Ua Kulivanga ua Yoano
3 Talenu cilemo ca kama ca natu muesa Tata linga tuhete ha ku tusana vana va Njambi! Kaha cili vene tu vana vendi. Ngeci vakua mavu ka vatu tantekeya, muomu ka vamu tantekeya. 2 Vakua cilemo cange, hano tunapu honi vana va Njambi, vunoni kanda vaci tu soluele mu tukafua. Tu tantekeya nguetu mua ka soloka, tukafua ngeci muendi, muomu tuka mona mpundu muafua. 3 Kaha uose ali nolu lulavelelo muli ikeye, alilelesa vavenya ngue omo ikeye uapua ua kulela.
4 Uose ue kulinga vupi, ue kupokola naua masiko, muomu vupi vuapua kupokola masiko. 5 Mu tantekeya naua nguenu, ua solokele linga a tundise vupi vuetu, kaha muli ikeye ka muakele vupi. 6 Uose atualelaho kulikata nendi ke kulinga vupi. Vunoni uze atualelaho kulinga vupi, kanda aci mu mone cipue kumu tantekeya. 7 Tuana tuange, kati mu tave naumo uahi ku mi hungumuna. Uze ue kulinga vuoloke, uapua mukua vuoloke, ngue omo ikeye uapua mukua vuoloke. 8 Uose ueku tualelaho kulinga vupi, uaku mutamba ua Ndiavu, muomu Ndiavu ue kulinga vupi tunde ha katete.* Omo liaco, va soluele Muana Njambi linga anongese vipanga via Ndiavu.
9 Uose na semuka kuli Njambi ke kulinga vupi, muomu mbuto* ya Njambi itualelaho muli ikeye, kaha ka citava alinge vupi muomu na semuka kuli Njambi. 10 Vana va Njambi na vana va Ndiavu, tu va tantekeyela ha vusunga ovu: Uose ke kulinga vuoloke kati mukua Njambi, ambe vene uze ka lemene muanaye. 11 Muomu ou ukeuo muzimbu umua vuile tunde ha katete nguavo, tua pande kulilema umo na mukuavo, 12 kati ngeci mua Kaini uze uapuile ua kuli mukua vupi, kaha ua tsihile ntsongo yendi. Vika uamu tsihilile? Muomu vipanga viendi viapuile via kuvihia, vunoni via ntsongo yendi viapuile via vuviuke.
13 Vamuanetu, kati mu likomokele nga vakua mavu va mizinda. 14 Tua tantekeya nguetu tua tundu ku kutsa, na kuya ku muono muomu tua lema vamuanetu. Uose kaleme vamuanaye, atualelaho mu kutsa. 15 Uose azinda muanaye uapua mukua kutsiha,* kaha mua tantekeya nguenu uose mukua kutsiha, kaka uana muono ka ue kuhua. 16 Tua tantekeya mpundu cilemo, omo Yesu uahele muono uendi omo lietu, ngeci netu naua tua pande kuhana miono yetu omo lia vamuanetu. 17 Vunoni nga umo ali na vupite vua ano mavu, kaha amona muanaye na hutua, vunoni ka mu muesa cikeketima, vati honi cilemo ca Njambi ci tualelaho muli ikeye? 18 Tuana tuange, cilemo cetu ka ca pandele kupua lika ca mu kanua, vunoni cipue ca mu vilinga na vusunga.
19 Omo liaco, tuka tantekeya nguetu tu vakua vusunga kaha tuka simpisa* mitima yetu nguetu Njambi ua tulema. 20 Ambe nga mitima yetu itupaya, tu vulukenu nguetu, Njambi uakama kuhiana mitima yetu kaha a tantekeya viuma viose. 21 Vakua cilemo cange, nga mitima yetu kayesi naku tupaya, kaha tuka livua kuzituka mu kuhandeka na Njambi. 22 Kaha viose-ovio vi tumu vundila, tuka vitambula, muomu tue kuononoka masiko endi na kulinga via cili kumeso endi. 23 Mua vusunga, eli likelio lisiko liendi lia tuhele, nguendi, tu tsiliele mu lizina lia Muanendi Yesu Kilistu naku lilema umo na mukuavo, ngue muze vene mua tu sikile. 24 Cikuavo naua, uose ononoka masiko endi aka tualelaho kulikata na Njambi, kaha Njambi aka likata nendi. Kaha tua tantekeya nguetu atualelaho kulikata netu, omo lia sipilitu ya tu hele.