Mosesa Na Alone Va Ya Kuli Falao

MOSESA mua hilukile ku Ingito, ua ka lekeleko muanaye Alone vikomoueso viose via muene. Kaha omo Mosesa na Alone va muesele vikomoueso viaco ku vaIsaleli, vose va tavele nguavo nkuma Yehova ua kele navo.

Kaha Mosesa na Alone va ile kuli Falao. Va ka mu lekele nguavo: ‘Yehova, Njambi ya Isaleli ngueni: “Tuma vantu vange va ye matangua atatu mu ku ka nji lemesa mu zindinda”.’ Falao ua kumbuluile ngueni: ‘Ka nja tsilielele Yehova. Ka nji ka tavesa vana va Isaleli ku ya.’

Falao ua nienguele, muomu vantu va tondele ku likela vipanga linga va ka lemese Yehova. Ngeci ua vuezelele ku mapakeso. Kaha vaIsaleli va liniengele kuli Mosesa nguavo ikeye ua lingisile va vuezelele ku mapakeso avo, kaha Mosesa ua vuile vusiua. Vunoni Yehova ua mu simpisile linga kati ome mutima, mu ku mu leka ngueni: ‘Nji ka lingisa Falao ku tavesa vantu ku ya.’

Mosesa na Alone va ile naua kuli Falao. Hano honi va ka lingile cikomoueso. Alone ua mbilile mulamu ueni ha mavu kaha ua himpukile linoka ua kama. Vunoni vakua mahesi va Falao navo va mbilile milamu yavo kaha ya himpukile manoka. Vunoni Tala! Linoka ua Alone a li na ku mina manoka a vakua mahesi. Kasi Falao ka tavele ku ecela va Isaleli.

Ntsimbu ya hetele linga Yehova a hetule Falao. Ua tantekeya vati ua lingile, ni? Ua nehele vipupu ni nguetu tuyando tua kama tua ku pua 10, mu Ingito.

Munima ya vipupu via vingi, Falao ua tumine ku ka hianga Mosesa kaha ua mu lekele ngueni: ‘Likele honi ku linga vipupu nji ka eca vana va Isaleli linga va ye.’ Vunoni omo vipupu via likelele, Falao kasi ka tavele ku aluluka ku mutima. Ua vindikile vantu ku ya. Vunoni mu nima ya vipupu 10, Falao ua ecele va Isaleli. Ua tantekeya vipupu viose 10 ni? Fukula ha lifo li na hatako linga tu li longesevio.