Ua Kulivanga Kuli Vakua Kolintu
3 Ngeci mukemuo vamuanetu, kanja hasele kuhandeka nenu ngue vantu vaye ku tuamenena sipilitu, vunoni nja handekele nenu ngue vantu vaku ntsitu, ngue vene tukeke muli Kilistu. 2 Nja mihele mavele kati viakulia via kukola, muomu tele kanda mu kanyame, ambe hano vene kanda muci kanyame, 3 kasi mu vantu vaku ntsitu. Mu kulinga hakati kenu kasi hali cipululu na luozi, vuno kati mu vantu vaku ntsitu ni? Vuno kamuesi na kuyoya ngue mu vali na kuyoya vakua mavu ni? 4 Muomu nga umo ahandeka nguendi: “Ange nji ua Paulu,” kaha mukuavo nguendi: “Ange nji ua Apolo,” vuno kamuesi na kulinga ngue mu ve kulinga vakua mavu ni?
5 Apolo, ikeye iya nkuma? Ambe Paulu, ikeye iya? Etu tu vangamba lika vaze vami kuasele mupue vakua kutsiliela, tua lingile lika cipanga ca tuhele Muangana. 6 Ange nja kunine mbuto, Apolo ua itukumuinine, vunoni Njambi ikeye ua ikolesele. 7 Linga kati va sangaziale uze akuna cipue mukua ku tukumuina, vunoni va sangaziale Njambi mukua ku ikolesa. 8 Ngeci mukemuo, uze akuna nauze atukumuina, vanapu mumo.* Vunoni muntu ku muntu aka tambula fueto yendi, kuliya na vipangi viendi. 9 Muomu tuli na kupanga hamolika na Njambi. Enu munapu lihia lia Njambi lize liali na kulima, na ndzivo ya Njambi yali na kutunga.
10 Kuliya na ngozi ya kama ya Njambi iva nji muesele, nja pangele luvula ngue mukua kutunga ua vutongue, vunoni muntu ueka ali naku tungilaho. Ngeci mukemuo, muntu ku muntu atuale mana ku cifua cali naku tungilaho. 11 Muomu naumo uahi, ahasa kutunga luvula lueka, kuvanga lika luze luva na tungu laza, lukeluo Yesu Kilistu vene. 12 Vunoni nga umo atungila ha luvula luaco, mu kupangesa olu, palata, mavue a seho, miti, muila ni visati, 13 cipanga ca muntu ku muntu ci ka lisolola, muomu litangua li ka ci solola kuhitila mu tuhia, kaha tuhia tu ka muesa ha toma tungisi ya muntu ku muntu. 14 Nga cipanga ca na tungila muntu ha luvula ci tualelaho, aka tambula fueto. 15 Nga cipanga ca muntu umo ciuema, kaha na vindama, vunoni ikeye ovoka. Vutuhu ngoco, cikapua lika ngue novoka ku tuhia.
16 Vuno kamu tantekeya nguenu muapua tembele ya Njambi, kaha sipilitu ya Njambi yakala muli yenu ni? 17 Nga umo anongesa tembele ya Njambi, Njambi aka mu nongesa. Muomu tembele ya Njambi yapua ya kulela, kaha yenu vene muapua tembele yaco.
18 Naumo uahi alikuise ikeye vavenya. Nga umo hakati kenu asinganieka nguendi uapua mukua mana mu miaka ino,* alipuise ciheve, linga apue mukua mana. 19 Muomu mana a mavu ano, anapu vuheve kuli Njambi, muomu vasoneka nguavo: “Aka kuata vakua mana ku kuzangama cavo.” 20 Kaha naua nguavo: “Yehova* atantekeya nguendi visinganieka via vakua mana viapua via ngoco.” 21 Ngeci mukemuo, naumo uahi napande ku lipambela ha vantu, muomu viuma viose vinapu vienu, 22 Ambe Paulu, ni Apolo, cipue Kefasi,* cipue mavu, cipue muono, cipue kutsa ni viuma vikeza kulutue, viose viapua vienu. 23 Enu muapua va Kilistu. Kaha Kilistu uapua ua Njambi.