Viuma vi mi Kuasa ku Lilongesa Kusua Kumo

VUNO CE ku mi kaluuila ku lilongesa mu vulika simanu ku simanu ni? Vuno vintsimbu vimo ku lilongesa Mbimbiliya ce ku mi futula ni? Nga mukemuo, kati yenu lika. Vunoni aci singaniekenu vi tue ku linga tangua na tangua, ngeci mua ku tana. Ku handeka vusunga, ce ku tondeka ntsimbu na ku lihakela kapandi, vutuhu ngoco tue ku livua mua cili nga tua lele. Na vuno vene, ku lilongesa Mbimbiliya ce ku tu vuisa mua cili. (Efe. 5:26) Tu hilulenu viuma vi hasa ku mi kuasa:

• Litumbikilenu programa. Cilongesa ca Mbimbiliya ca mu vulika capua cimo ca viuma “via hiana ku viuka,” ni nguetu, viuma via seho via pande ku linga Mukua Kilistu. (Filp. 1:10) Linga kati mu suve ntsimbu ya ku lilongesa, sonekenu ha lipapelo ntsimbu yaco na litangua. Kaha hakenu lipapelo liaco ha mu hasa ku limona vuasi. Ni hakenu alarme mu telefone yipue na ku mi vuluisa, nga ntsimbu ya ku lilongesa ili mu hiehi.

• Lilongesenu mu cifua ci miasiuila. Ca ku muenako, vuno ka mue ku tanguka vuasi na viuma vieka nga mu lilongesa ntunda ya kama ni? Vuno mue ku tonda ku lilongesa mu ntsimbu ya yindende kusua kumo ni? Yenu mu tantekeya vuino viuma vika vie ku mi puila via viasi. Ngeci mukemuo, tualenu mana ku viuma viaco, omo mu tumbika ntsimbu ya ku lilongesa. Nga ntsimbu ya ku lilongesa mu vulika ya hete, vunoni ka muesi na cizango ca ku lilongesa ha ntsimbu yaco, citava mu lilongese ambe mu viminutu 10. Ci li ku lutue ku lilongesa mu viminutu 10 ku hiana ku kala ca ku hona ku lingamo. Nga mu lingamo, mu kevua cizango ca ku vueza ku ntsimbu ya ku lilongesa.—Filp. 2:13.

• Hangulenu vua lumo vi mu ka lilongesa. Nga mu pua na ku singanieka lika ha vika mu ka lilongesa, ka mu ka pangesa vuino “ntsimbu” yenu. (Efe. 5:16) Setekenu ku soneka vimo vilongesa ni vimpande vi mu tonda ku lilongesa. Ca ku muenako, nga kuli vimo ka mue kuivuisisa, vi hakenu ha mukana ua viuma vi mu tonda ku lilongesa. Kaha munima ya nkala cilongesa, mu hasa ku vuezako vikuavo vi mu tonda ku lilongesa.

• Alululenu vimo nga ci tondeka. Ca seho kupua na ku linga cilongesa cenu simanu ku simanu. Linga mu vi puisemo, nga ci tondeka alululenu litangua na ntsimbu ya ku lilongesa, ntsimbu ingahi na vimpande vi mu tonda ku lilongesa.

Nga tupua na ku lilongesa mu vulika simano ku simano, vusamba vuetu na Yehova vu kaniama, tu ka hasa ku linga vihangula via cili mu muono.—Yeho. 1:8.