Yala Ua Ku Simpa

OMO vantu va putukile ku lana ha mavu, cingi cavo va kele na ku linga via ku pihia ngeci mua Kaini. Vunoni kua kele yala umo ua puile mukua vilinga via cili. Lizina lieni Enoke. Enoke ua puile yala ua ku simpa. Vantu vose va yoyele ku ntsimbu yeni va kele na ku linga lika via ku pihia, vunoni Enoke ua tualeleho ku pangela Njambi.

Ua tantekeya omo lia vika vaze vantu va ku nima va pangele viuma vi ku pihia? A ci singanieke Iya ua lingisile Andama na Eva ku muesa lisino kuli Njambi, mu ku lia ku vusuka vua va mamuine Njambi ngueni kati va lieko? Eyo, uze kangelo ua mupi mu Mbimbiliya va mu luka nguavo Satana. Kaha ikeye a li na ku eseka ku lingisa vantu vose vapue va ku pihia.

Tangua limo Yehova Njambi ua lekele Enoke ku ambulula muzimbu umo vantu ka va tondele ku u halakana. Muzimbu uaco, ou: ‘Tangua Njambi a ka nongesa vantu vose va ku pihia.’ Vantu va nienguele cikuma mu va vuile uno muzimbu. Halumo va tondele ku tsiha Enoke. Ngeci mukemuo Enoke ua pandele ku simpa cikuma mu ku leka vaze vantu viuma via tondele ku linga Njambi.

Njambi ka tavele Enoke ku yoya miaka ya ingi ha kati ka vaze vantu va ku pihia. Enoke ua yoyele lika miaka 365. Vika tu handekela nguetu “miaka 365 lika”? Muomu vantu ku ntsimbu ize va puile va ku kola ku tuvakana ku matangua ano ngeci va yoyele miaka ya ingi. Muana Enoke, Metusela ua yoyele miaka 969!

Mua tsile Enoke, vupi vua lanene cikuma. Mbimbiliya ya handeka nguayo ‘visinganieka via vantu via puile via ku pihia ntsimbu yose’ kaha ‘mavu a sulile na luozi.’

Ua tantekeya omo lia vika vupi vua lanene ku matangua aze? Muomu Satana ua uanene njila yeka ya ku lingisa vantu va pange vupi. Tu ka lilongesavio mu cilongesa ci na hatako.