, kanji vuluka nga nja mbatizileko umo. 17 Muomu Kilistu kanji tumine kumbatiza, vunoni ku vambuluila muzimbu ua cili. Kanja pangesele mezi a mangana* kutina citi ca kayando* ca Kilistu ci honoue seho.
18 Muomu muzimbu ua handeka kutuala ha citi ca kayando, unapu vuheve kuli vaze vaya ku kunonga, vunoni kuli yetu va vali na kuovola unapu ngolo ya Njambi. 19 Muomu vasoneka nguavo: “Njika manusula mana a vakua mana, na kuviana* mangana a vakua ku lilongesa.” 20 Mukua mana ali kulihi? Mukua kusoneka* ali kulihi? Mukua ku likandula vimpata uamu mavu ano* ali kulihi? Vuno mana a mavu ano, Njambi ka apuisile vuheve ni? 21 Muomu, mu kulinga vakua mavu va tsiliela mu mana avo vavenya, ka vahasele ku tantekeya Njambi. Vunoni Njambi na muesa mana endi, mu kuovola vaze vamu tsiliela, kuhitila mu muzimbu utue kuambulula uve kumona vakua mavu nguavo vuheve.
22 Muomu vaYundeya va lomba vitantekeyeso, kaha vaNgelengu va tonda mana. 23 Vunoni etu tuli na kuambulula via Kilistu uze uva tsihilile ha citi, vunoni kuli vaYundeya evi vinapu cisuntsuiso, kaha kuli vakua vifuti vunapu vuheve. 24 Vunoni kuli vaze vava na sana, cipue vaYundeya ni vaNgelengu, Kilistu napu ngolo ya Njambi na mana a Njambi. 25 Muomu viuma via Njambi viva mona vantu nguavo viapua vuheve, via hiana mangana a vantu. Kaha viuma via Njambi viva mona vantu nguavo viapua via kuzeya, via hiana ngolo ya vantu.
26 Vamuanetu, nenu mua limuena nguenu hakati kenu va ana sana Njambi, kahesi vavengi vakua mangana kuliya na kumona ca vantu, cipue vakua vukama, ni cipue vamiene, 27 vunoni Njambi ua hanguile viuma vive kumona vakua mavu nguavo vuheve, mu kuvuisa ntsoni vakua mangana. Cikuavo naua, Njambi ua hanguile viuma vive kumona vakua mavu nguavo via kuzeya, mu kuvuisa ntsoni viuma via kukanyama. 28 Kaha Njambi ua hanguile viuma vive kumona vakua mavu nguavo ka viakele na seho kaha na vize vive kuyengula, ua hanguile naua vize vive kumona nguavo via ngoco, linga vize vi vapuisa via seho, a vipuise via ngoco, 29 linga naumo uahi alihalese ku meso a Njambi. 30 Vunoni omo lia Njambi, tua likata na Kilistu Yesu, uze na tuhana mangana a kutunda kuli Njambi, tunapu vakua vuviuke, va kulela, kaha tua patuka kuhitila mu ndando ya kupatula,* 31 linga cipue ngue mu vasoneka nguavo: “Uose alipamba, alipambe muli Yehova.”*