Vamiangana Vakua Vutozi ku Matangua a ku Kotokela

Vupolofeto vu va tumbula mu cikasa cino, vumo vua kovela mu vukuavo. Kaha vua muesa mu vinjila via ku liseza-seza ngecize tuli na ku yoyela “ku matangua a ku kotokela.”—Ndan. 12:4.

Cikasa ca muesa vupulofeto vua lombolola muangana ua ku nolote na muangana ua ku sulu tunde mu 1870 na ka lelo.

Mukanda Ku-So. 11:7; 12:13, 17; 13:1-8, 12

Vupolofeto: “Kasitu” a ka sika vantu ha mavu, mu makulukazi a miaka. Ku matangua a ku kotokela, mutue ueni ua mu citanu na ivali va ka u vulumuna. Mu nima ya ntsimbu mutue uaco u ka kanguka, kaha mavu ose a ka kava kasitu. Satana a ka pangesa “kasitu uaco mu ku linga ndzita na visupo via vaze va ku vuavesa.”

Ku Lipuisamo: Mu nima ya Livazi, vantu va putukile ku lipangela vinguvulu viavo mu ku viana Yehova. Mu nima ya vihita via vingi via miaka, mu ntsimbu ya ndzita ya ku livanga ya mavu ose, vuangana vua Grã-bretanha va vu zeyesele mua kama. Vua kaniamene naua mu vua lipandakanene na Estados Unidos. Cikuma kuma kuno ku matangua a ku kotokela Satana ue ku pangesa vakua pulitika vose mu ku luisa vangamba va Njambi.
Mukanda Ndan. 11:25-45

Vupolofeto: Vutozi ha kati ka muangana ua ku nolote na muangana ua ku sulu ku matangua a ku kotokela.

Ku Lipuisamo: Vuangana vua Alemanha na Anglo-Amerika vue ku lituala ha matunta. Mu 1945 vakua União Sovietika na vakua ku likuatasiana navo vakevo va puile muangana va ku nolote. Mu 1991 União Sovietika ya sanduokele, kaha mu nima ya ntsimbu Rússia na vakua ku likuatasiana nayo, vakevo va puile muangana ua ku nolote.
Mikanda Isaya 61:1; Mal. 3:1; Luka 4:18

Vupolofeto: Yehova a ka tuma “kanganda” keni mu ku viukisa njila ntsimbu kanda Vuangana vua Njambi va vu tumbike. Civunga caco ci ka putuka cipanga ca ku ambulula “zimpande zia cili kuli vakua ku konkama.”

Ku Lipuisamo: Tunde mu 1870 Charles Taze Russell na vakuavo va fuitanganene mu ku lombolola vusunga vua mu Mbimbiliya. Mu miaka ya 1880 va putukilile ku handeka nguavo, vangamba va Njambi va tondeka ku ambulula. Va tuhuile vimpande mu mikanda, ngeci mua “Ku Tondeka Vakua ku Ambulula Likulukazi” na “Va tu Vuavesa mu ku Ambulula.”
Mukanda Mat. 13:24-30, 36-43

Vupolofeto: Citozi a kuna muila mu lihia lia tiliku kaha va u tavesa u kolele hamo na tiliku na ku ntsimbu ya ku tia; kaha muila va u tepa na tiliku.

Ku Lipuisamo: Tunde mu 1800 Vakua Kilistu va vusunga va putukile ku litepa na Vakua Kilistu va makuli. Kuno ku matangua a ku kotokela, Vakua Kilistu va vusunga vali na ku va kungulula, kaha va litepa na Vakua Kilistu va makuli.
Mukanda Ndan. 2:31-33, 41-43

Vupolofeto: Viliato via vutale na vuma via tumpukile ku kamponia ua ku panga na vutale vua ku liseza-seza

Ku Lipuisamo: Vuma vuemanena vantu va ye ku sika nguvulu ya Anglo-Amerika. Vunoni vantu vaco ve ku luisa nguvulu yaco naua. Ava vantu vaco ve ku zeyesa ndzili yei nguvulu ya ku sika ngue vutale
Mukanda Mat. 13:30; 24:14, 45; 28:19, 20

Vupolofeto: “Tiliku” va ka i kunguluila mu “visete” na ku hangula “mukuamanda ua cili mukua mana” mu ku niunga vakua ndzivo. Cipanga ca ku ambulula “muzimbu ua cili ua vuangana” ci ka putuka ku lisanduoka mu “vifuti viose.”

Ku Lipuisamo: Mu 1919 Yesu ua hanguile mukuamanda ua cili mukua mana mu ku tuamenena vangamba va Njambi. Tunde mu muaka uze, vakua ku lilongesa Mbimbiliya va vuezele ku cipanga cavo ca ku ambulula. Lelo lino Vakaleho va Yehova ve ku ambulula mu vifuti vi tuvakana 200 kaha ve ku tuhula mikanda ya longesa via Mbimbiliya mu malimi a tuvakana 1.000.
Mikanda Ndan. 12:11; Ku-So. 13:11, 14, 15

Vupolofeto: Kasitu ua vimbinga vivali, ua lekele vakua mavu linga va pange kamponia ka kasitu na ku hana muku ku kamponia.

Ku Lipuisamo: Nguvulu ya vakua Anglo-Amerika ya tuamene ku lutue mu ku panga Liga das Nações. Vakua vifuti vieka navo va li pandakanene na civunga caco. Mu nima ya ntsimbu, muangana ua ku nolote neni ua kovelele mu civunga caco, vunoni tunde lika mu muaka ua 1926-1933. Ngeci mua vakua Nações Unidas, vakua Liga das Nações navo veku va hana ku sangaziala, cize ca pande ku vu hana ku Vuangana vua Njambi.
Mukanda Ndan. 8:23, 24

Vupolofeto: Umo muangana ua vutenu, a ka pihisa mu ku komouesa.

Ku Lipuisamo: Ca ku muenako, mu ku hita ca ndzita ya mu civali ya mavu ose, vakua Estados Unidos vapihisile viuma via vingi ku tuvakana na ku ntsimbu ya ku nima. Kaha va uisilile matendangongi avali a kama mu cifuti ca citozi cavo.
Mikanda Ndan. 11:31; Ku-So. 17:3, 7-11

Vupolofeto: “Kasitu ua ku tila ngengu” ua vimbinga likumi a ka tuhuka mu cina ka cesi na masima kaha ikeye muangana ua mu citanu na vatatu. Livulu lia Ndaniele lia tumbula muangana uaco ngualio, “vupi vuze vu neha mupulungua.”

Ku Lipuisamo: Liga da Nações ya likelele ku panga, mu ku hita ca ndzita ya mu civali ya mavu ose. Mu nima ya ndzita va ka tumbikaho Nações Unidas. Kaha ngeci muze mu va lingile na Liga, Nações Unidas nayo va ka i hana vumpahu ni nguetu ku sangaziala cize ca pande ku ci hana ku Vuangana vua Njambi. Nações Unidas i ka nongesa malombelo.
Mikanda 1 Tes. 5:3; Ku-So. 17:16

Vupolofeto: Vakua vifuti va ka tambeka nguavo “kua holo tu novoka” kaha “vimbinga likumi na kasitu” va ka luisa “mpuevo ua lipangala” na ku mu nongesa. Mu nima yaco kaha vifuti navio va ka vi nongesa.

Ku Lipuisamo: Citava vakua vifuti va ka lihalesa nguavo, va na hasa ku neha ciyulo na ku lembama ha mavu. Kaha vifuti via lipandakana mu Nações Unidas, vika nongesa malombelo a makuli ose. Ou ukeuo mutamba ua katete ua lamba ya kama. Kaha lamba yaco i ka hua omo vakua mavu ose va ka va nongesa ku Alemangendo.
Mikanda Ezek. 38:11, 14-17; Mat. 24:31

Vupolofeto: Ngonge a ka ya mu ku luisa cifuti ca vantu va Njambi. Kaha tungelo va ka kungulula vaze va ku hangula.

Ku Lipuisamo: Muangana ua ku nolote hamo lika na vinguvulu viose via mavu vi ka luisa vantu va Njambi. Mu nima ya ku putuka ceci ku luisa, visupo via vaze va ku vuavesa va ka lisupa hano ha mavu va ka ya muilu.
Mikanda Ezek. 38:18-23; Ndan. 2:34, 35, 44, 45; Ku-So. 6:2; 16:14, 16; 17:14; 19:20

Vupolofeto: A ka hiana mu ku vula Ngonge na civunga ceni ca masualale. Kasitu va ka mu mbila mu cisali ca tuhia kaha uze kamponia ua kama va ka mu nongesa.

Ku Lipuisamo: Yesu, Muangana ua Vuangana vua Njambi a keza mu ku mu ku ohiela vantu. Kaha hamo lika na va 144.000 na vivunga via masualale va muilu ni nguetu tungelo va keza mu ku nongesa civunga ca vakua vifuti, kaha na pulitika yose ya mu mavu a Satana.