Litangua Lia Manene

TALA Yehosua. Ali na ku tambeka ngueni: ‘Litangua, mana ngoco!’ Kaha litangua lia mana. Lia manene mu kati ka lilu, litangua lia mutuntu. Yehova ikeye ua li imikile! Vunoni tu ci tantekeye vika via lingisile Yehosua ku vundila linga litangua li mane.

Vamiangana vatanu va ku cifuti ca Kanana va na putuka ku lua na vakua Ngiveone, ngeci vakua Ngiveone va na tumu ku ka hianga Yehosua linga a ku vohiele. Nguavo: ‘Tuaya kuno vuasi vuasi! Ua ku tuohiele! Vamiangana vose va ku mincinda va neza mu ku tu luisa.’

Kaha Yehosua na masualale veni va ileko. Va cauile vutsiki vuose. Mu va na ku heta ku Ngiveone, masualale va vamiangana vatanu va vuile vuoma ngeci va na putuka ku tina. Kaha Yehova ua nokesa mavue a kama muilu, masualale va vengi va na tsi ku civue, ku tuvakana vaze va va na tsihi masualale va Yehosua.

Yehosua na mono ngueni litangua vuovuno li lahuka. Nga milima iza masualale va vengi va vaze vamiangana vatanu, va tina. Vikevio via na vundila Yehosua kuli Yehova kaha na ku handeka ngueni: ‘Litangua, mana ngoco!’ Kaha omo litangua lia manene, vaIsaleli va hasele ku manusula ku lua ndzita na ku vula vitozi vavo.

Mu cifuti ca Kanana mua ku sula mua vamiangana va ku pihia, va zinda Njambi. Yehosua na masualale veni va ambatele miaka itanu na umo linga va hase ku vula vamiangana 31 va mu Kanana. Mu nima ya viose, Yehosua ua putukile ku tepela cifuti ca Kanana vaIsaleli.

Mua hitile miaka ya ingi, amba vuose Yehosua ua tsile, tele a li na miaka 110. Tele ikeye na vavusamba vueni tele va ci li na muono, vantu vononokele kuli Yehova. Vunoni mu va tsile ava vamala va cili, vantu va putukile ku linga vupi ngeci va kovelele mu visoti. Aha hakeho ha tondekela mpundu linga Njambi a vohiele.