Omo lia Vika Njambi ke ku Kumbulula Vivundilo Viose?
Tatetu ua muilu Yehova Njambi, ua kala na cizango ca ku halakana vivundilo vietu via ku tundilila ku mutima. Vunoni kuli vimo vi hasa ku mu vindika ku kumbulula vivundilo vietu. Vika vi hasa ku mu lingisamo, kaha vika tua pande ku vuluka ntsimbu yose nga tu vundila? Tu talenu vi ya handeka Mbimbiliya.
“Mu ku vundila kati u hilukile-hilukilemo.”—Mateo 6:7.
Yehova ka tondo ngueni tu pue na ku patekeya vivundilo ni ku linga via ku tanda houe. Vunoni ua tonda tu vundile na mutima uose. Aci singaniekenu, vati mu ne ku livuile nga kavusamba kenu ue ku handeka mezi amo lika tangua na tangua? Mua vusunga, a hasa ku mi futula ku mutima! Muomu vavusamba va cili ve ku handeka vili ku mutima uavo kaha va pua vakua vusunga. Na vuno vene, nga tu vundila kuli Njambi mu ku pangesa mezi a ku fuminina ku mutima, tu ka muesa ngecize tua mu puisa kavusamba ketu.
“Mu vundila, kaha ka mue ku tambula, muomu mue ku vundila via ngoco.”—Tiango 4:3.
Ka tua pandele ku lavelela nguetu Njambi a kumbulula vivundilo vietu, nga tua vundila vimo vi tu tantekeya nguetu Njambi ua tu vindika ku vi linga ni cipue ku kala navio. Ca ku muenako, vuno Yehova a hasa ku kumbulula civundilo ca mukua lizangamena na mukua ku lomba soliti linga a kale na vimbongo via vingi ni? Tua tantekeya nguetu Yehova ua zinda vakua lizangamena na vilinga via likuata na mahamba. (Isaya 65:11; Luka 12:15) Ngeci mukemuo, ca pua vusiname ku lavelela nguetu Njambi a ka kumbulula vivundilo ngeci muevi! Linga Njambi a kumbulule vivundilo vietu, tua pande ku kala na vusunga nguetu vi tua vundila via litombola na Mbimbiliya.
“Uze a fumisa lituitui lieni mu ku ivua mezi a lisiko, na civundilo ceni vene cikeco cizila.”—Visimo 28:9.
Ku laza, Njambi ka kumbuluile vivundilo via vantu ka vononokele masiko eni. (Isaya 1:15, 16) Kaha Njambi ka alulukile. (Malakiya 3:6) Ngeci mukemuo, nga tu tonda nguetu Njambi a kumbulule vivundilo vietu, tua pande ku yoya muaya masiko eni. Vati co nga ku laza tua lingile via ku vihia? Vuno ca lomboloka ngecize na limo litangua liahi Yehova a ka tu halakana ni? Houe! Nga tu liveya vipi vietu kaha na ku lihakela kapandi ka ku muya ku mutima, Njambi a ka tu ecela.—Vilinga 3:19.