Kuhitila Muli Yoano
20 Ha litangua lia katete mu simano, Maliya Mandalena uezile ku cihilo cimene-mene, tele ku naci zivala, kaha ua muene livue va na litundisako laza ku cihilo. 2 Ngeci ua tuntilile kuli Simone Petulu na ndongesi mukuavo ya lemene Yesu, uava lekele nguendi: “Muangana va namu tundisa mu cihilo, kaha ka tu tantekeya ku va namu haka.”
3 Ngeci Petulu na uze ndongesi mukuavo vaile ku cihilo. 4 Vose vavali va putukile kutunta, vunoni uze ndongesi mukuavo uakele na lusi kuhiana Petulu, ngeci uaka livangele kuheta ku cihilo. 5 Mua sumbililemo, ua muene lika vintanga via linyu via salelemo, vunoni ka kovelelemo. 6 Simone Petulu uze uakele naku mu kava, nendi ua hetele, ua kovelele mu cihilo. Kaha ua muene vintanga via linyu via salele muze. 7 Ntanga iva kutile Yesu ku mutue, ka yakele hamo na vintanga vikuavo, vunoni ya kuvungila ha likaliayo. 8 Ngeci uze ndongesi mukuavo ua livangele kuheta ku cihilo, nendi ua kovelele mukati kaha uavi muene, ua tsilielele. 9 Muomu ha ntsimbu eyi tele kanda va civuisise vuino visoneka via handeka nguavio, napande kusanguka ku vatsi. 10 Ngeci vaze vandongesi va hilukile ku vindzivo viavo.
11 Vunoni Maliya, uemanene ha mbandza ku hiehi na cihilo, oku alila. Muakele na kulila, ua suenene ku cihilo naku sumbililamo, 12 kaha ua muene tungelo vavali va na zala via kutoka, va na tumama haze ha va langekele muvila ua Yesu, umo ku mitue, mukuavo ku mikono. 13 Kaha va muihuile nguavo: “Vika ulila ove mpuevo?” Uava kumbuluile nguendi: “Va na tuala Muangana uange, kaha kanji tantekeya kuva na kamu haka. 14 Mua manusuile kuhandeka evi, ua tengulukile kaha ua muene Yesu nemana, vunoni ka nongonuene nguendi Yesu. 15 Yesu ua muihuile nguendi: “Vika ulila ove mpuevo? Iya uli na kutonda?” Mu kulinga uakele naku singanieka nguendi uapuile mukua kulima mu citungu, uamu kumbuluile nguendi: “Muata, nga yove una mu tundisa muno, nji leke kuiko una mu haka, linga njika muambate.” 16 Yesu uamu lekele nguendi: “Maliya!” Kaha Maliya ua tengulukile na kuhandeka nendi mu ciHevelu nguendi: “Lamboni!” (kulumbunuka “Mulongisi!”) 17 Yesu uamu lekele nguendi: “Kati unji kuate, muomu kanda nji londe kuli Tata. Vunoni ya kuli vamuanetu uka va leke nguove, ‘Nji londa kuli Tata uze uapua Isuenu, na kuli Njambi yange, uze uapua Njambi yenu.’” 18 Maliya Mandalena uezile na kuneha muzimbu ku vandongesi nguendi: “Njina mono Muangana!” Kaha uava lekele viose via mu lekele Yesu.
19 Ku cinguezi ca litangua lize vene, lia kulivanga mu simano, vandongesi va patele mapito a cihela ci vakele, muomu vakele na liova lia vaYundeya. Kaha Yesu uezile na kuimana hakati kavo, na kuhandeka nguendi: “Ciyulo cikale nenu.” 20 Mu nima ya kuhandeka ngoco, uava lekesele mavoko endi, naku luhati luendi. Ngeci vandongesi va viukililile mu kumona Muangana. 21 Yesu uava lekele naua nguendi: “Ciyulo cikale nenu. Ngue mua nanji tumu Tata, nange nji mi tuma.” 22 Mua manusuile kuhandeka evi, uava hozelele muku naku va leka nguendi: “Tambulenu sipilitu santu. 23 Nga muecela muntu vipi viendi, kaha va na muecela vene. Vunoni nga ka muecela vipi via muntu, kaha ka vaka muecelavio.”
24 Vunoni Tomasi, umo ua vaze 12, iva sanene naua nguavo Mpasa, ka keleko mua solokele Yesu. 25 Ngeci vandongesi vakuavo vamu lekele nguavo: “Tua mono Muangana!” Vunoni ikeye uava kumbuluile nguendi: “Kuvanga njina mono vitamba via vimbambo mu mavoko endi, na kuhaka munye uange ha vitamba viaco, kaha na kuhaka livoko liange ku luhati luendi, kati ngoco kanji tava.”
26 Mua hitile matangua 8 kaha vandongesi vendi va likunguluile naua muze mu ndzivo, na Tomasi uakele hamo navo. Vutuhu mapito apuile a kupata, vunoni Yesu uezile, na kuimana hakati kavo, kaha nguendi: “Ciyulo cikale nenu.” 27 Ngeci ua lekele Tomasi nguendi: “Haka munye uove omu, kaha tala mavoko ange, olola livoko liove ukuate ku luhati luange, kaha likele vimpata, vunoni tsiliela.” 28 Tomasi uamu kumbuluile nguendi: “Muangana uange, Njambi yange!” 29 Yesu uamu lekele nguendi: “Una nji mono honi ngeci una tsiliela ni? Va vezika vaze va na tsiliela vutuhu ku va muene.”
30 Kuhandeka vusunga, Yesu ua lingile vitantekeyeso vikuavo viavingi ku meso a vandongesi vendi, vize ka va sonekele mu lizengununo lino. 31 Vunoni evi vavi soneka linga mu tsiliele nguenu, Yesu ikeye Kilistu, Muana Njambi, kaha omo lia kutsiliela, muka uane muono kuhitila mu lizina liendi.