CILONGESA 52

Seho ya Kala ha Zalesi Yetu na Cifua ci tue ku Solokelamo

Cifua ci ua Tuhukilamo

Tu vose, tua kala na vizango vietu ku tuala ha ku zala na cifua ci tue ku solokelamo. Nga tu kava vimo vitume via vindende via mu Mbimbiliya, ku zala cetu ka ci pu lika ca cili, vunoni ci kaya Yehova ku mutima. Tu hilulenu vimo vitume viaco.

1. Vitume vika via pande ku pua luvula lua zalesi yetu na cifua ci tue ku solokelamo?

Tua pande ku hangula “vuzalo vua [tu] pande, na ntsoni na ku lipokuesa,” na ku soloka mu cifua ca fuila ku vantu “va litumbula vakua ku lemesa Njambi.” (1 Timoteo 2:9, 10) Tu hilulenu evi vitume viuana: (1) Tua pande ku zala ‘vuzalo vua tu pande.’ Ngue mu mue ku mona ku viuano vietu, etu vangamba va Yehova tue ku zala vuzalo vua ku liseza-seza, vunoni zalesi yetu, vindisi, na tehuisi ya vinkambu, vie ku muesa kasingimiko kuli Njambi yetu. (2) Ku zala “na ntsoni” ca lomboloka ku zala mu cifua cize ka ci katula masungu a vakuetu, ni vi lingisa vantu ku tu tala mua kama. (3) Kaha tue ku zala na “ku lipokuesa” mu ku hona ku kava moda, na nkala zalesi ye ku izamo. (4) Cifua ci tue ku solokelamo, ca pande ku muesa ngecize tua pua tu “vakua ku lemesa Njambi.”—1 Kolintu 10:31.

2. Vati cifua ci tue ku solokelamo, ci hasa ku kuata ku vamuanetu?

Vutuhu tua kala na mpoko ya ku lihanguila vuzalo vuetu, vunoni tua pande ku singanieka ha vati cifua ci tue ku solokelamo, ci hasa ku kuata ku vakuetu. Tue ku linga cose mangana kati tu sevuise vakuetu, vunoni kuya vakuetu ku mitima “na vilinga via cili na ku va kolesa.”—Tandenu Loma 15:1, 2.

3. Vati cifua ci tue ku solokelamo ci hasa ku lingisa vantu va tave ku lemesa ca vusunga?

Tue ku lihakela kapandi ka ku zala vuino ntsimbu yose, vunoni cikuma-kuma nga tuya ku viuano vietu ni mu ku ambulula. Ka tu tondo cifua ci tue ku solokelamo, ci tangule vantu ku muzimbu ua seho u tue ku va tualela. Vunoni ci va koke na ku taleka “luhande lua Njambi Muovole uetu.”—Tito 2:10.

TANTEKEYENU VIKUAVO

Tantekeyenu kapandi ka tu hasa ku lihakela linga vuzalo vuetu na cifua ci tue ku solokelamo, vi kuase vantu ku nongonona ngecize tu Vakua Kilistu.

Vamala vavali va nemana ku lutue lua ngazi, umo na zala vizalo via cili via mingoso, mukuavo co na zala vizalo via ku tavuka, kaha via ku hianesamo na katepa ka vakua mbola. — Cifua ci tue ku solokelamo, ce ku muesa nga tua singimika vaze va kala na mpoko ni kuahi. Vutuhu Yehova ue ku mona vili mu mutima, vunoni cifua ci tue ku solokelamo naco ce ku muesa kasingimiko kuli ikeye

4. Ku soloka vuino ca pua ku muesa kasingimiko kuli Yehova

Vusunga vuka vua kama cikuma vua pande ku tu lingisa ku haka seho ku cifua ci tue ku solokelamo? Tandenu Visamo 47:2, kaha simutuilenu ha vihula evi:

Vati ku tantekeya ngecize tue ku imanena Yehova, ca pande ku kuata ku zalesi yetu?
Mu ku mona cenu, vuno ca tondeka ku tuala mana ku cifua ci tue ku solokelamo nga tuya mu ku kunguluka na ku ambulula ni? Nga eyo, omo lia vika? Nga naua kuahi, omo lia vika?

5. Mua ku lingila vihangula via cili ku tuala ha vuzalo na cifua ci tue ku solokelamo

Talenu VIDEO.

VIDEO: “Lingenu Viose mu ku Lingila Njambi Vumpahu” (10:18)

Ambe nga vizalo vietu via ndando ya kama ni ya indende, via pande ku pua via ku lela kaha via litombola na cihela ci tuli. Tandenu 1 Kolintu 10:24 na 1 Timoteo 2:9, 10. Kaha simutuilenu omo lia vika tua pande ku liniunga ku ku zala ca ku . . .

lifuanieka.
vuzalo vua ku sata, vua ku hulula, ni vua cifua ceka ce ku katula masungu.

Vutuhu Vakua Kilistu ka ve ku kava naua Masiko a Mosesa, vunoni va hasa ku lilongesa via vingi ku tuala ha vati Yehova ue ku muenano cimpande caco. Tandenu Ndeutelonomi 22:5, kaha simutuilenu ha cihula eci:

Omo lia vika ka tua pandele ku zala mu cifua ce ku lingisa vamala ku soloka ngue vampuevo ni vampuevo ku soloka ngue vamala?

Tandenu 1 Kolintu 10:32, 33 na 1 Yoano 2:15, 16, kaha simutuilenu ha vihula evi:

Omo lia vika tua pande ku linga cose linga cifua ci tue ku solokelamo, kati ci suntsuise vantu muimbo ni mu cikungulukilo?
Vifua vika via ku zala na ku liviukisa via lana ku cihela ci mua kala?
Mu ku mona cenu, vuno vifua viaco vi tava kuli Mukua Kilistu ni kuahi? Kaha omo lia vika?

Vamala na vampuevo va vitso via ku liseza-seza, miyati ya ku liseza-seza na vifuti via ku liseza-seza, va na zala vizalo via ku liseza-seza, vindisi na tehuisi ya ku liseza-seza. Vunoni ya litombola na Vukua Kilistu. — Tu hasa ku zala na ku liviukisa mu vifua via ku liseza-seza, vunoni kasi mu njila iya Yehova ku mutima

VAMO VE KU HANDEKA NGUAVO: “Nja kala na mpoko ya ku lihanguila viose vi nji tonda ku zala.”

Nenu mu tava ngoco ni? Nga eyo, omo lia vika? Nga naua kuahi, omo lia vika?

VI MU NA LILONGESA

Mu tue ku linga vihangula via cili ku tuala ku cifua ci tue ku solokelamo, tue ku muesa kasingimiko kuli Yehova na ku vakuetu.

Mpupulule

Omo lia vika zalesi yetu na cifua ci tue ku solokelamo via kala na seho kuli Yehova?
Vitume vika via pande ku tuamenena vihangula vietu ku tuala ha cifua ca ku solokelamo?
Vati cifua ci tue ku solekelamo, ci hasa ku kuata ku cifua ci ve ku muenamo vantu ku lemesa ca vusunga?

Cino cilongesa nji na ci manusula lia:

Lingenu Evi

Lihilulenu mu mone nga ci tondeka ku alulula vimo ku tuala ha zalesi yenu na cifua ci mue ku solokelamo.

Vikuavo:

Vikuavo vi mu hasa ku linga

KONKENUHO

Talenu muzimbu uka halumo zalesi yenu ye ku tuma ku vantu.

“Vizalo via Cifua Cika Nja Lema?” (Cimpande ca mu saiti)

Tantekeyenu vika ca puila ku muesa mana ku singanieka vuino, ntsimbu kanda mu ka lihakese vicato via senga.

“Vika ya Handeka Mbimbiliya ku Tuala ha Vicato via Senga?” (Cimpande ca mu saiti)

Tantekeyenu vitume vikuavo vi hasa ku tuamenena vihangula vietu.

“Vuno Zalesi Yenu ye ku Hana Vumpahu Kuli Njambi Ni?” (Vutala vua Kaniungi, Setembro ya 2016)

Tantekeyenu vati umo mpuevo ua tondele kuya Njambi ku mutima, ua lilongesele cifua ci ve ku zalelamo vakuavo.

“O modo de me vestir e arrumar era minha pedra de tropeço” (Despertai!, 22 de Dezembro, 2003)