ANO MAVU ALI MU LIUAYANGA

3 | Likatenu na Vakuenu

OMO LIA VIKA CA PUA CA SEHO

Ku sakalala mutima omo lia liuayanga lia mavu, ce ku lingisa vantu vavengi ku hona ku likata naua na vantu va va lema.

Vantu ve ku sondoloka vavusamba vavo.
Vaze va liambata ka ve ku limuesa naua ngozi.
Visemi ka ve ku tuala mana ku visoti via vana vavo.

Vi mua Pande ku Tantekeya

Vavusamba va pua va seho muomu ve ku tu kuasa ku kala na cihindu ca cili ca ku muvila na ca mu visinganieka, cikumakuma mu vintsimbu via vikalu.
Ku sakalala mutima omo lia liuayanga lia ano mavu, ci hasa ku haka vusoko vuenu mu vieseko ka mua lavelele.
Nga vanike va mona ni ku halakana mizimbu ya ku vihia, va hasa ku yoya mu liova.

Vi mu Hasa ku Linga mu Ntsimbu Ino

Mbimbiliya nguayo: “Kavusamba a lema ntsimbu yose; na muanetu na semuuila mu ku kuasa ku lamba.”—Visimo 17:17.

Vavusamba va hasa ku tu kuasa na ku tu hana vimamuna via cili. Ku tantekeya ngecize kuli umo ua tu haka seho, ci hasa ku tu hana ndzili ya ku kolesa mu visoti.

VATI MU HASA KU LINIUNGA?—Viuma vi Hasa ku mi Kuasa

Nga liuayanga lia katuka, likatenu na vakuenu mu ku kava evi vinanga

KANIAMESENU VULO VUENU

Kaniamesenu Vulo Vuenu

Mbimbiliya nguayo: “Vavali va hiana umo . . . Muomu nga va ku ua, uze umo a ka zundula mukuavo.” (Ekelesiaste 4:9, 10) Vaze va liambata, va na pande ku pangela hamo ngue vakua ku zavula vuato, kati ngue vitozi.

Lihakelenu kapandi ka ku hona ku litulila matoto umo na mukuavo. Kalenu na lukakatela.
Lingenu cose mu simutuile na mukua ndzivo yenu ambe lumo lika mu simano ku tuala ha vimo visoti. Tualenu mana ku ku manusula cisoti kati ku litengulukila na mukua ndzivo yenu.
Uanenu ntsimbu ya ku linga hamo lika viuma vi mua lema.
Vulukenu vintsimbu via cili vi mua kele hamo lika mu ndzolela, ngeci mua ku tala vikupulo via vulo vuenu ni vikuavo vieka via mi vuisile ndzolela.

“Va yala na mpuevo halumo ka va hasa ku litombola mu viose, vunoni eci ka ca lombolokele ngecize ka va hasa ku pangela hamo. Va hasa ku hangula vimo viuma hamo lika, mu nima yaco va pangela hamo linga va puisemo vutumbe vuavo.”—VaDavid.

TUALELENUHO KU LIKATA NA VAVUSAMBA VENU

Tualelenuho ku Likata na Vavusamba Venu

Mu cihela ca ku tambula lika vukuasi ku vavusamba, singaniekenu ha vinjila vi mu hasa ku va kuasa. Nga mu kaniamesa vakuenu, mu ka likaniamesa nenu naua.
Menekenu vamo vavusamba venu tangua na tangua mu tantekeye vati vali.
Hulenu vavusamba venu va mi leke vati va vulile visoti vi muli na ku pinda navio.

“Mu tue ku hita mu visoti via ku linga na ha meso vui, vavusamba va hasa ku tu kuasa. Va hasa ku tu sungamesa ni ku tu vuluisa viuma vi tu tantekeya laza. Vavusamba ve ku tu haka seho muomu va tantekeya ngecize netu tua va haka seho.”—VaNicole.

PUENU NA KU KUASA VANA VENU

Puenu na ku Kuasa Vana Venu

Mbimbiliya nguayo: ‘Zangulenu mu ku ivua, livandekenu mu ku handeka.’ (Tiango 1:19) Ku vuputukilo, vanike va hasa ku likanuuela ku handeka vati ve ku livua. Vunoni nga mu muesa lukakatela mu ku va halakana, mu ka va kuasa ku livua ku zituka.

Lingisenu vana venu va livue ku zituka mu ku handeka vati ve ku livua. Vamo vanike ve ku zituka mu ku handeka ha ntsimbu i muli na ku linga vieka ni nga muli na kuya kumo, kati ha ntsimbu i mu va sana mpundu na ku va tumbika.
Lingenu cose linga vana venu kati va tale ni ku halakana cikuma mizimbu ya ku vihia.
Kuasenu vana va tantekeye vinanga vika mu na puisamo linga mu hase ku niunga vusoko.
Likuminienu vi mu ka linga nga vimo vi mi tungumuna, kaha puenu na ku hitulukamo na vana venu.

“Simutuilenu na vana venu kaha va kuasenu va livue ku zituka mu ku handeka vati vali na ku livua. Halumo vali na ku sueka viuma vie ku va vuisa liova, ku vomisa mitima ni ku va nienguesa. Va lekenu nguenu nenu mua pindaho laza na vitanga viaco, kaha va lekenu vika via mi kuasele ku vi vula.”—VaBethany.