Vati mua Pande ku Vundila Linga Njambi a mi Halakane?
Yehova Njambi ua pua “mukua ku ivua vivundilo.” (Visamo 65:2) Tu hasa ku vundila kuli ikeye kuose oko kaha mu ntsimbu yose oyo, na lizi lia kama ni vene mu mutima. Yehova ua tonda tu mu sane nguetu “Tatetu,” kaha ua pua cisemi ua cili ku hiana vose. (Mateo 6:9) Na cilemo cose, Yehova ua tu longesa vati tua pande ku vundila linga a tu halakane.
VUNDILENU KULI YEHOVA NJAMBI MU LIZINA LIA YESU
“Nga mu ka vundila ku li Tata cuma cimosi, a ka mi hiaco mu lizina liange.”—Yoano 16:23.
Mezi a Yesu a muesa ha toma ngecize, Yehova ua tonda tu vundile kuli ikeye, kati mu ku pangesa tumponia, tungelo ni vantu va tsa laza, vunoni tua pande ku vundila mu lizina lia Yesu Kilistu. Nga tu vundila kuli Njambi mu lizina lia Yesu, tu ka muesa ngecize tua nongonona seho ya viuma via tu lingilile Yesu. Cikuavo naua, Yesu ngueni: “Na umo uahi eza kuli Tata, ku vanga hali ange.”—Yoano 14:6.
VUNDILENU NA MUTIMA UOSE
“Muanienu mutima uenu ku meso eni.”—Visamo 62:8.
Nga tu vundila kuli Yehova, tua pande ku lingamo ngue tuli na ku handeka na tatetu ua cilemo. Kaha mu cihela ca ku patekeya vivundilo ni ku linga via ku tanda, tua pande ku vundila kuli Njambi na kasingimiko kaha na mutima uose.
PUENU NA KU VUNDILA KULIYA NA CIZANGO CA NJAMBI
“Nga tu vundila vimosi via litombola na cizango ceni, ikeye a ku tu ivua.”—1 Yoano 5:14.
Mu Mbimbiliya, Yehova Njambi ua tu leka viuma via a ka tu lingila na viuma via tonda tu mu lingile. Kaha linga Njambi a tave vivundilo vietu, tua pande ku vundila viuma via “litombola na cizango ceni.” Ngeci mukemuo, tua pande ku lilongesa Mbimbiliya tu mu tantekeye vuino. Kaha nga tu lingamo, vivundilo vietu vi ka muya ku mutima.
VIKA TU HASA KU VUNDILA?
Vundilenu vi mu Tondeka. Tu hasa ku vundila vi tue ku tondeka tangua na tangua ngeci mua, via kulia, vuzalo na kua ku kala. Tu hasa naua ku vundila mangana linga tu hase ku linga vihangula via cili na ku kolesa mu visoti. Tu hasa ku vundila kuli Njambi a tu hane lutsilielo, a tu konekele kaha na ku tu kuasa.—Luka 11:3, 4, 13; Tiango 1:5, 17.
Kundikenu Vakuenu. Visemi ve ku ivua ndzolela ya kama nga va mona vana vavo va lilema umo na mukuavo. Yehova neni ua tonda vana veni hano ha mavu va lileme umo na mukuavo. Ngeci mukemuo, ca pua ca cili ku kundika mu civundilo mukua ndzivo yetu, vavusoko vetu, vana vetu na vavusamba. Ndongesi Tiango ua sonekele ngueni, “Livundililienu umo na mukuavo.”—Tiango 5:16.
Santselenu. Ku tuala hali Sakatanga uetu, Mbimbiliya nguayo: “Ua lingile ngozi, kaha ua mi hele mema a ku fuma muilu na miaka ya vimbuto, na sulisa mitima yenu na via-ku-lia na ndzolela.” (Vilinga 14:17) Nga tu singanieka ha viose via tu lingila Njambi, mua vusunga tu ka mu santsela mu civundilo. Cikuavo naua, tua pande ku muesa nguetu tue ku santsela Njambi ku cifua ci tue ku yoyelamo.—Kolose 3:15.
PUENU VAKUA LUKAKATELA KAHA TUALELENUHO KU VUNDILA
Vintsimbu vimo, tu hasa ku niengua nga ka tua tambuile vuasi cikumbululo ca civundilo cetu. Vuno tua pande ku singanieka honi nguetu Njambi ka tu hakele seho ni? Na limo litangua liahi! Talenu vi va lihitile navio vamo, via muesa ngecize tua pande ku tualelelaho ku vundila.
VaSteve va tu na tumbuile mu cilongesa ca katete, va handekele nguavo: “Nga ku vundila kuahi, muono uange nga ua pua ua vusiua lika ntsimbu yose.” Vika via va kuasele? Va putukile ku lilongesa Mbimbiliya ngeci va muene seho ya ku tualelelaho ku vundila. Va handekele naua nguavo: “Nje ku vundila kuli Njambi mu ku mu santsela ku vukuasi vuose vu nje ku tambula ku vavusamba vange, kaha lelo lino nja yoya mu ndzolela ya kama.”
Amba co vaJenny va handekele nguavo ka va fuilile ku vevua kuli Njambi? Nguavo: “Ha ntsimbu i nja li vuile cikuma vungoco, nja lambelelele Njambi a nji kuase ku ivuisisa omo lia vika nja livuilemo.” Vukuasi vuka va uanaho? Vavene nguavo: “Ku handeka na Njambi ca nji kuasele ku limona ngue mue ku nji muenamo ikeye, kaha ambe nga mutima u nji hisa, Njambi ke ku lingamo. Ca nji kuasele naua ku hona ku hilukila mu nima.” Vika viezilemo? Nguavo: “Ku vundila ca nji kuasele ku mona Yehova ku pua muntu mpundu, mukua cilemo, Njambi ua ngozi, Tata kaha na kavusamba a hasa ku nji kuasa mu ntsimbu yose oyo i nji mu tonda, ca kama lika ku nja lingi viuma via tonda.”
VaIsabel mu va muene muanavo Gerard evua ndzolela mu muono vutuhu ua pua cilema, va handekele nguavo: “Ua pua cikumbululo ca vivundilo viange”
Talenu naua vi va lihitile navio vaIsabel. Mu va kele na mivila ivali, ndotolo ua va lekele ngueni muanavo a ka pua cilema. Va vuile ku vavala ca kama ku mutima. Vamo va va lekele vene nguavo ca cili va tundise lizimo liaco. Vavene nguavo: “Nja vuile ngue nji tsa omo lia ku vavala ci nja kele na kuivua ku mutima.” Vika va lingile? Nguavo: “Nja vundilile ku sua kumo linga Njambi a nji kuase.” Kaha mu va sulumuine, muana ua semukile vene cilema. Vuno Njambi ua kumbuluile vivundilo via vaIsabel ni? Eyo ua kumbuluile! Mu njila ika? Vavene nguavo: “Mu nje ku mona muanange Gerard ua miaka 14 vutuhu ua pua cilema vunoni ue ku ivua ndzolela mu muono, nje ku mona nguange ua pua cikumbululo ca vivundilo viange, muomu ca pua civezikiso ca kama ca nji hana Yehova Njambi.”
Mezi avo a tu vuluisa mezi a handekele mukua visamo ngueni: “Yehova, u nevu cizango ca vakua ku konkama: U ka kolesa mitima yavo, u ka vangula lituitui liove.” (Visamo 10:17) Cili vene, tua kala na vusunga vua vuingi vua tu lingisa ku tualelelaho ku vundila!
Mu Mbimbiliya tu uanamo vivundilo via vingi via lingile Yesu. Kaha civundilo ca tsimana cikuma ca pua cize ca longesele vandongesi veni. Vika tu hasa ku lilongesa ku civundilo caco?