Kuhitila Muli Mako
10 Yesu mua tundile kuze, uaile ku vinginga via Yundeya mu sinia lia Yondau, kaha vantu va likunguluile naua kuli ikeye. Ngeci ua putukile ku va longesa ngue muakele na kulinga ntsimbu yose. 2 Kaha vaFaliseu vezile kuli ikeye na vutumbe vua ku mueseka, ngeci va muihuile nga citava yala akondole mpueyendi. 3 Ngeci ua vehuile nguendi: “Vika uami sikile Mosesa?” 4 Vamu kumbuluile nguavo: “Mosesa ua tavesele nguendi, yala citava asonekele mpueyendi mukanda ua kukondola linga atsihe vulo.” 5 Vunoni Yesu uava kumbuluile nguendi: “Omo lia kukaluua ca mitima yenu, ngeci ua mi sonekelele eli lisiko. 6 Vunoni tunde ku vuputukilo vua kutanga ca viuma viose, ‘Uava tangele yala na mpuevo. 7 Ngoco vene, yala aka seza ise na naye, 8 kaha ava vavali va kapua ntsitu imolika,’ kavapu naua vavali vunoni ntsitu imolika. 9 Ngeci mukemuo, cose ca na pandakana Njambi, muntu kati aci hangunune.” 10 Mu vakele mu ndzivo, vandongesi vendi va muihuile naua kutuala ha cimpande caco. 11 Uava kumbuluile nguendi: “Uose akondola mpueyendi kaha ambata mpuevo ueka, enda vukoyi* mpueyendi, 12 kaha nga mpuevo aseza yaliendi naku ka somboka kueka, alinga vukoyi.”
13 Vantu va putukile kumu nehela vanike vavandende linga a vakuate,* vunoni vandongesi vava vindikile. 14 Yesu mua vi muene, ua nyenguele ngeci uava lekele nguendi: “Ecelenu vanike vavandende veze kuli yange, kati mu va vindike muomu Vuangana vua Njambi vunapu vua vaze vafua ngeci muavo. 15 Nji mileka vusunga nguange, uose ka tambula Vuangana vua Njambi ngeci mua kanike* ua mundende, kaka kovelamo.” 16 Ngeci ua hakele vanike ha mavoko endi, naku va vezikisa muku va saleka mavoko.
17 Kaha Yesu muakele na kuya, umo yala uamu tuntilile, uaka mu tsikamenene naku muihula nguendi: “Mulongisi ua cili, vika nja pande kulinga njika uane muono ka ue kuhua?” 18 Yesu uamu kumbuluile nguendi: “Vika unji sanena ua cili? Naumo uahi ua cili, kuvanga lika Njambi. 19 Utantekeya laza ano masiko nguavo: ‘Kati utsihe muntu, kati ulinge vukoyi,* kati upunde, kati uhane vukaleho vua visaki, kati ukale na lizangamena, singimika iso na noko.’” 20 Uze yala uamu kumbuluile nguendi: “Mulongisi, aa masiko ose nje kuaniunga tunde ku vunike vuange.” 21 Yesu uamu talele kaha uamu lemene, ngeci uamu lekele nguendi: “Kuli lika cuma cimo ci na kukambela. Ya ka landese viuli navio, na kuhana vimbongo viaco ku vihutu kaha uka kala na vupite muilu. Mu nima yaco tuaya ua kunji kave.” 22 Vunoni muavuile cikumbululo ca Yesu ua luvalele, ngeci uaile muomu uakele na vupite vua vuingi.
23 Kaha omo Yesu ua talele noku-noku, ua lekele vandongesi vendi nguendi: “Mua vusunga ci kapua ca cikalu kuli vakua vimbongo kukovela mu Vuangana vua Njambi!” 24 Vunoni vandongesi va likomokelele omo lia mezi endi. Ngeci Yesu uava lekele nguendi: “Vana vange, ca cikalu vene kukovela mu Vuangana vua Njambi! 25 Cacasi kuli kamelu kuhita mu liso lia nguya, kuhiana mpite akovele mu Vuangana vua Njambi.” 26 Ngeci va likomokelele honi mua kama naku mu leka nguavo: “Amba iya honi ahasa kuovoka?” 27 Yesu uava talele sui naku va leka nguendi: “Evi via vikalu ku vantu vunoni kati kuli Njambi, muomu kuli Njambi viuma viose viapua viaviasi.” 28 Petulu ua putukile ku muleka nguendi: “Tala! Yetu tua seza viuma viose naku kukava.” 29 Yesu ua handekele nguendi: “Nji mileka vusunga nguange, naumo uahi na seza ndzivo, cipue vamuanaye va vampuevo ni va vamala, cipue naye ni ise, cipue vana, cipue mehia omo liange, nomo lia muzimbu ua cili, 30 uze kaka tambuilaho viuma vikuavo via ku tuvakana 100 mu ntsimbu ino, vindzivo, vamuanaye va vamala nava vampuevo, vanaye, vana, mehia hamo na tuyando kaha kulutue, muono ka ue kuhua ua yaye. 31 Vunoni vavengi vaze va livanga, va kapua va ku manusuila kaha va ku manusuila va kapua va kulivanga.”
32 Mu vakele na kukanduka mu njila ya kuya ku Yelusalema, Yesu ua tuamene kulutue luavo kaha va likomokelele mua kama, vunoni vaze vakele naku vakava mu nima vavuile liova. Kaha ua sanene naua vaze 12 ku mukulo na kuputuka ku va leka viuma vi ka lingika kutuala hali ikeye nguendi: 33 “Halakanenu! Tuli na kuya ku Yelusalema, vunoni Muana muntu vaka mu hana mu mavoko a vakuluntu va vasasendote na kuli vakua kusoneka. Vaka mu sompesa naku mu tomena kutsa. Kaha vaka mu hana mu mavoko a vakua vifuti, 34 vaka mu tsopa, kumu zekuila mate, kumu veta makote, naku mu tsiha, vunoni mu nima ya matangua atatu aka sanguka.”
35 Tiango na Yoano vana va Sembendeu, va suenene kuli Yesu naku mu leka nguavo: “Mulongisi, tu tonda utu lingile viose vi tu kupinga.” 36 Ngeci ua vehuile nguendi: “Mu tonda nji mi lingile vika?” 37 Vamu kumbuluile nguavo: “Tu tavese tu ka tumame umo ku livoko liove lia cilio, mukuavo ku livoko liove lia cimosue mu vumpahu vuove.” 38 Vunoni Yesu uava kumbuluile nguendi: “Kamu tantekeya viuma vimuli na kupinga. Vuno mu hasa kunua ngandza injili na kunua? Ni kumi mbatiza na mbatizimu ivali na kunji mbatiza?” 39 Kaha vakevo va kumbuluile nguavo: “Eyo tuhasa.” Ngeci Yesu uava lekele nguendi: “Mu hasa kunua ku ngandza injili na kunua naku mi mbatiza na mbatizimu ivali na kunji mbatiza. 40 Vunoni via kutumama ku livoko liange lia cilio neli lia cimosue, ka viakele ku ndzili yange. Vihela viaco, vinapu via vaze vava na vi viukisila.”
41 Ngeci vandongesi vakuavo 10, mu vavuile ngoco, va nyenguelele cikuma Tiango na Yoano. 42 Vunoni Yesu uava sanene naku va leka nguendi: “Yenu mu tantekeya nguenu, vaze vave kupuisa vamiangana va vakua vifuti, ve kutumina vakua vifuti muku va zangamena, kaha vakua vukama vakala na mpoko hali vakevo. 43 Vunoni yenu ka mua pandele kufua ngoco, muomu uose atonda kupua ua kama hakati kenu, na pande kupua mukua kumi pangela, 44 kaha uose atonda kupua ua kulivanga hakati kenu, na pande kupua ngamba ya vose. 45 Muomu ambe vene Muana muntu, kezile mu kumu pangela, vunoni uezile mu kupangela vantu, na kuhana muono uendi, mu kupua ndando* linga apatule vavengi.”
46 Kaha va kovelele mu Yeliko. Vunoni muakele na kutunda mu Yeliko hamo na vandongesi vendi na mbunga ya kama, ku mukulo ua njila kua tumamene umo kapuputa mukua kupinga vuana, lizina liendi Mbalatimeu, (muana Timeu). 47 Omo uavuile nguavo, Yesu Mukua Nazaleta ikeye ali na kuhita, ua putukile kutambeka nguendi: “Yesu Muana Ndaviti, nji vuileko cikeketima!” 48 Vunoni mbunga muya vuile ngoco, ya putukile kumu tenukila linga aholoke. Vunoni ikeye ua vuezeleko lizi naku tambakana nguendi: “Muana Ndaviti, nji vuileko cikeketima” 49 Ngeci Yesu uemanene naku va leka nguendi: “Mu sanenu eze kuno.” Kaha vaka mu sanene, naku mu leka nguavo: “Simpa! Katuka, Yesu ali naku kusana.” 50 Kaha uombilile vuzalo vuendi vua helu, ua katukile vuasi-vuasi na kuya kuli Yesu. 51 Ngeci Yesu ua muihuile nguendi: “Utonda nji kulingile vika?” Uze kapuputa ua kumbuluile nguendi: “Lamboni* tonesa meso ange.” 52 Kaha Yesu uamu lekele nguendi: “Yauye. Lutsilielo luove lua kukanguisa.” Haze vene, uze kapuputa ua putukile kumona, ngeci ua putukile kumu kava mu njila.