Kuli Vakua Filipu
2 Ntsimbu yose imu likanyamesa umo na mukuavo muli Kilistu, nga mu lilembezieka na cilemo, nga mu likata ku sipilitu, nga mu limuesa cilemo ca kama na cikeketima, 2 lanesenu ndzolela yange mu kumuesa nguenu muli na mutima umolika, na cilemo cimolika na kulikata kumo kaha na kukala na visinganieka vimolika. 3 Kati mulinge cuma na cimo cahi omo lia kulituala ha matunta ni ku lihalesa, vunoni na kulikehesa monenu vakuenu nguenu vami hiana, 4 kati mu tuameke lika vizango vienu, vunoni na vizango via vakuenu.
5 Kalenu na visinganieka ngue viakele navio Kilistu Yesu, 6 vutuhu uakele mu cifua ca Njambi, vunoni ka singaniekele ambe kulipuisa hamo na Njambi. 7 Vunoni ua sezele* viuma viose na kupua ngue ndungo kaha uaku puile muntu.* 8 Kaha naua mua ku puile muntu* ua likehesele, uononokele na ha kutsa, eyo, kutsa ha citi ca kayando.* 9 Omo liaco, Njambi uamu haka ku vukama naku mu haka ha cihela ca helu cikuma, kaha ku ngozi yendi ua muhana lizina lia hiana mazina ose, 10 linga mu lizina lia Yesu, mavuli ose atsikame, mavuli a vaze vali muilu na vaze vali hano ha mavu kaha na a vaze vali kuintsi lia mavu, 11 kaha malimi ose atantekeye ha toma nguavo Yesu Kilistu ikeye Muangana, linga vumpahu vuye kuli Njambi Tata.
12 Ngeci mukemuo vakua cilemo cange, ngue muze mu mue kuononoka ntsimbu yose, kati lika nga njili nenu vunoni cikuma-kuma mu ntsimbu ino omo nji uahiko, tualelenuho kupangela vuovoke vuenu na liova na kuzaza. 13 Muomu Njambi ikeye uze ali na kupanga muli yenu naku mihana cizango na ndzili ya kulinga viuma, kuliya na muze mua na zange ikeye. 14 Tualelenuho kulinga viuma viose ca kuhona ku linyenyeta cipue kulinga vimpata, 15 linga kati mukale na ha kumi payela na kuhona mulonga, mupue vana va Njambi va kuhona kapenga hakati ka muyati ou ua kuhenga na kuvihia, ha muli na kuteteka ngue vieke via mavu, 16 oku mu tualelaho ku kuatelela na ndzili yose lizi lia Njambi lia muono. Kaha njika kala na vusunga vua ku vuahelela ha litangua lia Kilistu, mu ku tantekeya nguange ndzili yange ya kutunta naku fuitangana, ka yaile mu ngoco. 17 Vutuhu vali naku nji muanya ngue vuana vua viakunua ha cikombelo ca vipanga via kulela vize via mi lingisa mukale na lutsilielo, njili na ndzolela kaha nji vuahelela hamolika nenu vose. 18 Mumolika vene naua, nenu zolelenu naku vuahelela hamo nange.
19 Nja lavelela muli Muangana Yesu kumi tuma Timoteu vuovuno, linga nja ku kanyame munja kutambula muzimbu uenu. 20 Muomu kanjesi na muntu ueka ali na vukatuisi ngeci muendi, uze ahasa ku mi niunga vuino. 21 Muomu ava vakuavo vose vali na kutuameka lika vizango viavo kati via Yesu Kilistu. 22 Vunoni mu tantekeya vuino vukaleho vua muesa kulihana cendi, muomu ua pangele hamo nange mu kutuala kulutue muzimbu ua cili ngue muze muana ue kupanga hamolika na ise. 23 Ngeci mukemuo, ikeye inji na singanieka kutuma, nji ci mona lika vati viendelamo viuma. 24 Cili vene, nja kulahela muli Muangana nguange nange vene vuovuno njiza oko.
25 Vunoni mu ntsimbu ino, nja mono nguange ca cili njimi tume muanetu Epafolonditu, mukuetu mu tue kupangela na mukuetu lisualale, uze uapua kanganda kange na mukua kunji pangela mu viuma vinji na zela, 26 muomu ali na cizango ca kama ca kumi mona mu vose, kaha ali mu vusiua muomu muavuile nguavo ua vavalele. 27 Cili vene ua vavalele, handende atse; vunoni Njambi uamu vuililile nkeke, kaha kati ikeye lika vunoni nange vene ua njivuilile nkeke linga kati njivue vusiua kusua kumo. 28 Ngeci mukemuo, njili naku mi tumaye mu vuasi linga mu mua kumu mona, mu vuahelele naua kaha ange co nji tepulule ku kuma mutima. 29 Ngeci mukemuo, mu tambulenu vuino ngue mu mue ku tambuilamo muli Muangana na ndzolela yose, kaha tualelenuho kumuesa seho ku vantu va cifua eci, 30 muomu handende atse omo lia cipanga ca Kilistu, ua hakele muono uendi mu vusonde mu kunji pangela linga amimaneneko, muomu enu kuno mu vahiko.