Kuli Vakua Loma
5 Ngeci mukemuo, mu kulinga va na tupuisa vakua vuviuke omo lia lutsilielo, tu likuuenu ciyulo na Njambi kuhitila muli Muangana uetu Yesu Kilistu. 2 Omo lia lutsilielo luetu muli Yesu, va natu sokoluela njila ya kutambula ngozi ya kama, ituli na kutambula mu ntsimbu ino. Tu viukililenu* omo lia lulavelelo lua kuka tambula vumpahu vua Njambi. 3 Kati ovio lika, vunoni tu viukililenu naua nga tuhita mu tuyando, muomu tua tantekeya nguetu, tuyando tuneha kukolesa, 4 na kukolesa ci lingisa tuye Njambi ku mutima, kuya Njambi ku mutima,* cineha lulavelelo, 5 kaha lulavelelo, kalu tu kolesa ntsoni, muomu cilemo ca Njambi va naci sulisa mu mitima yetu kuhitila mu sipilitu santu ize iva tu hanene.
6 Muomu ha ntsimbu ituapuile va kuzeya, Kilistu ua tsililile vakua vupi ha ntsimbu iva hangula. 7 Muomu ca cikalu kuuana muntu atava kutsila mukua vuoloke, vutuhu kuhasa kusoloka umo atava kutsila muntu ua cili. 8 Njambi natu soluela cilemo cendi, muomu Kilistu ua tu tsililile ntsimbu tele tu vakua vupi. 9 Ngeci mukemuo, mu kulinga va na tupuisa vakua vuviuke omo lia maninga a Yesu, tu na kulahela na mutima uose nguetu, tu kovoka ku vutenu vua Njambi kuhitila muli ikeye. 10 Muomu nga mu tuapuile vitozi tua lihambele na Njambi kuhitila mu kutsa ca Muanendi, kaha tua kulahela honi na mutima uose nguetu, mu kulinga tua lihamba laza na Njambi, tu kovoka omo lia muono ua Yesu. 11 Kati ovio lika, vunoni tu vuahelela naua muli Njambi, kuhitila muli Muangana uetu Yesu Kilistu, njila itu na lihambelamo na Njambi.
12 Mukemuo vene, vupi vua kovelele ha mavu kuhitila muli muntu umolika, na kutsa omo lia vupi. Omo liaco, kutsa ca lisanduoka ku vantu vose muomu vose va na lingi vupi —. 13 Muomu vupi ha vuakele hano ha mavu tele kanda kukale Masiko. Vunoni nga kakuesi masiko, naumo uahi iva tuika mulonga ua vupi. 14 Vutuhu ngoco, tunde hali Andama kuheta na hali Mosesa, kutsa ca sikile ngue muangana. Ca sikile vene na vaze ka va lingile vupi mu kutsiha lisiko ngeci mua Andama, uze ua lifua na uze iva lavelele nguavo akeza.
15 Vunoni vuana vua Njambi ku vua lifuile na vupi.* Muomu nga ha civulumuna ca muntu umolika vantu vavengi vanatsi, kaha ngozi ya kama ya Njambi na vuana vuendi, via tuhana kuhitila mu ngozi ya kama ya muntu umolika, Yesu Kilistu vene, vi na lisala* cikuma ku vantu vavengi! 16 Cikuavo naua, vuana vua Njambi na vupi vua muntu umolika vi na lisezela aha: kusompesa cezile mu nima ya civulumuna cimolika, capuile cihiso, vunoni vuana vuezile mu nima ya vivulumana viavingi, vua lingisile vavengi ku vapuisa vakua vuviuke. 17 Muomu nga kuhitila mu civulumuna ca muntu umolika, kutsa ca sikile ngue muangana, kaha vaze vaka tambula mu vuingi ngozi ya kama na vuana vua vuviuke, vaka yoya na kusika ngue vamiangana kuhitila muli muntu umolika, Yesu Kilistu vene!
18 Ngeci mukemuo, ngue omo civulumuna cimolika ca lingisa vantu vose vava hise, mukemuo naua, cilinga cimolika ca vuviuke, cilingisa vantu vose ku vapuisa vakua vuviuke linga vaka yoye. 19 Muomu ngue omo ha lisino lia muntu umolika, vantu vavengi vanapu vakua vupi. Mukemuo naua, omo lia kuononoka ca muntu umolika, vavengi va kapua vakua vuviuke. 20 Kaha Masiko ezile na kukalako linga ku vulumuna ci livuezelele. Vunoni kuze kua lanene vupi kukekuo kua lanene cikuma ngozi ya kama. 21 Omo lia vika? Linga ngue omo vupi vu na siki hamolika na kutsa ngue muangana, mukemuo naua, na ngozi ya kama isike ngue muangana kuhitila mu vuviuke vuze vutuala ku muono uaya-ye kuhitila muli Muangana uetu Yesu Kilistu.