Va Tuecelele Ambe Vene Ntsimbu Kanda ku Kale Cikombelo

Yehova ue kuecela vipi vietu ku hitila lika mu cikombelo ca fuetele Yesu na maninga endi. (Efe. 1:7) Vunoni Mbimbiliya nguayo: “[Njambi] ua sompelele vulemu ku vipi vize via ku linga laza,” ni nguetu, tele kanda Yesu a hane cikombelo. (Loma 3:25) Vati Yehova ua sompelele, ni nguetu uecelele vipi tele Yesu kanda a fuete cikombelo na ku tualelelaho ku pua Njambi mukua vuviuke ha ntsimbu imo lika?

Kuli Yehova ca puile vene ngue na fuete laza cikombelo, mua kulahesele via “mbuto” yi kovola vaze va tsilielela muli Ikeye kaha na mu vikulaheso viendi. (Njen. 3:15; 22:18) Njambi ua tantekeyele ngecize, Muaneni ue ku hanene cikombelo mu ntsimbu ya hangula Ikeye. (Ngal. 4:4; VaHe. 10:​7-10) Yesu mua kele ha mavu, Yehova ua mu hele mpoko ya kuecela vipi tele kanda a fuete cikombelo. Yesu ua lingilemo muomu ua tantekeye ngecize cikombelo ce ku hanene, ce kuecelele vipi via vakua ku tsiliela Yehova.—Mat. 9:​2-6.