Kuhitila Muli Yoano
16 “Njina mileka viuma evi linga kati mu suntsuke. 2 Vantu vaka mi sekula mu visinangonga. Mua vusunga vene, ola ili na kuiza, omo uose aka mi tsiha aka singanieka nguendi ali na kulingila Njambi cipanga ca kulela. 3 Vunoni vaka linga evi viuma muomu ka va tantekeya Tata ambe yange. 4 Vutuhu ngoco, njina mileka evi viuma linga mu ika heta ntsimbu yavio, muka vuluke nguenu nja mi lekelevio.
“Ha katete kanja mi lekelevio, muomu tele njicili nenu. 5 Vunoni hano honi njiya kuli Uze uanji tumine. Vutuhu ngoco, naumo uahi hakati kenu anji hula nguendi, ‘Kuiko uya?’ 6 Vunoni muomu njina mileka evi viuma, mitima yenu ina sulu na vusiua. 7 Vutuhu ngoco, nji mileka vusunga nguange, kuya cange ci mi nehela via cili. Muomu nga ka njiyi, mukuasi keza kuli yenu. Vunoni nga njiya, njika mi tumisaye. 8 Kaha omo akeza, aka hana vakua mavu vukaleho vua kusula, kutuala ha vupi, ha vuviuke na ha kuhisa: 9 ha katete kutuala ha vupi, muomu kavesi naku nji tsiliela. 10 Kutundaho aka hana vukaleho kutuala ha vuviuke, muomu njili na kuya kuli Tata kaha ka muka nji mono naua. 11 Kaha naua vukaleho kutuala ha cihiso, muomu mukua kusika ano mavu va namu hisa laza.
12 “Njicili na viavingi via ku mileka, vunoni mu ntsimbu ino ka muhasa ku vivuisisa. 13 Vunoni mua keza ikeye,* sipilitu ya vusunga vene, aka mi tuamenena mu vusunga vuose, muomu kaka handeka viendi vavenya, vunoni aka handeka vize via kevua, naku miambuluila vize vi ka soloka ku lutue. 14 Ou ikeye aka nji hana vumpahu, muomu aka tambula viange naku miambuluilavio. 15 Viose via ali navio Tata vinapu viange. Ngeci njina handeka nguange, aka tambula viange naku miambuluilavio. 16 Vuovuno ka munji mono naua, kaha vuovuno munji mona naua.”
17 Omo liaco, vamo vandongesi vendi va lihandekesele hakati kavo nguavo: “Vika alumbunuka aa mezi, ‘Vuovuno ka munji mono naua, kaha vuovuno munji mona naua’? Cikuavo naua nguendi, ‘Njiya kuli Tata’?” 18 Kaha va handekele nguavo: “Vika alumbunuka aa mezi, ‘Vuovuno’? Ka tu tantekeya viali na kuhandeka.” 19 Yesu ua tantekeyele nguendi va tonda ku muihula, ngeci uava lekele nguendi: “Nkuma muli na kulihula hakati kenu muomu njina mileka nguange: ‘Vuovuno ka munji mono naua, kaha vuovuno munji mona naua?’ 20 Nji mileka vusunga nguange, yenu muka lila na kulinyenga, vunoni vakua mavu vaka viukilila. Mu kakala na vusiua, vunoni vusiua vuenu vuka himpuka ndzolela. 21 Mpuevo nga asulumuna, ue kumona kayando, muomu ntsimbu yendi ina hete. Vunoni nga na sulumuna, ke kuvuluka naua kaze kayando, muomu aviukilila nguendi muntu na semuka ha mavu. 22 Na vuno vene, mu ntsimbu ino nenu muli mu vusiua. Vunoni njika mi mona naua kaha mitima yenu ika viukilila. Naumo uahi aka mi tundisa ndzolela yenu. 23 Ha litangua lize, ka muka njihula na vimo viahi. Nji mileka vusunga nguange, nga muka vundila kuli Tata cuma cose-oco mu lizina liange, aka mi hanaco. 24 Tunde ku nima na kalelo, ka mua vundilileho na vimo viahi mu lizina liange. Vundilenu kaha mu tambula, linga ndzolela yenu ipuemo.
25 “Njina handeka nenu evi viuma kuhitila mu vimueso.* Ola ili na kuiza omo ka njika handeka nenu naua mu kupangesa vimueso, vunoni njika mileka via Tata mu mezi a asi. 26 Ha litangua lize, muka vundila kuli Tata mu lizina liange. Mu kuhandeka ngoco, ka ca lumbunukile nguavo njikapua naku mi vundililako kuli Tata. 27 Vavenya Tata uami lema, muomu nenu mua nji lema kaha mua tsiliela nguenu njezile mu kuimanenako* Tata. 28 Njezile mu kuimanenako Tata kaha njezile ha mavu. Hano njili na kuseza mavu na kuya kuli Tata.”
29 Vandongesi vendi va handekele nguavo: “Eua! Hano honi uli na kuhandeka netu mu mezi a asi, kauesi na kupangesa vimueso.* 30 Tua tantekeya honi nguetu yove utantekeya viuma viose kaha ka citondeka ku kuihula na vimo viahi. Ngeci mukemuo, tuna tsiliela nguetu yove ua tundile kuli Njambi.” 31 Yesu uava kumbuluile nguendi: “Nkuma muna tsiliela honi? 32 Halakanenu! Ola ili na kuiza, kaha mua vusunga ineza laza, omo mu vose muka lisanduoka muntu ku muntu ku ndzivo yendi naku nji seza likaliange. Vunoni kanjesi likaliange, muomu Tata ali nange. 33 Njina mileka evi viuma, linga mukale na ciyulo kuhitila muli yange. Mu mavu mu mona lamba, vunoni simpenu! Yange njina vulu mavu.”