Via Lingisile Mosesa Ku Tina

TALA Mosesa mua tina mu Ingito. Ua mono ava vamala va li na ku mu sekula, ni? Vika va tonda ku mu tsihila? Tu ci tale ni tu hasa ku vi tantekeya.

Mosesa ua kolelele ku ndzivo ya Falao, muangana ua Ingito. Ua puile yala umo ua mana na ku tsimana cikuma. Mosesa ua tantekeyele ngueni ka puile kaIngito, vunoni visemi vieni mpundu vapua vaIsaleli vaze vandungo.

Mosesa mua kele na miaka 40. Tangua limo ua ile mu ku mona vaIsaleli. Ua ka uanene tele vali na ku va yandesa cikuma. Ua muene kaIngito a li na ku veta umo ndungo ua kaIsaleli. Kaha Mosesa ua tala oku noku, na umo ua monekele uahi, ngeci ua tinguile kaIngito na ku mu tsiha kaha ua sitika civimbi ceni mu museke.

Lia mukuavo, Mosesa ua ile naua mu ku mona vaIsaleli. Ua singaniekele ngueni a hasa ku va kuasa linga va patuke ku vundungo. Vunoni ua muene vaIsaleli vavali va li na kuli veta, kaha ua hulile uze ua kele na ku veta mukuavo ngueni: ‘Vika u li na ku vetela mukuenu?’

Kaha uze yala ua mu kuania ngueni: ‘Iya ua ku puisa muata ni ngazi hakati ketu? U tonda ku nji tsiha ngue muze mu ua tsihile uze kaIngito, ni?’

Ngeci Mosesa ua vuile vuoma vua kama. Ua muene ngueni nkuma vantu va tantekeyele vize via lingile kuli mu kua Ingito. Falao neni ua vi vuile, ngeci ua tumine vantu linga va ka tsihe Mosesa. Evi vikevio via tinisile Mosesa mu Ingito.

Omo Mosesa ua fumine mu Ingito ua tininine ku laako, ku cifuti ca Mindiane. Kuze ua ka uaneneko Yetolo na vusoko vueni, kaha ua ka ambatele umo ua vana veni va vampuevo, lizina lieni Zipola. Mosesa ua puile kaniungi ka vampanga va Yetolo. Ua kele ku Mindiane miaka 40. Omo ua puisile miaka 80. Tangua limo, Mosesa ua kele na ku lisa vampanga va Yetolo kaha kua solokele cimo cuma ca mu komouesele cikuma kaha ca aluluile muono ueni uose. Fukula lifo li na hatako linga tu cimone..