Tavenakulu ya ku Lemesela

Omo Mosesa ua kele ku muncinda ua Sinayi, Yehova ua mu lekele a tunge mbalaka ya ku lifuila i va luka nguavo tavenakulu, mu va pandele ku lemesela Yehova. Tavenakulu yaco ca tavele ku enda nayo mu vungendzi vuavo.

Yehova ua handekele ngueni: ‘Leka vantu va lambule nkala viuma vivali navio mu ku tungisa tavenakulu.’ Ngeci vaIsaleli va nehele, olu, palata, nkengelezi, mavue a seho na viuma vikuavo vi ve ku zala vantu mu ku liviukisa. Va hanene naua maka, liniu, vilambu, na vikuavo via vingi. Va muesele vuhuanga vua kama ngeci Mosesa ua va lekele ngueni: ‘Ku nahu vi na pumo! Kati mu nehe naua vikuavo.’

Kua kele vamala na vampuevo vakua vutongue vavengi va kuasele ku ku tunga tavenakulu. Yehova ua va hele mana a ku linga vipanga viaco. Vamo va kele na ku osa, ku tonga, ni ku pilieka. Vamo va sungamesele mavue, va pangele na olu na ku songa mavaya.

Vantu va tungile tavenakulu muze mpundu mua va sikile Yehova. Va tungile ntanga ya cili ya tepele tavenakulu ha kati, Cihela ca ku Lela na Cihela ca ku Lela Cikuma. Mu Cihela ca ku Lela Cikuma mukemuo mua kele cikasa ca litavasiano. Va ci pangele na mavaya a akasia na olu. Mu Cihela ca ku Lela mua kele ndeya ya olu, mesa na mutula ua ku tsimikila mazi a vueko vua cili ni nguetu insensu. Mu lipela lia ha mbandza mua kele mbasiya ya nkengelezi na mutula ua kama. Cikasa ca litavasiano ca vuluisile vaIsaleli cihulaheso ca ku ononoka Yehova ci va lingile. U tantekeya vika via pua litavasiano ni? Lia pua ku likuminia cuma ca seho ya kama.

Yehova ua hanguile Alone na vana veni va pue vasasendote ku tavenakulu. Cipanga cavo ca puile ku niunga tavenakulu na ku hana vikombelo kuli Yehova. Sasendote ua kama, Alone, ikeye lika ua kele na mpoko ya ku kovela ku Cihela ca ku Lela Cikuma. Ua kele na ku kovelako lumo mu muaka, mu ku ka linga cikombelo ca vupi vueni, vua vusoko vueni na vua cifuti cose ca Isaleli.

VaIsaleli va manusuile ku tunga tavenakulu mu nima ya muaka umo, mu va tundile ku Ingito. Tunde ha litangua lize vaIsaleli va kele honi na cihela ca ku lemesela Yehova.

Yehova ua sulisile tavenakulu na vumpahu vueni, kaha limo liselua lia fuikile tavenakulu yose. Nga liselua lili helu lia tavenakulu, vaIsaleli va vandamenene. Vunoni nga liselua li na katuka, va tantekeyele ngecize ntsimbu ya ku tualelelaho vungendzi ya puilemo. Va ambatele tavenakulu na ku kava liselua..