Mukanda ua Tiango
4 Haka he kutunda vindzita na luozi vili hakati kenu? Kati vie kutunda ku masungu enu a ntsitu, aze ali naku tualelaho kuliluisa mu mitima yenu ni? 2 Muli na kusunguiya viuma, vunoni kamuesi naku vi uana. Muli naku tualelaho kutsiha vantu naku liveyela viambala, vunoni kamuesi naku vi uana. Muli naku tualelaho kulipupa na kulua ndzita, vunoni kamuesi navio, muomu ka mua vi vundilile. 3 Mu mue kuvundila ka mue kutambula, muomu mue kuvundila na vutumbe vua kuvihia linga muvi vihisile ku masungu enu a ntsitu.
4 Enu vikoyi, vuno ka mu tantekeya nguenu kulikuata vusamba na mavu capua kulipuisa citozi ca Njambi ni? Uose atonda kupua kavusamba ka mavu, alipuisa citozi ca Njambi. 5 Ni mu singanieka nguenu visoneka via handeka ngoco mu via tumbula nguavio: “Mutima* ua cipululu u tuakala nauo, uli naku tualelaho kusunguiya viuma via kuliseza-seza ni”? 6 Vunoni ngozi ya kama ye ku tumuesa Njambi ya hiana. Ngeci visoneka via handeka nguavio: “Njambi ua zinda vakua ku lihalesa, vunoni ue kumuesa ngozi ya kama kuli vakua ku likehesa.”
7 Liononuesenu kuli Njambi, vunoni limikenu na Ndiavu, kaha aka mi tina. 8 Suenenu kuli Njambi, kaha nendi aka suena kuli yenu. Enu vakua vupi, lelesenu mavoko enu kaha lelesenu mitima yenu enu vakua mitima ivali. 9 Ivuenu vusiua, linyengenu na kulila. Vizolo vienu vihimpuke kulila kaha ndzolela yenu ihimpuke vusiua. 10 Likehesenu ku meso a Yehova,* kaha ikeye aka mihaka ku vukama.
11 Vamuanetu, likelenu ku lihandeka mua kuvihia umo na mukuavo. Uose ahandeka mua kuvihia muanaye ni kumu hisa, ali na kuhandeka mua kuvihia masiko kaha ali na kuhisa masiko. Kaha nga uhisa masiko kauesi na kuononoka masiko, vunoni ungazi. 12 Kuakala lika Mukua Kutumbika Masiko umolika, na Ngazi umolika, ikeye lika ahasa kuovola na kunongesa. Vunoni ove, yove iya amba uhise mukuenu?
13 Hano honi, halakanenu enu mue kuhandeka nguenu: “Lelo ni imene, tuya ku mbonge ya cingandi, tuka kalako muaka ua mutuntu na kulinga mingoso kaha tu kapupa vimbongo,” 14 vunoni kamu tantekeya vati ukafua muono uenu imene. Muomu munapu ngue mbundu ize isoloka mu kantsimbu kakandende lika kaha izimangana. 15 Vunoni mua pande kuhandeka nguenu: “Nga Yehova na tava, tu tualelaho kuyoya kaha tu kalinga vingandi na vingandi.” 16 Vunoni enu mua tonda cikuma ku lihalesa na kulipamba. Eci kulipamba cose ca kuvihia. 17 Ngeci mukemuo, nga muntu atantekeya kulinga via cili vunoni kavilingi, ali na kulinga vupi.