Ku Simpa ca Yehoyanda

Yezevele ua kele na muaneni ua mpuevo ua lizina Ataliya, neni ua puile ua mupi ngeci mua naye. Ataliya ua sombokele kuli muangana ua Yunda. Kaha omo yalieni ua tsile, muanene ua yala ua suanene ha vuangana. Vunoni omo muaneni neni ua tsile, Ataliya ua lisuanesele ikeye ivene ha vuangana mu ku sika Yunda. Ua setekele ku nongesa cikota ca vuangana mu ku tsiha vose vakua vusoko vua muangana, linga kati va suane ha vuangana, ua tsihilile kumo na vatekulu veni ivene. Ngeci mukemuo vantu vose va kele na vuoma vueni.

Sasendote ua Kama Yehoyanda na mpueyeni Yehoseva, va tantekeyele viuma via vipi via kele na ku linga Ataliya. Vutuhu ngoco, va hakele muono uavo mu vusonde mu ku sueka umo mutekulu ua Ataliya, kakeke u va lukile Yehoase. Va mu lelele ku tembele.

Omo Yehoase ua mpuisile miaka 7, Yehoyanda ua kunguluile vamiata vose na vaLevi, kaha ua va lekele ngueni: ‘Niungenu vimbelo via tembele, kaha kati mu tavese na umo uahi a kovelemo.’ Kaha Yehoyanda ua puisile Yehoase muangana ua Yunda, kaha ua mu zikile cilongo ku mutue. Ngeci mukemuo vantu va tambakanene nguavo: ‘Muangana yoya miaka ya ingi!’

Ataliya mua vuile muyoyo ua mbunga ya kama, ua ile lusi ku tembele. Omo ua muene muangana ua muha, ua tambekele ngueni: “Vungungu! Vungungu!” Kaha haze vene vamiata va mu kuatele na ku mu tuala, kaha va ka mu tsihile. Ambaco vati va lingile viuma via vipi via sile mu cifuti?

Yehoyanda ua kuasele vantu ku linga litavasiano na Yehova mu ku mu kulahesa nguavo va ka lemesa lika Ikeye. Ngeci mukemuo, Yehoyanda ua tumine ku puzula vitembele via Mbale na tumponia vose. Ua hanguile vasasendote na vaLevi va ka pangele ku tembele linga vantu va hase ku lemesa Yehova naua. Ua hanguile naua vakua ku niunga vimbelo via tembele linga kati mu kovele na umo uahi ka lelele. Kaha Yehoyanda na vamiata va tualele Yehoase ku nganda na ku mu suanesa ha cituamo ca vuangana. Vantu mu Yunda va viukililile cikuma. Muomu va patukile kuli Ataliya na ku ku lemesa ca Mbale, mu ku pangela lika Yehova. Ua mono vati ku simpa ca Yehoyanda ca kuasele vantu vavengi ni?