Mua ku Pangesela Vitratadu mu ku Putuka ku Simutuila

Tunde mu Janeiro ya 2018, helu lia Mukanda ua Viuano via Muono Uetu Vakua Kilistu na Vipanga Vietu, he ku iza vimueso via mu ku ambulula. Ve ku tu mamuna ku tuala mana ku ku simutuila na vantu, mu cihela ca ku va hana lika mikanda. Mu ku kuasa vakua ku ambulula va tombuese vimueso viavo, vivideo via vimueso vie ku muesa mua ku putukila ku simutuila na vantu mu ku pangesa lika Mbimbiliya. Vuno eci ca lomboloka ngecize nga tu ambulula ku ndzivo na ndzivo ka tua pandele naua ku pangesa mikanda ni? Houe! Ca ku muenako, vitratadu vi hasa ku pua cikuata ca cili ca ku putuka ku simutuila naco. Tu hasa ku kava vinanga vi na hatako nga tu pangesa nkala tratadu:

1. Lingenu vihula via kala helu lia tratadu.

2. Lekesenu cikumbululo ca mu Mbimbiliya ca kala ha lifo lia mu civali. Nga ku ci li ntsimbu, tandenu na ku simutuila ha mizimbu ye ku soloka mu kati ka tratadu.

3. Hanenu tratadu ku muntu u mua uana kaha mu lekenu a tande mizimbu yose iliho, hose ha ka uanena ntsimbu.

4. Ntsimbu kanda mu ye, muesenu cihula ce ku soloka muintsi lia mezi “Aci Singaniekenu,” kaha likuminienu ku ka hiluka mua ku simutuile ha cikumbululo ca mu Mbimbiliya.

Mu mu ka hiluka, ka simutuilenu cihula ci mua sezele, kaha katulenu cihula cikuavo mua ku ci kumbulule ntsimbu yeka. Citava mu hangule cihula mu saiti yetu, ni mu mukanda ue ku soloka ku nima ya tratadu. Ha ntsimbu ya cili, hanenu mukanda Muzimbu ua Cili u Fuma Kuli Njambi! ni mukanda ukuavo ua mu Vikuata via ku Longesa Navio.