Vampasa Ka Va Lifuile

AVA vanike va va mala vali aha, ka va lifuile ni vati? Ua tantekeya mazina avo? Ou ciyambi ikeye Esau, kaha ou a li na ku niunga vampanga ikeye Yakomba.

Esau na Yakomba va puile vana vampasa va Isake na Lembeka. Isake ua lemene cikuma Esau, muomu ua puile ciyambi ua cili kaha ua kele na ku neha ntsitu ku ndzivo. Vunoni Lembeka ua lemene cikuma Yakomba, muomu ua puile ua ku holoka kaha ua ku konkama.

Yakomba ua lemene ku halakana mezi a Yehova kuli kukueni Avilahama tele a ci li na muono. Kaha Avilahama mua puisile miaka 175 ua tsile, tele vampasa va li na miaka 15.

Omo Esau ua puisile miaka 40 ua ambatele vampuevo vavali vakua Kanana. Evi via vuisile va Isake na Lembeka vusiua vua kama, muomu vampuevo vaco ka vapuile vakua ku lemesa Yehova.

Tangua limo, Esau ua nienguele cikuma na muanaye Yakomba omo lia vimo via lingikile. Esau ikeye ua lavelele ku tambula vivezikiso muomu ikeye ua puile mukuluntu kuli Yakomba. Vunoni Esau ua livangele laza ku landesa civezikiso ceni kuli Yakomba. Kaha naua, fume ha ku semuka cavo, Njambi ua handekele laza ngueni Yakomba ikeye a ka tambula civezikiso. Mukemuo vene mu viendele, evi vikevio via lingikile. Isake ua vezikisile muaneni Yakomba.

Omo Esau ua ci tantekeyele, ua nienguele na Yakomba. Ua nienguele cikuma ngeci ua tumbile ku tsiha Yakomba. Omo Lembeka ua ci vuile uomine mutima. Ngeci ua lekele yalieni Isake ngueni: ‘Ci ka pihilila cikuma nga, Yakomba ambata mpuevo ha kati ka vakua Kanana.’

Ngeci mukemuo Isake ua sanene muaneni Yakomba na ku mu leka ngueni: ‘Kati u ambate mpuevo ua mu Kanana. Vunoni ya ku Halane, ku ndzivo ya kukuove Mbetuele. U ka ambate umo ua vana va Lambane, muana Mbetuele.’

Yakomba uononokele kuli ise, ngeci haze vene ua katukile vungendzi vua ku ya ku Halane kuze kua kele va vusoko vueni.