Kuhitila Muli Yoano

5 Mu nima yevi, kuakele cilika ca vaYundeya kaha Yesu ua kandukile ku Yelusalema. 2 Mu Yelusalema ku hiehi na Mbelo ya Vampanga, kuakala cimo cisali ci ve kusana mu ciHevelu nguavo Mbetesenda, cize cakala na vimbimbi vitanu. 3 Mu vimbimbi viaco, muakele na kukosa vakua kuvavala vavengi, tupuputa, vilema na vaze vakele na kalepa.* 4—— 5 Kaha kuze kuakele umo yala, ua vavalele mu miaka 38. 6 Yesu mua muene uze yala na kosa naku tantekeya nguendi na vavala mu miaka yayingi, ua muihuile nguendi: “Utonda kukanguka ni?” 7 Uze mukua kuvavala ua kumbuluile nguendi: “Muangana kanjesi na muntu anji kovelesa mu cisali nga mema ana vunduka. Vunoni mu nje kutonda ku kovelamo, mukuetu ue kulivanga ku kovelamo.” 8 Yesu uamu lekele nguendi: “Katuka! Ambata cisalo* cove uende.” 9 Haze vene uze yala ua kangukile, uambatele cisalo cendi na kuputuka kuenda.

Litangua liaco liapuile Sapalalo. 10 Ngeci vaYundeya va putukile kuleka uze yala iva kanguisile nguavo: “Lelo Sapalalo, kaha kuliya na masiko kaua pandele kuambata cisalo cove.” 11 Vunoni uava kumbuluile nguendi: “Yala nanji kanguisa ikeye nanji leka nguendi, ‘Ambata cisalo cove uende.’” 12 Ngeci va muihuile nguavo: “Iya ouo na kuleka nguendi: ‘Ambata cisalo cove uende’?” 13 Vunoni uze yala iva kanguisile ka tantekeyele iya mpundu, muomu Yesu ua kovelele hakati ka mbunga yakele kuze.

14 Mu nima yevi, Yesu ua liuanene naua na uze yala mu tembele, ngeci uamu lekele nguendi: “Tala, ua kanguka. Kati ulinge naua vupi, kutina cuma ceka ca kuvihia kuhiana eci ci kusolokele.” 15 Uze yala uaile, uaka lekele vaYundeya nguendi, Yesu ikeye uamu kanguisile. 16 Ngeci vaYundeya va putukile kuluisa Yesu, muomu uakele na kulinga viuma viaco lia Sapalalo. 17 Vunoni ikeye uava kumbuluile nguendi: “Tata ali naku tualelaho kupanga na lelo lino, ngeci nange njili naku tualelaho kupanga.” 18 Ngeci vaYundeya va tondele honi cikuma kumu tsiha, kati lika omo lia kupokola lisiko lia Sapalalo, vunoni naua uakele na kutumbula Njambi nguendi Ise, mu kulipuisa hamo na Njambi.

19 Omo liaco, Yesu uava lekele nguendi: “Nji mileka vusunga nguange, Muana ka hasa kulinga na vimo viahi via ku limangela vavenya, kuvanga vize lika amona Ise alinga. Muomu vize via linga Ise, vikevio naua via linga Muana. 20 Muomu Ise ua lema Muana, kaha amu muesa viuma viose vie kulinga. Cikuavo naua, aka mu muesa viuma via kama ku tuvakana evi, linga mu likomokele. 21 Muomu ngue muze Tata ue kusangula vatsi mu ku va hana muono, na Muana nendi ue kuhana muono ku uose ya tonda. 22 Muomu Tata ke kusompesa naumo uahi, vunoni na hana mpoko yose ya kusompesa kuli Muana. 23 Linga vantu vose va singimike Muana ngue mu veku singimika Ise. Uze ka singimika Muana, kesi naku singimika Ise uamu tumine. 24 Mua vusunga nji mileka nguange, uose evua mezi ange naku tsiliela muli Uze uanji tumine, ali na muono ka ue kuhua, kaha ka vaka mu sompesa vunoni na tundu laza ku kutsa na kuya ku muono.

25 “Nji mileka vusunga nguange, ola ili na kuiza kaha ikeyo vene ino, omo vatsi va kevua lizi lia Muana Njambi, kaha vaze vaka liononoka vaka yoya. 26 Muomu ngue omo Ise ali na muono muli ivene,* mukemuo naua na lingisa Muana akale na muono muli ivene.* 27 Kaha namu hana mpoko ya kusompesa, muomu ikeye Muana muntu. 28 Kati mu komoke ha cuma eci, muomu ola ili na kuiza omo vose vali mu vihilo* va kevua lizi liendi 29 kaha vaka tuhukamo. Vaze va lingile via cili, vaka sangukila ku muono, kaha vaze va lingile via kuvihia vaka sangukila ku va sompesa. 30 Kanji hasa kulinga cuma na cimo cahi ca ku limangela yange vavenya, vunoni nje kusompesa vantu, kuliya na muze mue kunji leka Tata, kaha kusompesa cange ca vuoloke muomu kanje kutonda kulinga cizango cange, vunoni cizango ca uze uanji tumine.

31 “Nga njambulula vukaleho vuange vavenya, vukaleho vuange kati vua vusunga. 32 Kuli ueka ali na kuambulula vukaleho kutuala hali yange, kaha nja tantekeya nguange vukaleho vuali na kuambulula, vunapu vua vusunga. 33 Mua tumine vantu kuli Yoano, kaha ua vambuluilile vukaleho vua vusunga. 34 Vutuhu ngoco, kanje kutava vukaleho vua kutunda ku muntu, vunoni njili naku mileka evi viuma linga mu kovoke. 35 Uze yala uapuile ndeya ya kusukuma na kutua ceke, kaha enu mua tondele ku viukilila mua kama mu ceke cendi, vunoni mu kantsimbu ka kandende. 36 Vunoni yange njili na vukaleho vuze vua tuvakana vua Yoano, muomu vipanga vize via nji hele Tata linga nji vipuisemo vikevio vene vinjili na kulinga, kaha vili na kuhana vukaleho ngecize, Tata ikeye vene uanji tumine. 37 Kaha Tata uze uanji tumine, ikeye vene uahele vukaleho kutuala hali yange. Yenu kanda muivueho lizi liendi ni kumona cifua cendi. 38 Kaha lizi liendi kaliesi muli yenu, muomu ka mua tsilielele uze ya tumine.

39 “Enu mue ku tondesesa mu Visoneka, muomu mue ku singanieka nguenu vikevio vika mi kuasa kutambula muono ka ue kuhua ua yaye. Vunoni vikevio vili na kuambulula vukaleho kutuala hali yange. 40 Vutuhu ngoco, yenu ka mutondo kuiza kuli yange linga muka uane muono. 41 Kanje kutava visangala* via kutunda ku vantu. 42 Muomu nja tantekeya vuino nguange ka mua lemene Njambi. 43 Nji neza mu lizina lia Tata, vunoni ka mua nji tambuile. Vunoni nga ueka ne kuizile mu lizina liendi vavenya, nga mua mu tambula. 44 Kumu tsiliela vatindzo? Nga yenu mua lema kutambula visangala via umo na mukuavo, kaha ka mua zangele kutambula visangala via kutunda kuli Njambi umolika. 45 Kati mu singanieke nguenu njika mi tuika mulonga ku meso a Tata, houe. Vunoni kuali umo ami tuika mulonga, Mosesa, uze imua kulahela. 46 Kuhandeka vusunga, nga mua tsilielele Mosesa nange nga mua nji tsiliela, muomu Mosesa ua sonekele viange. 47 Vunoni nga ka mua tsilielele mu viuma via sonekele Mosesa, vati mu tsiliela mu viuma vinji mileka?”