Kuasenu Tupuputa va Lilongese via Yehova

1. Vati Yesu ua muesele cikeketima ku tupuputa?

¹ Tele kua lisupile matangua andende linga Yesu va mu tsihe. Mua tundile ku mbonge ya Yeliko, kua kele tupuputa vavali va mu tambakanene nguavo: “Muangana tu vuileko cikeketima!” Vutuhu ua kele na ku singanieka ha viuma via ka lihita navio, uemanene, na ku va sana kaha ua va kanguisile. (Mat. 20:29-34) Vati tu hasa ku temunuina Yesu ku cikeketima ca muesele ku tupuputa?

2. Vati tu hasa ku ambuluila kapuputa mu mbunga?

² Va Kuasenu: Nga mu liuana na kapuputa, halumo mu mbunga, lisololenu na ku mu leka lizina lienu kaha mu hulenu vukuasi vua tonda na ku mu kuasa. Ha katete, tupuputa ve ku uma mitima omo lia vamo ve ku va zangamena ni ku va punda. Vunoni, nga mu muesa vusamba vua vusunga va ka livua ku zituka. Tantekeyenu ngecize vupuputa vua liseza-seza, na vinjila via ku va kuaselamo via liseza-seza. Mu nima ya ku va kuasa, mu hasa ku va leka nguenu muli mu cipanga ca ku longesa Mbimbiliya. Kaha mu tandelenu umo mukanda ngeci mua, Visamo 146:8 ni Isaya 35:5, 6. Nga a hasa ku tanda Braile, mu hulenu nga citava a pue na ku tambula mikanda mu Braile i ka mu kuasa ku lilongesa via vingi mu Mbimbiliya. Mu hasa naua ku mu kuasa ku uana mikanda i va ngalavala mu jw.org. Nga komputador yeni ya kala na programa ya ku tanda mezi a ha ecrã, citava a ka viukilila ku tambula mikanda ya tuhuka laza na mikanda ya hasa ku tupulula mu cifua ca RTF (Rich Text Format).—Talenu cikasa “Mua ku Kuasela Kapuputa . . .”

3. Vati tu hasa ku tonda tupuputa muimbo lietu?

³ Tondenu Tupuputa: Ca pua ca ci kalu ku uana tupuputa mu ku ambulula ca ndzivo na ndzivo, muomu cingi cavo ka ve ku ivua vuino ku handeka na vangendzi ve ku iza ku vindzivo viavo. Ngeci mukemuo, ca tondeka ku lihakela kapandi ka kama ku tonda tupuputa na ku va ambuluila. (Mat 10:11) Ku cipanga cenu ni ku sikola kua kala kapuputa ni? Mu ambuluilenu. Mu tantekeya umo ua kala na kavusoko ua kapuputa ni? Muimbo lienu mua kala cimo cihela ci ve ku niungila tupuputa ni? Nga mukemuo kaha citava mu handeke na vavusoko vavo, ni vaze ve ku va niunga ngueni, Vakaleho va Yehova va lema ku kuasa tupuputa, mu hasa ku va nehela mikanda ya Braile na vikuavo vi va ngalavala. Va muesenu cikulaheso ca mu Mbimbiliya ngecize Njambi vuovuno a ka fumisako vupuputa. Mu hasa naua ku va lekesa video ya mu jw.org“Sem Ela, Eu Me Sentiria Perdido,” ya handeka via umo kapuputa ua yala ue ku uana vukuasi mu ku tanda Mbimbiliya ya Braile. Nga mu lombolola vutumbe vua vungendzi vuenu, eci ci ka hasa ku mi sokoluela njila ya ku handeka mpundu na tupuputa.

4. Vika tu lilongesa ku cimona ca muanetu Janet?

⁴ Umo muanetu ua lizina Janet ua ka menekele ku cihela ku ve ku niungila tupuputa. Ngeci ua putukile ku ambuluila umo muana mpuevo. Janet ua mu lekele ngueni, “Yesu ua kanguisile vamo tupuputa mu ku muesa via ka lingila tupuputa vose.” Va simutuilile via Ku-Solola 21:3, 4, kaha Janet ua lomboluele vati Vuangana vua Njambi vu ka puisamo eci cikulaheso. Muana mpuevo ua holokele, kaha mu nima yaco ngueni: “Kanda nji ci ivue mezi a cili ngeci ku tuala ha tupuputa. Muomu cingi ca vantu ve ku mona, va tsiliela nguavo vantu ve ku pua tupuputa omo lia vumo vupi vu va lingile vavene ni vu va lingile visemi vavo.” Janet ua tumine ou muana mpuevo uaco link ya livulu Vi i Longesa Mbimbiliya, vuovuno ve ku lilongesa Mbimbiliya luvali mu simano.

5. Vutuhu ka tu hasa ku kanguisa tupuputa ngeci mua Yesu, vati tu hasa ku va muesa seho?

⁵ Tua tantekeya nguetu ka tu hasa ku kanguisa tupuputa ngeci mua Yesu. Vunoni tu hasa ku kuasa vose va va na puputisa mu visinganieka kuli Njambi ua ntsimbu ino, hamo lika na tupuputa va meso mpundu, linga va tantekeye vusunga vua mu Lizi lia Njambi. (2 Kol. 4:4) Yesu ua kanguisile vamala vavali ku Yeliko muomu ua va “vuililile cikeketima.” (Mateo 20:34) Netu nga tu haka seho ku tupuputa, tu ka uana ku vezika ca kala mu ku kuasa vakuetu ku lilongesa via Yehova, uze a ka fumisako vupuputa vuose.