Ua Kulivanga ua Yoano
2 Tuana tuange,* njili naku mi sonekela evi viuma linga kati mu vulumune. Vutuhu ngoco, nga umo a vulumuna, tuli na mukuasi* kuli Tata, ikeye Yesu Kilistu, mukua vuoloke. 2 Kaha ikeye nkombelo ya ku konekela* vupi vuetu linga tu hiluke kuli Njambi, vunoni kati vupi vuetu lika, vunoni navua vakua mavu vose. 3 Kaha tu muesa nguetu tua mu tantekeya, nga tu tualelaho kuononoka masiko endi. 4 Uze ahandeka nguendi, “Nja mu tantekeya,” vunoni kononoka masiko endi, mukua visaki kaha vusunga muli ikeye vuahimo. 5 Vunoni uze uose ononoka lizi liendi, amuesa nguendi cili vene ua lema Njambi. Mu kulingamo, tu tantekeya nguetu tua likata nendi. 6 Uze ahandeka nguendi ua likata nendi, na pande ku tualelaho kuenda ngue muendele ikeye.
7 Vakua cilemo cange, kanjesi naku mi sonekela lisiko lia liha, vunoni lize vene lia laza li muakele nalio tunde ha katete. Eli lisiko lia laza, likelio lizi li muavuile. 8 Kaha naua, njili naku mi sonekela lisiko lia liha, lize liapua lia vusunga muli ikeye na muli yenu naua. Muomu milima ili na kuhita, kaha ceke ca vusunga cili na kutua.
9 Uze a handeka nguendi ali mu ceke, vunoni ua zinda muanaye, acili mu milima. 10 Uze ua lema muanaye atualelaho mu ceke, kaha muli ikeye ka muesi cisuntsuiso. 11 Vunoni uze azinda muanaye, ali mu milima kaha ali na kuenda mu milima, cikuavo naua, ka tantekeya kuaya muomu milima ya puputisa meso endi.
12 Tuana tuange, njili naku mi sonekela muomu vupi vuenu va navu konekela omo lia lizina liendi. 13 Enu visemi va vamala, njili naku mi sonekela muomu mua tantekeya uze ua kalako tunde ha katete. Enu vakuendze, njili naku mi sonekela muomu mu na vulu mukua vupi. Tuana tuange, nji mi sonekela muomu mua tantekeya Tata. 14 Enu visemi va vamala, njili naku mi sonekela muomu mua tantekeya uze ua kalako tunde ha katete. Enu vakuendze, njili naku mi sonekela muomu mu va kukaniama na lizi lia Njambi lili muli yenu kaha mu na vulu mukua vupi.
15 Kati mu leme mavu ambe viuma via mavu. Nga muntu alema mavu, cilemo ca Tata, muli ikeye cahimo, 16 muomu viose vili ha mavu, ngeci mua lisungu lia ntsitu, lisungu lia meso, ni kutembesa viuma viali navio muntu mu muono,* evi ka via tundile kuli Tata vunoni via ha mavu. 17 Cikuavo naua mavu ali na kuhita,* hamolika na masungu ao, vunoni uze alinga cizango ca Njambi, aka kalako miaka yose.
18 Tuana tuange, ino inapu ntsimbu* ya ku manusuila, ngue mu muavuile nguenu mukua kuluisa Kilistu* ali na kuiza, ambe hano vene vakua kuluisa Kilistu vavengi va na soloka laza. Mukemuo tua tantekeya nguetu, ino inapu ntsimbu ya ku manusuila. 19 Vakevo va tundile hakati ketu, vunoni ka vapuile vetu; muomu nga vapuile vetu, nga va tualeleho kukala netu. Vunoni va tundile hakati ketu linga visoloke ngecize, kati vose vapua vetu. 20 Kaha ua kulela na mi vuavesa kaha mu vose mua tantekeya vusunga. 21 Njili naku mi sonekela, kati muomu ka mu tantekeya vusunga, vunoni muomu mu vu tantekeya, kaha kakuesi visaki vitunda ku vusunga.
22 Iya mukua visaki, kati uze aviana nguendi Yesu kati ikeye Kilistu ndi? Ou ikeye vene mukua kuluisa Kilistu, uze aviana Tata na Muana. 23 Uose aviana Muana, ka likatele na Tata, vunoni uose atava Muana, na likata naua na Tata. 24 Vunoni enu mua pande ku tualelaho kuniunga vize vi muavuile tunde ha katete. Nga mu tualelaho kuniunga vi muavuile tunde ha katete, muka tualelaho kulikata na Muana kaha na kulikata na Tata. 25 Cikuavo naua, evi vikevio via tu kulahesele ikeye vavenya, muono ka ue kuhua ua yaye.
26 Njili naku mi sonekela evi viuma, omo lia vaze vali na kutonda ku mi hungumuna. 27 Kaha kutuala hali yenu, cize kuvuavesa ca mi vuavesele ikeye, kasi cicili muli yenu kaha kamu tondeka muntu ueka ami longese. Vunoni cize kuvuavesa cendi, cili naku mi longesa viuma viose muomu capua ca vusunga kati ca makuli. Ngue muze vene muca mi longesele, tualelenuho kulikata nendi. 28 Ngeci mukemuo, tuana tuange, tualelenuho kulikata nendi, linga mu vaka mu solola, kati tuka mu sondoloke omo lia ntsoni, vunoni tuka handeke na kuzituka cose ha kusoloka cendi. 29 Nga mu tantekeya nguenu uapua mukua vuoloke, kaha mu tantekeya naua nguenu, uose ue kulinga via vuoloke na semuka kuli ikeye.