Kuli Vakua Filipu
3 Mu ku manusula vamuanetu, tualelenuho ku viukilila muli Muangana. Ange kanji mono citanga kumi sonekela viuma vimolika kusua kumo, njili na kulingamo linga njimi niungiliye.
2 Zangamenu na tutali. Zangamenu na vakua kulinga viavipi. Zangamenu na vakua kuhakuila cimpande ca kulovoka. 3 Muomu etu tunapu vakua kulovoka va vusunga, vaze vali na kupanga cipanga ca kulela kuhitila mu sipilitu ya Njambi na kulipamba muli Kilistu Yesu kaha katuesi naku kulahela mu ntsitu, 4 vutuhu ange njili na vusunga vunji lingisa ku kulahela mu ntsitu ku tuvakana uose-ouo.
Nga kuli umo ali na vusunga vumu lingisa ku kulahela mu ntsitu, ange njili na vuavuingi: 5 vanji lovuele ha litangua lia vu 8, nji kaIsaleli uaku muyati ua Mbenjamini, nji kaHevelu ua kusemuka ku vaHevelu, kaha nga tuya ku masiko nji kaFaliseu; 6 kutuala ha kukala na ntuima, nja yandesele cikungulukilo, kaha kutuala ha vuoloke vuemana ha masiko, ka njakele na hamo hahi ha kunji payela. 7 Vutuhu ngoco, vize vinja muene kupua via seho, nja vi mono kupua via ngoco* omo lia Kilistu. 8 Cili vene, viuma viose nja vi mono kupua via ngoco, omo lia mangana a kuhiana aku tantekeya Kilistu Yesu Muangana uange. Omo liendi, nja mbila kuti viuma viose kaha njili naku vi mona ngue visuasua via ngoco linga nji likate* na Kilistu, 9 linga va kunji uane muli ikeye, kati omo lia vuviuke vuange vuze vuemana ha kukava Masiko, vunoni omo lia vuviuke vua kutunda kuli Njambi, omo lia kutsiliela muli Kilistu. 10 Cizango cange cinapu ku mu tantekeya, naku tantekeya ngolo ya cisangukilo cendi kaha na kuyanda ngue mua yandele, na kutava kutsa ngue mua tsile ikeye, 11 linga nji mone nga nji ka sanguka ku cisangukilo ca kulivanga.
12 Kati nguavo nja ci tambula laza, ni nguavo njinapu laza uaku tantuluka, houe, vunoni njili naku lihakela kapandi linga nji mone nga njika tambula vene cize ca nji hanguilile* Kilistu Yesu. 13 Vamuanetu, kanji limono ngue nja ci tambula laza, houe, vunoni vusunga ni ovu: Njili na kusuva viuma via ku nima, kaha njolovela* viuma via kulutue, 14 njili naku lihakela ndzili linga nji puisemo vutumbe vuange, ni nguetu, njika tambule fueto ya nanji sanena Njambi muilu kuhitila muli Kilistu Yesu. 15 Ngeci mukemuo, etu vose tuna kolo* tu singaniekenu mu cifua eci, vunoni nga mu singanieka mu cifua ceka, Njambi aka mi soluela visinganieka via kusungama. 16 Vunoni hose-oho ha tuna hete mu kukola cetu, tu tualelenuho kuenda vuino mu njila yaco.
17 Vamuanetu, puenu vakua kunji temunuina mu vose, kaha tualenu mana* enu kuli vaze vali na kuenda kuliya na lungano lutua mi muesele. 18 Muomu kuli vavengi va njakele na kutumbula kusua kumo, vunoni hano nji va tumbula na misozi muomu vanapu vitozi va citi ca kayando* ca Kilistu. 19 Vumanusuilo vuavo vunapu kunonga, na njambi yavo napu mazimo avo, na vumpahu vuavo vunapu honi ntsoni yavo kaha mana avo ali lika ku viuma via ha mavu. 20 Vunoni etu vundambo vuetu vuli muilu, muze mu ka tunda muovole uetu utuli naku lavelela, ikeye Muangana Yesu Kilistu, 21 uze akalulula mivila yetu ya kuzeya naku ipuisa ngue muvila uendi ua vumpahu, kuhitila mu ngolo yendi ya kama, ize ili naku mu lingisa kuononuesa viuma viose kuli ikeye.