Kuhitila Muli Yoano

6 Mu nima yevi, Yesu ua zavukile mu sinia lia Cisali ca Ngalileya, ni nguetu, mu Timbeliase. 2 Kaha mbunga ya tualeleho kumu kava, muomu va muene vitantekeyeso via ku komouesa viakele na kulinga, mu kukanguisa vakua kuvavala. 3 Ngeci Yesu ua kandukile ha muncinda, kaha uaka tumameneho na vandongesi vendi. 4 Cilika ca vaYundeya ci va tumbula nguavo Paskua, cakele muhiehi. 5 Omo Yesu uanduile meso, ua muene mbunga ya kama ili na kuiza kuli ikeye, ngeci uehuile Filipu nguendi: “Kuiko tu landa mbolo linga eyi mbunga ya kulie?” 6 Vunoni Yesu ua handekelemo mu kumueseka lika, muomu ua tantekeyele laza via tondele kulinga. 7 Kaha Filipu uamu kumbuluile nguendi: “Ambe nga tu lande mbolo ya 200,* ka ipumo, ambe nga muntu ku muntu alie kambaluvuila ka kandende.” 8 Umo ua vandongesi vendi, Anduleu, muanaye ya Simone Petulu, uamu lekele nguendi: 9 “Kuli umo kanike ua yala ali na vimbolo vitanu via sevanda na tuvantsi tuvali. Vunoni ku mbunga ya kupua aha, vika ni vene?”

10 Yesu ua handekele nguendi: “Lekenu mbunga itumame.” Mu kulinga kuze ku cihela kuakele muila uauingi, ngeci va tumameneho. Vapuile vamala va heta ku 5.000. 11 Yesu ua nonene ize mbolo, mu nima ya kuvundila,* ua ipangelele ku vose va tumamene kuze. Kaha ua lingilemo naua naku tuvantsi tua tundende, ngeci vose valile, vekutile. 12 Vunoni omo vekutile, Yesu ua lekele vandongesi vendi nguendi: “Kungululenu vivala-vala via salaho, linga kati ku vihie na vimo viahi.” 13 Ngeci va kunguluile visupo viose, na kusulisa vihele 12 na vivala-vala viva sezeleho vaze valile mbolo itanu ya sevanda.

14 Omo vantu va muene citantekeyeso ca lingile, va putukile kuhandeka nguavo: “Mua vusunga vene, ou ikeye Kapolofeto ivambele nguavo eza ha mavu.” 15 Yesu mua tantekeyele nguendi va tonda kua kumu kuata linga vamu puise muangana, ua tundile naua kuze na kuya ku muncinda likaliendi.

16 Ku cinguezi, vandongesi vendi va sikulukile ku cisali, 17 va kovelele mu vuato, kaha vakele na kuzavuka cisali mu kuya ku Kapenama. Ha ntsimbu eyi tele ku na zivala, vunoni Yesu tele kanda aci hiluke kuli vakevo. 18 Omo lia mpundzi ya kama ya keleko, mu cisali mua katukile mancimba. 19 Mu nima ya kuzavula vimo vikilometru 5 ni 6, va muene Yesu enda helu lia mema, ali na kuiza kuhiehi na vuato, ngeci vavuile liova. 20 Vunoni Yesu uava lekele nguendi: “Yange, kati muivue liova!” 21 Ngeci va tavele kumu kovelesa mu vuato, vunoni mu ntsimbu ya indende lika, vuato vua hetele ku ntunda, kuze ku vakele na kuya.

22 Lia mukuavo, mbunga ya salele mu sinia lia cisali ya nongonuene nguayo, ka kuakele naua vuato vukuavo, kuvanga lika vumo vua vundende mu va kovelele vandongesi, vunoni Yesu ka kovelelemo, muomu vandongesi vendi vaile likaliavo. 23 Vunoni mato a kutunda mu Timbeliase ahetele kuhiehi na cihela ci valile mbolo mu nima ya civundilo ca Muangana. 24 Omo mbunga ya muene ngecize ambe Yesu ni vandongesi vendi ka vakele kuze, ya kovelele mu mato avo na kuya ku Kapenama mu kutonda Yesu.

25 Mu vaka mu uanene mu sinia lia cisali, va muihuile nguavo: “Lambi, ntsimbu ika una hete kuno?” 26 Yesu uava kumbuluile nguendi: “Mua vusunga nji mileka nguange, ka muesi naku nji tonda omo lia vitantekeyeso vi mu na muene, vunoni omo lia mbolo imu na lile na kuikuta. 27 Kati mu pangele viakulia vize vie kunonga, vunoni pangelenu viakulia vize kavie kunonga vimi hana muono ka ue kuhua, via mi hana Muana muntu. Muomu Tata, vavenya Njambi, namu hana citantekeyeso ca muesa ngecize namu tava.”

28 Va muihuile nguavo: “Vika tua pande kulinga, linga tu pange vipanga via Njambi?” 29 Yesu uava kumbuluile nguendi: “Vipanga via Njambi vino: tsilielenu uze ya tumine.” 30 Va muihuile nguavo: “Citantekeyeso cika ulinga tuci mone naku kutsiliela? Cipanga cika ulinga? 31 Vakukuluila vetu valile manna mu likango, ngue mu va soneka nguavo: ‘Uava hele mbolo ya kutunda muilu linga valie.’” 32 Kaha Yesu uava lekele nguendi: “Mua vusunga nji mileka nguange, Mosesa ka mi hele mbolo ya kutunda muilu, vunoni Tata ami hana mbolo ya vusunga ya kutunda muilu. 33 Muomu mbolo ya Njambi, ikeye uze atunda muilu na kuhana muono ku vakua mavu.” 34 Ngeci vamu lekele nguavo: “Muangana, tu hane oyo mbolo ntsimbu yose.”

35 Yesu uava lekele nguendi: “Yange mbolo ya muono. Kaha uose eza kuli yange, ka kevu naua ndzala, na uze uose anji tsiliela ka katsi naua mpuila. 36 Vunoni ngue mu njina livangele ku mileka, vutuhu mu nanji mono, vunoni ka muesi na kutsiliela. 37 Vose vaze Tata anji hana, veza kuli yange, kaha ka njika mbila kuti uose eza kuli yange. 38 Muomu nja tundile muilu, linga nja ku linge cizango ca uze uanji tumine, kati cizango cange. 39 Eci cikeco cizango ca uze uanji tumine, nguendi kati nji zimbalese naumo uahi hali vaze va anji hana, vunoni nguendi njika va sangule ha litangua lia ku manusuila. 40 Muomu eci cikeco cizango ca Tata, nguendi uose anongonona Muana naku mu tsiliela, a uane muono ka ue kuhua, kaha njika mu sangula ha litangua lia ku manusuila.”

41 Ngeci vaYundeya va putukile ku litatuokela, muomu ua handekele nguendi: “Yange mbolo ya kutunda muilu.” 42 Kaha va putukile kuhandeka nguavo: “Ou kati ikeye Yesu muana Yosefe? Ise na naye kati tu va tantekeya? Amba vati ahandeka nguendi, ‘Yange nji na tundu muilu’?” 43 Ngeci Yesu uava kumbuluile nguendi: “Kati mu litatuokele. 44 Na umo uahi eza kuli yange kuvanga Tata uze uanji tumine amu koke, kaha njika mu sangula ha litangua lia ku manusuila. 45 Muomu va soneka ku Vapolofeto nguavo: ‘Vose vaka va longesa kuli Yehova.’* Uose ahalakana Tata naku lilongesa kuli ikeye, eza kuli yange. 46 Naumo uahi ua monaho Tata, kuvanga lika uze ua tunda kuli Njambi. Ou ikeye ua mona Tata. 47 Nji mileka vusunga nguange, uze atsiliela, ali na muono ka ue kuhua.

48 “Yange mbolo ya muono. 49 Vakukuluila venu valile manna mu likango vunoni vatsile. 50 Eyi ikeyo mbolo ya kutunda muilu, linga uose alia ku mbolo yaco, kati atse. 51 Yange mbolo ya muono itunda muilu. Kaha uose alia ku mbolo yaco aka yoya miaka yose. Mua vusunga, mbolo inji mi hana inapu ntsintu yange vene ize ihana muono ku vakua mavu.”

52 Ngeci vaYundeya va putukile kulihoya hakati kavo nguavo: “Vati ou yala atu hana ntsitu yendi linga tulie?” 53 Ngeci Yesu uava lekele nguendi: “Mua vusunga nji mileka nguange, kuvanga munali ntsitu ya Muana muntu na kunua maninga endi, kati ngoco ka muka uana muono.* 54 Uose alia ntsitu yange na kunua maninga ange, aka kala na muono ka ue kuhua, kaha njika mu sangula ha litangua lia ku manusuila. 55 Muomu ntsitu yange ikeyo viakulia via vusunga, na maninga ange akeo viakunua via vusunga. 56 Uose alia ntsitu yange na kunua maninga ange, atualelaho kulikata nange, kaha nange njika likata nendi. 57 Ngue omo Tata ayoya uanji tumine nange nji yoya omo lia Tata. Na vuno vene, uose alia ntsitu yange aka yoya omo liange. 58 Eyi ikeyo mbolo ya tunda muilu. Kati ngue ize iva lile vakukuluila venu kaha vatsile. Uose alia eyi mbolo aka yoya miaka yose.” 59 Yesu ua handekele evi viuma muakele na kulongesa mu sinangonga, mu Kapenama.

60 Vandongesi vendi vavengi mu vavuile ngoco, va handekele nguavo: “Aa mezi a akalu. Iya ahasa ku ahalakana?” 61 Yesu mua nongonuene nguendi vandongesi vendi vali naku linienieta omo lia mezi a handekele, ua vehuile nguendi: “Nkuma aa mezi ana mi suntsuisa? 62 Amba co nga mu mona Muana muntu alonda mu kuhiluka kuze kuakele ha katete? 63 Sipilitu ikeyo ihana muono, ntsitu ka isilivila. Mezi anji na mileka akeo sipilitu kaha akeo muono. 64 Vunoni hakati kenu hali vamo ka va tsiliela.” Muomu tunde ha katete, Yesu ua tantekeyele vaze ka va tsilielele na uze aka muenda vungungu. 65 Ua handekele naua nguendi: “Ngeci njina mi lekele nguange, naumo uahi ahasa kuiza kuli yange, kuvanga Tata amu tavesa.”

66 Omo liaco, vandongesi vendi vavengi vamu sile naku hilukila ku viuma viva sile ku nima, kaha va likelele vene na kuenda nendi. 67 Ngeci Yesu uehuile vaze 12 nguendi: “Nenu mu tonda kuya?” 68 Simone Petulu uamu kumbuluile nguendi: “Muangana, kuli iya tuya? Yove uli na mezi a muono ka ue kuhua. 69 Yetu tu tsiliela kaha tua tantekeya nguetu yove Mukua Kulela ua Njambi.” 70 Yesu uava kumbuluile nguendi: “Nja mi hanguile mu va 12 ni vati? Vunoni umo uenu napu mukua visaki.”* 71 Yesu uakele na kuhandeka via Yundasa muana Simone Iskaliota, muomu ikeye ue ku muendele vungungu, vutuhu uapuile umo ua vaze 12.