Yefeta A Likuminia

NTSIMBU imo ua kulahesele vimo ku muntu, kaha ua hona ku vi puisamo, ni? Ou yala a li aha ha fikula ua lingilemo, ngeci mukemuo a li mu vusiua vua kama. Ou yala uapua ngazi ua mu Isaleli, lizina lieni Yefeta.

Yefeta a li na ku yoya mu ntsimbu ize vaIsaleli kavesi naua na ku lemesa Yehova. Va na putuka naua ku linga via vipi. Ngeci Yehova na va ecelela ku mavoko a vakua Amone linga va va yandese. Evi vi na lingisa vaIsaleli ku vuluka Yehova na ku lila nguavo: ‘Tu na lingi vupi kuli ove. Sukulukambu tuohiele!’

Kaha vantu va liveyele cikuma omo lia vupi vu va lingile. Kaha va putuka ku muesa ku-aluluka cavo mu ku lemesa Yehova. Ngeci Yehova ua va kuasele naua.

Vantu va na hangula Yefeta linga a ka va luile kuli vakua Amone. Yefeta a tonda mpundu ngueni Yehova a ka mu kuase linga a ka vule ndzita. Ngeci na likuminia kuli Yehova ngueni: ‘Nga u ka nji kuasa linga nji ka vule vakua Amone, uose muntu ua katete a ka tuhuka ku ndzivo yange mu kua ku nji sesa, nji ka mu hana kuli ove’.

Kaha Yehova ua halakana kuli Yefeta omo na likuminia, kaha ua mu kuasa ku vula ndzita. Omo Yefeta ua hilukile ku ndzivo, ua tantekeya iya uezile mu ku mu sesa ni? Muaneni umo lika ua mpuevo. Mua mu muene, Yefeta ua lilile ngueni: ‘Nani, muanange ua mpuevo! Vusiua vua kama u li na ku nji nehela. Vunoni nja likuminia laza kuli Yehova ka citava nji viane naua.’

Omo muana Yefeta ua tantekeyele via likuminyine ise, neni ua liniengele. Muomu cize ca lombolokele ngecize ikeye na pande ku ka seza ise na va vusamba veni. Vunoni a ka yoya miaka yose ya muono ueni mu ku pangela Yehova ku tavenakulu ku Silo. Ngeci ua lekele ise ngueni: ‘Tata nga u na likuminia vimo kuli Yehova u na pande ku vi puisamo’.

Kaha muana Yefeta ua ile ku Silo, a ka kalako miaka yose ya muono ueni mu ku pangela Yehova ku tavenakulu. Muaka ku muaka vampuevo va mu Isaleli va kele na ku yako mu ku ka mu meneka na ku viukilila hamo neni mu matangua auana. Vantu va lemene cikuma muana Yefeta muomu ua puile ngamba ua cili ua Yehova.