Kuzavuka Ndonga Ya Yondau

TALA! vaIsaleli va li na ku zavuka Ndonga ya Yondau! Vunoni mema ahimo. A nai kulihi? Muomu ntsimbu ya luindza, kue ku noka mema a engi, eyi ndonga vuovuno-vuno i na puile ya ku sula. Vunoni mema ose anomu! Kaha vaIsaleli vali na ku zavuka ha livu lia ku uma, ngue muze mu va zavukile Cisali ca ku Tila! Vuno mema a nai kulihi? Tu ci tale.

Omo ntsimbu ya hetele linga vaIsaleli va zavuke Ndonga ya Yondau, Yehova ua lekele Yehosua linga a leke vantu ngueni: ‘Vasasendote va na pande ku ambata cikasa ca litavasiano na ku hita ku lutue. Omo va ka haka viliato viavo mu Ndonga ya Yondau kaha mema a koma’.

Kaha vasasendote va ambatele cikasa ca litaviasiano na ku hita ku lutue lua vantu. Omo va ka hetele mu Yondau, vasasendote va sikulukile mu ndonga. Mema a kele na ku lua cikuma kaha naua ndonga yaco ya puile ya lova. Vunoni omo viliato viavo via hetele ku mema, kaha mema putukile ku uma! Ca puile Cikomoueso! Yehova uemikile mema ku cihava. Mu ntsimbu ya indende mema ose omine mu ndonga!

Vasasendote vaze va ambatele cikasa ca litavasiano va ile mpundu ha kati ka ndonga ya ku uma. U hasa ku va mona ha fikula, ni? Omo va manene ha kati, kaha vaIsaleli vose va zavukile Ndonga ya Yondau ha livu lia ku uma!

Omo vantu vose va zavukile ndonga, Yehova ua handekele na Yehosua linga a tume vamala 12 va ngolo ngueni: ‘Hamenu ha kati ka ndonga haze ha va na mana vasasendote na cikasa ca litaviasiano. Mu ka tentulaho mavue 12 kaha mu ka a lundika ku cihela ci mu ka kosa vutsiki vua lelo. Kaha ku miaka ya ku lutue, omo vana venu va ka mi hula nguavo vuno aa mavue a lomboloka vika, mu na pande ku ka va leka nguenu, mema a manene mu va zavuisile cikasa ca Yehova mu ndonga ya Yondau. Ano mavue a ka mi vuluisa cikomoueso caco!’ Kaha Yehosua neni ua lundikile mavue 12 ha kati ka ndonga haze ha va manene vasasendote.

Kaha mu nima ya viose, Yehosua ua sanene vasasendote va ambatele cikasa ca litavasiano ngueni: ‘Kandukenu mu Yondau’. Kaha omo va kele na ku kanduka mema a putukile naua ku hita lueka.