Yesu Uononokele Ntsimbu Yose

Vuno ue ku ononoka visemi viove ni?— Vintsimbu vimo ca pua ca cikalu. Ua tantekeya nguove Yesu uononokele Yehova na visemi veni, ni?— Ku kava via lingile ci ka ku kuasa ku ononoka visemi viove, ambe ha vintsimbu via vikalu. Tu ci lilongese mua cili eci cimpande.

Yesu tele kanda eze ha mavu, ua kele na Ise Yehova, muilu. Vunoni Yesu ua kele naua na visemi hano ha mavu. Mazina avo Yosefe na Maliya. Ua tantekeya vati va puile visemi vieni ni?—

Yehova ua nunguluile muono ua Yesu muilu, na ku u haka muzimo lia Maliya, linga a ku semukile ha mavu. Eci ca puile cikomoueso! Yesu ua kolele muzimo lia Maliya ngue mu ve ku kola tukeke vose mu mazimo a vanayavo. Yesu ua semukile mu nima ya vingonde 9. Ngeci Maliya na yalieni Yosefe, va puile visemi va Yesu hano ha mavu.

Mua kele na miaka 12, Yesu ua lingile vimo via muesele ngecize ua lemene cikuma Ise ua muilu Yehova. Ua lingilemo mua kele na ku enda vungendzi vua laha, vua ku ya ku Yelusalema ku Pasovala na visemi vieni hamo lika na vantsongo veni vose. Mu va kele na ku hiluka kuimbo, va Yosefe na Maliya va putukile ku tonda Yesu vunoni ka va hasele ku mu uana. Ua tantekeya ku va ka mu uanene ni?—

Yosefe na Maliya va hilukile vuasi ku Yelusalema kaha va mu tondele mu mbonge yose. Vomine cikuma mitima muomu ka va hasele ku mu uana. Vunoni mu nima ya matangua atatu, amba vuose va ka mu uanene mu tembele! Ua tantekeya omo lia vika Yesu ua kele ku tembele?— Muomu kukekuo kua hasele ku lilongesa via Ise Yehova. Ua lemene Yehova, ngeci ua tondele ku lilongesa vati a hasa ku mu ya ku mutima. Omo ua kolele na ku pua yala, Yesu kasi uononokele Yehova ntsimbu yose, cipue ha vintsimbu via vikalu ambe nga ca monekele ngecize a ka yanda. Vuno Yesu uononekele na kuli va Yosefe na Maliya ni?— Eyo, nguayo Mbimbiliya.

Vika u hasa ku lilongesa ku lungano lua Yesu?— Ua pande ku ononoka visemi vove ambe ha vintsimbu via vikalu ku linga ngoco. U ka vononoka ni?—