Vintsina via Mukanda Uetu ua Viuano via Muono Uetu Vakua Kilistu na Vipanga Vietu
2-8 YA NOVEMBRO
VUPITE VUA MU LIZI LIA NJAMBI | EZUNDU 39-40
“Mosesa ua Kavele Vimamuna na Civando”
w11 15/9 27 ¶13
Vuno va mi tantekeya kuli Yehova ni?
13 Ka kua kele vukaleho vua muesa ngecize Mosesa ua kele na vimpata ha cifua ce ku lingilamo Yehova viuma, ni ua vuile matoto, mu ku kava vitume via tumbikile Yehova. (Ezu. 7:6; 40:16) Ca ku muenako, Yehova mua hele masiko a ku tunga tavenakulu, ua lomboluele na vati va pandele ku linga na tu viuma tua tundende, ngeci mua livala lia vuanda vu va pandele ku pangesa mu ku nunga vitanga. (Ezu. 26:1-6) Nga umo muanetu ua kala na mpoko mu lukungulukilo, a mi leka vimo vi mua pande ku linga, kaha a mi lomboluela na tuma tua tundende cikuma, mu hasa ku ivua cimpekete. Vunoni Yehova ua pua ntuamena ua ku ntantuluka, uze ue ku tu hana vipanga mu ku puisamo kaha naua ua tu kulahela. Nga a tu lomboluela tu viuma tua tundende cikuma, ue ku lingamo na vutumbe. Ngeci mukemuo, Mosesa ka vuilile Yehova matoto omo lia ku mu lomboluela tu viuma tua tundende, ni ku livua ngecize Yehova na mu muenamo ni ka mu hanene vukovelelo vua ku pangesa vutongue vueni. Vunoni Mosesa ua lingile cose mangana vakua ku panga “valinge viose muze Yehova mua sikile.” (Ezu. 39:32) Mua vusunga Mosesa ua muesele ku likehesa ca kama! Ua tantekeyele ngecize cize cipanga ca puile ca Yehova kaha ikeye ua puile lika citenga ca kele na ku pangesa Yehova mu ku puisamo cipanga caco.
w05 15/7 27 ¶3
Mua pua Vakua Vusunga mu Viuma Viose Ni?
3 Ku tuala ha ku tunga tavenakulu na ku itumbika, “Mosesa ua lingile ngue ku viose Yehova ua mu sikile mua lingile.” (Ezu. 40:16) Etu vakua ku lemesa Yehova tue ku muesa ngecize, tua pua vakua vusunga mu ku mu ononoka. Evi, via ambatesela kumo na ku ononoka Yehova ambe nga tu hita mu vieseko. Vunoni ku muesa lukakatela mu vieseko via kama, kati cikeco lika ce ku muesa ngecize tua pua vakua ku ononoka. Yesu ua handekele ngecize; “Ou ue ku linga mua cili neci ca cindendendende, ue ku linga mua cili nevi via vingi naua: nou ue ku linga via vuhenge neci ca cindendendende, ue ku linga vuhenge nevi via vingi naua.” (Luka 16:10) Ngeci mukemuo, tua pande ku pua vakua vusunga cipue mu tuma tua tundende.
Ku Hinda Vupite vua mu Lutsilielo
it-2 219 ¶4
Vilambu via Tusitu va mu Kalunga
Vati vaIsaleli va Viuanene. Vutuhu ava tusitu va mu kalunga, va ku lifua na mavau, va kala cikuma ku vihela via lisika ngeci Artico na ku Antartico, vamo va lema ku vihela via ku yukuma. Lelo lino vamo tusitu vaco, va kala mu cisali ca Menditalaniu, na ku vihela vikuavo via ku yukuma. Mu ku hita ca miaka vantu vatepulula cikuma ava tusitu, vunoni mu ntsimbu iva sonekele Mbimbiliya tusitu vaco, va lanene cikuma ku cisali ca Menditelaniu na ca ku Tila. Cipue vene mu miaka ino, ngeci mua 1832 limo livulu ngualio: Ha cingi ca vinkundu via ku cisali ca ku Tila ya ku Sinai ha kala mavau vavengi. Calmet’s Dictionary of the Holy Bible (lif. 139)
w15 15/7 21 ¶1
Tua Pande ku Lisosomua na Veya ve ku Mona Cipanga Cetu Ni?
Mu ya huile tavenakulu, amba vuose liselua lia fuikile mbalaka ya ciuaneno na vumpahu vua Yehova vua sulisile tavenakulu. (Ezu. 40:34) Eci ca puile citantekeyeso ca muesele ha toma ngecize, cipanga ca ku tunga tavenakulu ca ile Yehova ku mutima.
9-15 YA NOVEMBRO
VUPITE VUA MU LIZI LIA NJAMBI | LEVITUKU 1–3
“Vutumbe vua Vikombelo”
it-3 123 ¶5
Vikombelo
Vikombelo via ku tsimika. Vikombelo via ku tsimika va kele na ku vi hana mu vuntuntu vuavio kuli Njambi; ka kua kele na umo mutamba uahi u va kele na ku hana kuli uze na kombeleya kasitu uaco. (Setekesenu na Vangazi 11:30, 31, 39, 40.) Ku lingamo ca puile ku lambelela Yehova a tave cikombelo ca vupi ci va kele na ku hanena kumo na cikombelo ca ku tsimika, vintsimbu vimo. Yesu neni ua lihanene mu vutuntu ngue “cikombelo ca ku tsimika.”
it-3 120 ¶4
Vikombelo
Cikombelo ca vimbuto. Evi vikombelo va kele na ku vi hana mu ku muesa ngecize Yehova ua kele na ku va vezikisa mu vukama na mu vuingi. Vintsimbu via vingi, va kele na ku vuezako na mazi, na isenso ya vueko vua cili. (Ezu. 29:40-42; Levi. 23:10-13, 15-18; Num. 15:8, 9, 22-24; 28:9, 10, 20, 26-28) Vikombelo via mbuto, via hasele ku pua via vunga vua kuhia satu, mbuto ya kuoca, mbolo ya kuoca, ya ku kanga, ni ya kuocela mu cikango ca ka suita. Imo mbuto ya ku vikombelo ya vimbuto, va kele na ku ihaka ha mutula ua vikombelo via ku ntsimika, ikuavo va kele na ku ilia kuli vasasendote, kaha nga cikombelo caco ca puile ca ciyulo, na mukua ku kombeleya neni ua kele na kulia ko. (Levi. 6:14-23; 7:11-13; Num. 18:8-11) Na cimo cikombelo ca vimbuto cahi ci va pandele ku kombeleya na cimbaluila ni na “vuci.” (citava ovu vuci vu va tumbula, vuemanenene muenga ua ku vinkuyu na musozi ua ku vusuka) vize via hasele ku setesa cikombelo caco.—Levi. 2:1-16.
it-3 121 ¶1
Vikombelo
Vikombelo via ciyulo. Vikombelo via ciyulo vize via tavele Yehova via muesele ngecize, vaze va na vi hana vali mu ciyulo neni. Mukua ku kombeleya ua lile ku cikombelo caco hamo na vusoko vueni (mu citali ca tavenakulu va tungililemo vimbalaka kuliya na cisemua; kaha mu citali ca tembele co, va tungililemo vihondo). Sasendonte ua hanene cikombelo caco, ua tambuileko umo mutamba, kaha mutamba ukuavo co va u hele kuli vasasendote vakuavo va kele ha cipanga. Kaha Yehova co ua kele na ku tambulako vueko vua cili vua cikombelo ca ku tsimika. Maninga aze emanena muono, va kele na ku a hana kuli Njambi mu ku pua ivene muono. Ngeci mukemuo, ca puile ngue vasasendote, vakua ku kombeleya hamo na Yehova, va kele na ku lila hamo mu ku muesa ngecize va kele mu ciyulo.
Ku Hinda Vupite vua mu Lutsilielo
w04 15/5 22 ¶1
Via Tsimana mu Livulu lia Levitiku
2:13-Omo lia vika vikombelo viose, via pandele ku “vi tova muongua”? Ka va kele na ku lingamo mu ku vueza ku ku tovala ca vikombelo houe. Mu mavu ose, muongua ve ku u pangesa mu ku niunga via ku-lia, kaha halumo va kele na ku u hanena kumo lika na vikombelo mu ku muesa ngecize vikombelo viaco ka via kele na kapenga ni ku vola.
it-2 245
Mazi
Vusunga vu va hanenene lisiko liaco. Mazi, va a muene ku pua mutamba ua seho ya kama cikuma ua kasitu. Ngeci mukemuo, ku kombeleya mazi a kasitu ca puile ku muesa ngecize, muntu na tantekeya ngecize Yehova ikeye ua fuila ku tambula viuma via cili cikuma vi tua kala navio, muomu neni ue ku tu hana viuma mu vuingi. (Levi. 17:11, 14) Kaha ca muesele naua ngecize, mukua ku hana cikombelo caco, ua tondele ku hana viuma via cili cikuma via kele navio kuli Yehova. Mu ku linga cemanenene viuma via cili cikuma vi va pandele ku hana vaIsaleli kuli Yehova, ngeci mukemuo via pandele ku vitsimika ha mutula, ku pua via kulia na vueko vua ku lembuluka kuli ikeye. (Levi. 3:11, 16) Ngeci mukemuo, kulia mazi ca puile ngue ku litanda ha cuma ci va lelesele na ku kundika kuli Njambi, ni nguetu kuli kambeka ha viuma via fuililile ku tambula Yehova. Ngeci mukemuo uose ua lile ku mazi, a kasitiku ua pandele ku-tsa.
w04 15/5 22 ¶2
Via Tsimana mu Livulu lia Levitiku
3:17. Mu ku linga mazi va a puisile ku pua mutamba ua seho cikuma ua kasitu, ku vindika ku alia ca lingisile vaIsaleli va tantekeye ngecize viuma via seho cikuma viose via pandama kuli Yehova. (Njen. 45:18) Evi, vie ku tu vuluisa ngecize, tua pande ku hana viuma via seho cikuma vi tua kala navio kuli Yehova.—Visi. 3:9, 10; Kolo. 3:23, 24.
16-22 YA NOVEMBRO
VUPITE VUA MU LIZI LIA NJAMBI | LEVITUKU 4–5
“Hanenu Viuma via Seho Cikuma vi mua Kala Navio Kuli Yehova”
it-3 122 ¶9
Vikombelo
Vikombelo via vi vulumuna. Vikombelo viaco, va kele na ku vi hanena vipi via ku lifuila via kele na ku linga muntu. Kaha via litepele kamandende na vikombelo via vupi vize vi va kele na ku hana mu ku hiluisa mpoko ya kele nayo Yehova ni ya cifuti cose ca Isaleli. Cikombelo ca civulumuna va kele na ku ci hanena mu ku puisamo mpoko ya kala nayo Yehova ize ya pihisile muntu ni mu ku hiluisa seho ya amo matavasiano akele nauo uze ua lingile vupi na ku mu patula ku kasitiku ka vupi vueni.—Setekesenu na Isaya 53:10.
w09 1/6 26 ¶3
Ue ku Ivuisisa ha Lengela Ngolo Yetu
Yehova mu ku muesa cikeketima, ua hele lisiko lia muesele ngecize: “Kaha nga vupite vueni ka vua puilemo ku muana mpanga, kaha a ka neha cikombelo ceni ca ku civulumuna ca kuli cize ca a na vulumuna, tumboua vavali, cipue vana va mavembe vavali kuli Yehova.” (Cinimbu 7) Mezi “nga vupite vueni ka vua puilemo” citava naua ku alangulula, “nga livoko lieni ka lia hasele ku uana.” Ngeci mukemuo na kaIsaleli ua puile cihutu cikuma kaha ka hasele ku kala na mpanga, Njambi ua tavele vize via hasele ku hana muntu uaco, ni nguetu tumboua vavali na vana va mavembe vavali.
w09 1/6 26 ¶4
Ue ku Ivuisisa ha Lengela Ngolo Yetu
Vati co nga muntu ka hasele ku hana cipue tuzila vavali? Mbimbiliya nguayo: “Nga vupite vueni ka vua puilemo ku tumboua vavali, cipue vana va mavembe vavali, kaha a ka neha cikombelo ceni ca kuli cize ca na vulumuna, mutamba ua mu likumi ua efa ya vunga vua kuhia satu mu ku pua cikombelo ca ku vupi,” ni nguetu vingandza likumi na vitatu ni likumi na viuana via vunga. (Cinimbu 11) Kuli vaze va puile vihutu cikuma, Yehova ua va sililile kantuntu mu masiko a ku hana vikombelo via ku vupi via ku hona maninga. Mu Isaleli, vuhutu ka vua vindikile muntu na umo uahi, civezikiso ca ku mu sambuesa ni ku hiluisa vusamba vueni na Yehova.
Ku Hinda Vupite vua mu Lutsilielo
Lilongesenu ku Vangamba va Yehova va Vuoloke
14 Ca ku muenako, hamo mu hasa ku kala na vusunga ngecize umo muanetu na lingi vupi vua kama. Halumo mu ka mu vuila ngozi, cikumakuma nga ua pua kavusamba ni ka vusoko. Vunoni mu tantekeya naua ngecize ku pua vakua vusunga kuli Yehova ca hiana seho. Mua pande ku ononoka Yehova ngue mua lingile Natane, linga mu kuase muanoko. Mu lekenu a tonde vukuasi ku vakuluntu va cikungulukilo vuasi-vuasi. Nga a viana kaha mua pande ku ka va leka. Nga mu lingamo, ci ka mi kuasa ku ononoka Yehova. Mu ntsimbu yaco naua mu ka muesa ngecize, muli na ngozi ya kavusamba kenu, kaha mu tonda vakuluntu va mu kuase a kale naua na vusamba vua cili na Yehova. Kaha vakuluntu va ka mu sungamesa mu ngozi na cilemo.—Tandenu Levitiku 5:1; Ngalata 6:1.
it-3 529 ¶1
Ku lela
Tusitu na Vimbuto. Viuma viose via puile via ku lela kuli Yehova, via puile mpundu via ku lela. Kaha ka via pandele ku vi tuala mu sembulule ni ku vipangesa ku viuma via ngoco cipue ku vi sahula. (Num. 18:17-19) Evi tu hasa ku vi muena ku lisiko lia handekele via cimo ku likumi. (Ezu. 28:38) Nga muntu na tulika umo mutamba mu ku pua cimo ku likumi, ngeci mua tiliku, kaha ikeye ni umo ueka ha ndzivo yeni, a jomonamo ku ndzimba mu ku lingisa viuma vieka ngeci mua ku teleka, muntu uaco ua tsihile lisiko lia Njambi ku tuala ha viuma via ku lela. Kaha lisiko lia muesele ngecize muntu uaco ua pandele kuya ku ndzivo ya ku lela mu ku fueta. Ua pandele ku fueta cize ca na pihisa na ku pandakanako mutamba ua mu citanu, kaha na cizamba kesi na kapenga mu ku pua cikombelo. Evi via lingisile vantu vasingimike cikuma viuma via ku lela via pandamene kuli Yehova.—Levi. 5:14-16.
23-29 YA NOVEMBRO
VUPITE VUA MU LIZI LIA NJAMBI | LEVITUKU 6–7
“Njila ya ku Mueselamo ku Santsela”
Vi tu Hasa ku Lilongesa mu Livulu lia Levitiku
9 Cilongesa ca mu civali: Tue ku pangela Yehova muomu tua tonda ku muesa ku santsela cetu kuli ikeye. Livulu lia Levitiku, lia muesa ngecize nkala kaIsaleli ua kele na ku hana cikombelo ca ciyulo mu ku muesa “ku santsela.” (Levi. 7:11-13, 16-18) Nkala muntu, ua lingile cikombelo caco kati muomu ua pandele ku ci linga houe, vunoni muomu ua tondele ku ci linga. Ngeci mukemuo, cikombelo caco ca puile vuana vua hanene muntu mu ku muesa ngecize ua lema Njambi yeni, Yehova.
w00 15/8 15 ¶15
Vikombelo vie ku ya Njambi ku Mutima
15 Ngeci mukemuo, vikombelo via ciyulo vantu ka va kele na ku vi hanena ku niunga ciyulo cavo na Njambi ni nguetu ku lihamba neni. Vunoni va kele na ku vi hanena ku muesa ku santsela cavo ku ciyulo ci va kele naco na Njambi, kaha nomo civezikiso ca ku pua vantu va tavele ikeye. Vasasendote na mukua ku hana cikombelo caco, va kele na ku liako mu nima ya ku kombeleya maninga na mazi kuli Yehova. (Levi. 3:17; 7:16-21; 19:5-8) Eyi ya puile njila ya ku tovala, kaha naua ya citantekeyeso ca muesele ngecize mukua ku hana cikombelo, vasasendote na Yehova Njambi va kele na ku lia hamo lika mu ku muesa ciyulo ca kele ha kati kavo.
w00 15/8 19 ¶8
Vikombelo via ku Sangaziala Vize vie ku ya Yehova ku Mutima
8 Amba co muntu ua hanene cikombelo caco co? Masiko a muesele ngecize, uose ua kele na ku suena kuli Yehova ua pandele ku pua ku lela kaha ua ku hona ku lizualesa. Uose ua lizualelsele ua pandele ha katete, ku hana cikombelo ca vupi ni cikombelo ca civulumuna, linga a pue naua ua ku lela ku meso a Yehova, kaha naua linga Yehova a tave cikombelo ceni ca ku tsimika ni ca ciyulo.
Ku Hinda Vupite vua mu Lutsilielo
it-2 148 ¶4
Tuhia
Cifua ci va kele na ku tu pangeselamo ku tavenakulu na ku tembele. VaYundeya vatsilielele ngecize tuhia tua kele ha mutula va tu suamekele ku hitila mu cikomueso kuli Njambi. (Ezu. 30:7, 8) Vutuhu vantu va vengi va tsiliela muli evi, vunoni kati vikevio vi ya lombolola Mbimbiliya. Kuliya na vitume via katete via hele Yehova kuli Mosesa, vana va Alone va pandele ku haka tuhia ha mutula na ku tsika vikuni ha tuhia ntsimbu kanda vakeho cikombelo. (Levi. 6:12, 13) Mu nima ya ku tumbika vusasendote vua Alone, kaha naua mu nima ya ku tumbika vikombelo, mukemuo honi mukua tundile tuhia kuli Yehova, halumo tua tundile vene mu liselua lua kele helu lia tavenakulu tua lile cikombelo ca kele ha mutula. (Levi. 1:7, 8) Ngeci mukemuo, tuhia tua cikomoueso tua lisoluele kati mu ku suameka vikuni via kele ha mutula, vunoni mu ku lia ha cikombelo ca ku tsimika na mazi via kele ha mutula. Kaha tuhia tuze tua tualeleleho ha mutula, citava ca puile ku lipandakana ca tuhia tua tundile kuli Njambi na tuze tua keleho laza.
si 27 ¶15
Livulu lia mu Mbimbiliya Numelu 3—Levitiku
15 (3) Cikombelo ca ku vupi, ca tondekele ku vipi via lingile muntu ku ndzimba ni omo lia ku sevuka. Kaha cifua ca kasitu ci va pandele ku kombeleya, ca hitukilile hali iya u va kele na ku sambuesa—nga sasendote, cifuti cose, mukuluntu ua ku vantu ni muntu lika. Vikombelo via vupi via tondekele kuliya na masiko. Ngeci mukemuo via litepele na vikombelo via ku tsimika na vikombelo via ciyulo. Muomu vantu va kele na ku vi linga ku cizango.—4:1-35; 6:24-30.
30 YA NOVEMBRO–6 YA DEZEMBRO
VUPITE VUA MU LIZI LIA NJAMBI | LEVITUKU 8–9
“Cimueso ca Vivezikiso via Yehova”
it-2 414
Ku kundika vusasendote
Mosesa ua tanesele Alone na vana veni, Nandave, Avihu, Eliyazale na Itamale (ni halumo ua va tumine vatane) mu mbasiya ya kele mu citali ca tavenakulu na ku zika Alone vuzalo vua vumpahu vua sasendote ua kama. Kaha mu nima ya ku zala mu vuze vuzalo vua cili, Alone va mu zikile vuzalo vuze vuemanenene vifua via cili kaha na citeli ca kele naco mu ku pua sasendote. Mu nima yaco, Mosesa ua vuavesele tavenakulu na vitenga viayo viose na vikuata, kaha na mutula ua vikombelo via ku tsimika hamo lika na mbasiya na vikuata vi va kele na ku pangesa, hamo lika neni. Evi via va lingisile ku pua va ku lela ni nguetu, va ku kundika ku mukulo mu ku linga lika vipanga via Njambi vize vi va putukile tangua lize. Mu ku manusuila, Mosesa ua vuavesele Alone mu ku muaniena mazi ha mutue ueni.—Levi. 8:6-12; Ezu. 30:22-33; Visa. 133:2.
it-2 415 ¶8
Ku kundika vusasendote
Ha litangua lia mu citanu na atatu, vasasendote mu ku linga tele vali na viose vi va tondekele, vapangele ca ku hona vukuasi vua Mosesa ntsimbu ya katete. Va lingile cipanga ca ku sambuesa cifuti cose ca Isaleli na ku ci lelesa, cikumakuma kati omo lia vupi vua ku semuka navuo, vunoni omo lia lisino li va muesele mu ku panga ngombe ua olu uze ua vuisile Yehova ku mutima ku vihia.
Vi tu Hasa ku Lilongesa mu Livulu lia Levitiku
13 Cilongesa ca mu ciuana: Yehova ali na ku vezikisa mutamba ua ha mavu ua lukungulukilo lueni. Tu talenu via solokele mu 1512 T.K.K.E., mu va tungile tavenakulu ku Muncinda ua Sinayi. (Ezu. 40:17) Mosesa ua tuamenene ciuano ca ku hangula Alone na vana veni ku pua vasasendote. VaIsaleli vose va kungulukile, linga va ku mone mpundu vasasendote va linga vikombelo via katete. (Levi. 9:1-5) Vati Yehova ua muesele ngecize na tava vaze vasasendote? Omo Alone na Mosesa va vezikisile vantu, Yehova ua tumine tuhia ku tunda muilu, kaha tuhia vaco va lehuile visupo via cikombelo ca kele ha mutula.—Tandenu Levitiku 9:23, 24.
Ku Hinda Vupite vua mu Lutsilielo
w14 15/11 9 ¶6
Vi Tua Pande ku Puila va ku Lela
6 Lisiko lia tumine vaIsaleli ku pua va ku lela ku muvila, lia kala na seho ya kama kuli vangamba va Yehova lelo lino. Vaze va tue ku putuka ku lilongesa navo Mbimbiliya, ve ku mona ngecize vihela vi tue ku lemesela, via pua via ku lela, kaha naua netu tua pua va ku lela cipue ku zalesi yetu. Vunoni ku lela ca tondekele ku vasasendote, ca tu kuasa ku mona ngecize uose a londa ku muncinda ua ku lela ua Yehova, na pande ku kala na mutima ua ku lela. (Tandenu Visamo 24:3, 4; Isaya 2:2, 3.) Tua pande ku pangela Njambi na visinganieka, na mitima ya ku lela, kaha kati ovio lika vunoni na mivila ya ku lela. Ku puisamo evi ce ku tondeka ku lihilula ku sua kumo, kaha mu nima yaco, vamo ve ku mona vene ngecize va tondeka ku aluluka ca kama mu muono linga vapue va ku lela.
it-3 17-18 ¶3
Mosesa
Njambi ua puisile Mosesa lihako ua litavasiano lia lisiko lia lingile na Isaleli. Ka kua kele muntu ueka ua kele na civezikiso caco noho Yesu Kilistu lika uze ua puile Lihako ua litavasiano lia lihia. Mu ku pua lihako, Mosesa ua kele na civezikiso ca ku tuamenena cipanga ca ku tunga tavenakulu na vitenga viayo viose. Kaha Njambi ua mu hele mizimbu ya vati va pandele ku vitungilamo viose. Mosesa ua pandele naua ku tumbika vusasendote na ku vuavesa, tavenakulu na Alone mu ku pua sasendote ua kama na mazi a ku lifuila cikuma. Kaha ikeye ua lingile cipanga ca katete ca vusasendote mu nima ya ku vu kundika.—Ezu. 24:3-8; VaHe. 9:19.