Kuli Vakua Loma
11 Ngeci njihula naua nguange, vuno Njambi ua vianene vantu vendi? Houe! Muomu nange nji kaIsaleli, nji mbuto ya Avilahama, kaha nji mukua cikota ca Mbenjamini. 2 Njambi ka vianene vantu vendi vaze va alivangele kuhangula. Vuno kamu tantekeya vi via handeka visoneka kutuala hali Eliya, mua lambelele Njambi kutuala hali vaIsaleli ni? 3 Ua handekele nguendi: “Yehova,* va na tsihi vapolofeto vove, va na nongesa mitula yove, yange lika nja lisupuho, vuno nange honi va tonda kunji tsiha.” 4 Amba vati Njambi uamu kumbuluile? Uamu lekele nguendi: “Nji cili na vantu 7.000 vaze ka va tsikamenene Mbale.” 5 Na vuno vene, ku ntsimbu ino, ku cili vamo va na lisupuho vaze vava hanguile omo lia ngozi ya kama. 6 Ngeci mukemuo, nga va nava hangula omo lia ngozi ya kama, ca lumbunuka kati naua omo lia vipanga viavo. Kati ngoco, ngozi ya kama ka tu itumbula naua nguetu ngozi ya kama.
7 Vika honi tuhandeka? Nguetu viuma viva tondele cikuma vaIsaleli kava hasele ku viuana, vunoni vaze lika vava na hangulaho vakevo va na viuana. Vakuavo co va kaluuisile mitima yavo. 8 Ngue mu vasoneka nguavo: “Njambi na va lingisa va kose tulo* tua kama, meso avo ahonoue kumona na matuitui avo kati evue, kuheta na kalelo.” 9 Cikuavo naua, Ndaviti ua handekele nguendi: “Mesa yavo ipue ngandzo na ciliva, na cisuntsuiso kaha na cihiso mu kupua fueto ya vapande. 10 Meso avo azivale linga kati vamone, kaha lingisa miongo yavo ikotame ntsimbu yose.”
11 Ngeci njihulako nguange, Vuno vaIsaleli va suntsukile na kuua mpundu ca kuhona kukatuka ni? Houe, na kumo kuahi! Vunoni kusevuka cavo ca neha kuovoka kuli vakua vifuti, kaha ca kokela vaIsaleli lifuua. 12 Nga kusevuka cavo cinapu vupite kuli vakua mavu, naku tepuluka cavo ci na nehela vupite vakua vifuti, kaha mbunga yavo yose mu ika likungulula, vupite vu ka livuezelela cikuma!
13 Hano honi, nji handeka nenu muapua vakua vifuti. Mu kulinga ange nji kapostolo ua vakua vifuti, nji zumbangeya* vipanga viange, 14 linga njimone nga njihasa kuvuisa lifuua vantu vange, na kuovolako vamo hakati kavo. 15 Nga ku va viana ca lingisa vakua mavu va lihambe na Njambi, amba vati cikafua ku va tambula? Cikafua ngue ku va sangula ku vatsi. 16 Cikuavo naua, nga mutamba ua mukamo unapu ngue vusuka vua kulivanga, ua kulela, mukamo uose unapu ua kulela. Kaha nga muzi ua muti unapu ua kulela, na mintango nayo inapu ya kulela.
17 Imo mintango ya ku muti ua olivela va ipakuileko, ikuavo ya salele. Vunoni ove vutuhu ua tundile ku muti ua olivela uamu musenge, va na kunungila ku muti uaco, linga ukale hakati ka mintango ize ya saleleko. Ngeci mukemuo, nove uli na kulia ku vupite vua muzi ua muti ua olivela. 18 Kati usinganieke nguove u ua seho ku tuvakana mintango ikuavo. Muomu nga usinganieka nguove u ua seho ku tuvakana ikeyo, vuluka nguove kati yove una kuata muzi, vunoni muzi ukeuo una kukuata. 19 Kaha uhandeka nguove: “Imo mintango va ipakuile linga va nungileko yange.” 20 Mukemuo vene! Va ipakuileko muomu ka vakele na lutsilielo, vunoni ove unemana omo lia lutsilielo luove. Ngeci kati ulihalese, vunoni kala na liova. 21 Muomu nga Njambi ka tetelele mintango ya ku muti uaco mpundu, nove naua kaka kutetela. 22 Ngeci mukemuo, singanieka ha ngozi na vutenu vua Njambi. Vaze vauile, vamuene vutenu vuendi vunoni ove Njambi ali naku kumuesa ngozi, ca kama lika nga utualelaho mu ngozi yendi, kati ngoco, nove naua aka ku pakulako. 23 Navo naua nga vakala na lutsilielo, aka va nungilako, muomu Njambi ahasa ku va nungilako lueka. 24 Muomu nga ove iva tetele ku muti ua olivela uamu musenge, va hasele ku kunungila ku muti ua olivela ua kutombeka, vutuhu ka capuile cizilila, mua vusunga cikapua cacasi kuhiluisa mintango iva pakuile ku muti ua olivela ua kukuna naku inungila naua lueka ku muti uayo mpundu!
25 Ngeci mukemuo vamuanetu, nji tonda mu tantekeye eli lihungu lia kulela, linga kati mu limone enu vavenya nguenu muapua vakua mana: Vamo vaIsaleli vali naku tualelaho ku kaluuisa mitima yavo, noho ha ika puilamo mbunga yose ya vakua vifuti. 26 Kaha mu njila eyi, vaIsaleli vose va kovoka. Ngue mu vasoneka nguavo: “Muovole aka tundilila ku Siono na kutundisa vilinga via kuvihia ku vana va Yakomba. 27 Kaha eli likelio litavasiano li njika linga navo mu njika tundisa vupi vuavo.” 28 Cili vene, kutuala ha muzimbu ua cili, vakevo vanapu vitozi kaha evi vi nami kuasa. Vunoni Njambi uava hanguile naku va lema omo lia vakukuluila vavo. 29 Muomu Njambi kaka liveye kutuala ha vuana vua hana, na vantu vaze va ana sana. 30 Ngue omo ku laza enu muapuile vakua lisino kuli Njambi, vunoni hano nami muesa nkeke omo lia lisino liavo, 31 na vuno vene, lisino liavo lia lingisa va mi muese nkeke, linga navo vaka va muese nkeke. 32 Muomu Njambi na lingisa vose vapue vindzinda va lisino, linga vose aka va muese nkeke.
33 Naana! Vupite vua Njambi na mana endi, na mangana endi, viapua via kulova cikuma! Iya ahasa kuivuisisa kusompesa cendi? Iya ahasa kuivuisisa vinjila viendi? 34 Muomu “Iya na tantekeya visinganieka via Yehova, cipue iya napu mukua kumu mamuna?” 35 Ni “Iya ua livangele kumu hana cimo cuma, linga amu hiluisileco?” 36 Muomu viuma viose via tunda kuli ikeye, kaha viliko omo liendi, nomo lia kupuisamo cizango cendi. Kuli ikeye kukale vumpahu ku miaka yose. Ame.