Visemi​—Kuasenu Vana Venu va Leme Yehova

1-2. Vati seho ya vinimbu via mu Mbimbiliya ye ku livuezelela nga vimo viuma vi na aluluka mu muono uetu.

LITANGUA lia vulo, sandungi na ntsombolua ueni ve ku va lingila cimo cimpande ca mu Mbimbiliya ku tuala ha vulo. Vitume via mu Mbimbiliya ku tuala ha cimpande caco via pua via vundambo. Vunoni tunde ha litangua liaco, evi vitume vie ku livuezelela seho kuli vakevo. Omo lia vika? Muomu va na pande honi ku pangesa vitume viaco mu vulo vuavo

² Kaha mukemuo vene mu ce ku fua nga Vakua Kilistu va na putuka ku kala na vana. Ntsimbu kanda va putuke ku sema, halumo ve ku halakana ku vimpande via vingi ku tuala ha ku sema vana. Vunoni mu ku linga vali honi na muana u va na pande ku lela, vi tume viaco vie ku livuezelela seho kuli vakevo. Ku lela muana, capua citeli ca kama! Cili vene ngue mu tu na mono, ku alulula ca viuma mu muono, ci hasa ku lingisa vitume via mu Mbimbiliya vi kale na seho ya kama kuli yetu. Ovu vukevuo vusunga vue ku lingisa vangamba va Yehova ku tanda Mbimbiliya ngue mu va lekele vamiangana va mu Isaleli ngecize va pandele ku hilula Visoneka via ku lela “matangua ose” a muono uavo.—Ndeu. 17:19.

3. Vika tu simutuila mu cilongesa cino?

³ Visemi, mua kala na viteli vimo via kama cikuma ha kati ka Vakua Kilistu. Citeli cika? Ku longesa vana venu via Yehova. Vunoni ka mua pandele ku lengela lika ha ku longesa vana venu mizimbu ku tuala hali Njambi. Mua pande ku va longesa cikumakuma ku mu lema na mutima uavo uose. Vunoni vati honi mu hasa ku longesa vana venu ku lema Yehova? Mu cilongesa cino tu simutuila ha vitume viuana via mu Mbimbiliya vi hasa ku mi kuasa enu visemi. (2 Tim. 3:16) Tu mona naua vukuasi vu va tambuile vamo visemi Vakua Kilistu mu va kavele vitume via mu Mbimbiliya.

VITUME VIUANA VI HASA KU KUASA VISEMI

4. Citume cika ci hasa ku kuasa visemi va longese vana vavo ku lema Yehova na mutima uose? (Tiango 1:5)

⁴ Citume 1: Tondenu ku tuamenena ca Yehova. Vundilenu Yehova a mi hane mana a mua tondeka mu ku longesa vana venu ku mu lema. (Tandenu Tiango 1:5.) Muomu ikeye mukua ku mamuna ua hiana vose. Kaha kua kala vusunga vua vuingi vua lingisa ngoco. Tu hilulenuho vuvali. Vua ku livanga, Yehova ikeye ua kala na vutongue ku hiana vose. (Visa. 36:9) Ca mu civali, vimamuna vie ku hana, vie ku kuasa ntsimbu yose.—Isaya 48:17.

5. (a) Vukuasi vuka vue ku hana lukungulukilo lua Yehova mu ku kuasa visemi? (b) Ngue mu ya muesa video, vika mua lilongesa ku cifua ci va pangesele vamuanetu va Amorim na mpueyeni mu ku longesa vana vavo?

⁵ Yehova ue ku hana ku visemi via kulia via vingi via mu lutsilielo, vize vi va hasa ku pangesa mu ku longesa vana vavo va mu leme, ku hitila mu Lizi lieni Mbimbiliya na mu lukungulukilo lueni. (Mat. 24:45) Ca ku muenako, mu hasa ku uana vukuasi vua kama ku mukana ua vimpande “Vukuasi ku Vusoko” vize via kele na ku tuhuka mu Vigilenu! ku miaka ya ku nima kaha vue ku tualelelaho ku tuhuka mu saiti yetu. Cikuavo naua, cingi ca vivideo vie ku tuhuka mu saiti jw.org, ye ku muesa mizimbu ya vamo vamuanetu na vimueso via vati vesemi ve ku pangesa vitume via Yehova mu ku lela vana vavo.b—Visi. 2:4-6.

6. Vati umo cisemi ua yala ue ku livua ku tuala ha ku tuamenena ce ku tambula ikeye na mpueyeni mu lukungulukilo lua Yehova?

⁶ Visemi va vengi ve ku santsela cikuma ku vukuasi vue ku va hana Yehova ku hitila mu lukungulukilo lueni. Muanetu Joe ua pua cisemi, ua litavelele ngueni: “Ku lelela vana vatatu mu vusunga, ka ca puile ca casi. Nange na mpueyange, ntsimbu yose tue ku vundila vukuasi vua Yehova. Kaha vintsimbu via vingi tua limuena ngecize vimpande na vivideo viaco vie ku iza vene ha vintsimbu vi tue ku tondeka mu ku longesa vana vetu. Ntsimbu yose tue ku kulahela mu vimamuna via Yehova.” Muanetu Joe na mpueyeni va mona ngecize vukuasi vuaco vue ku kuasa vana vavo ku likuata vusamba na Yehova.

7. Vika ca puila ca seho ku visemi ku tuala mana ku lungano luavo? (Loma 2:21)

⁷ Citume 2: Longesenu ku hitila mu lungano. Vana ve ku mona vuino vilinga via visemi. Kaha cingi cavio ve ku va tambuluisa. Ka kua kele cisemi ua ku tantuluka. (Loma 3:23) Vunoni visemi va cili ve ku lihakela kapandi kose ka ku pua lungano lua cili ku vana vavo. (Tandenu Loma 2:21.) Ku tuala ha vanike, umo cisemi ua yala ua handekele ngueni: “Veku temunuina viose ovio vi ve ku mona. Kaha nga tu linga viuma ka via litombuele na vize vi tue ku longesa, ve ku tu leka.” Ngeci mukemuo, nga tu tonda vana vetu va leme Yehova kaha cilemo cetu kuli ikeye naco ca pande ku kaniama na ku soloka.

8-9. Vika mua lilongesa ku mezi a muanetu Andrew na ndumbuetu Emma?

⁸ Kua kala vinjila via vingi vi va hasa ku pangesa visemi mu ku longesa vana vavo ku lema Yehova. Andrew umo muanetu ua miaka 17 ngueni: “Ntsimbu yose visemi vange va nji longesele ngecize capua ca seho ku vundila. ‘Nkala litangua ku vutsiki vatate va kele na ku vundila nange ambe nga nji na vundila laza lika liange. Visemi va kele na ku tu vuluisa ngecize citava tu handeke na Yehova vintsimbu viose ovio vi tu tonda.’ Ku tsindika ha seho ya vivundilo, ca kuatele mua kama ku muono uange. Ngeci lelo lino, ce ku nji puila ca casi ku vundila kuli Yehova na ku mu mona ku pua Tata ua cilemo.” Visemi, ntsimbu yose puenu na ku vuluka ngecize cilemo ceni kuli Yehova ce ku kuata cikuma ku vana venu.

⁹ Tu hilulenu naua, muzimbu ua ndumbuetu Emma. Va ise mu va tinine vusoko, va silile mpuevo makongo a kama. Ndumbuetu Emma ngueni: “Vintsimbu vimo, va nana va kele na ku linga na kambongo kahi, vunoni ntsimbu yose ua kele na ku sangala Yehova ku tuala ha cifua ce ku niungilamo vangamba veni. Ku tala ku cifua ci va kele na ku yoyelamo vanana, nja limuenene nguange va tsiliela viuma vi ve ku ambulula.” Vika tu lilongesaho? Visemi va hasa ku tualelelaho ku muesa lungano lua cili ambe mu vintsimbu via vikalu.—Ngal. 6:9.

10. Vukovelelo vuka va kele navuo, visemi va mu Isaleli vua ku simutuila na vana vavo? (Ndeutelonomi 6:6, 7)

¹⁰ Citume 3: Puenu na ku simutuila na vana venu ku sua kumo. Yehova ua lekele vaIsaleli ku laza, va pue na ku longesa vana vavo ku tuala hali ikeye ku sua kumo. (Tandenu Ndeutelonomi 6:6, 7.) Vintsimbu vimo, vaIsaleli va kele na vukovelelo vua vuingi mu ku hita ca litangua mu ku simutuila na vana vavo kaha na ku va longesa ku lema Yehova na mutima uose. Ca ku muenako, kanike ua yala mu Isaleli ua hasele ku kala na ntsimbu ya kama na ise mu ku kuna vimo vimbuto ni kutia. Kaha ua mpuevo co, ua hasele ku kuasa vanaye na vipanga via ha ndzivo, ngeci mua ku tonga, ku kusa na vikuavo. Kaha eyi ntsimbu i va kele na ku kala hamo lika, va hasele ku handeka ha vimpande via cili via seho. Ca ku muenako, va hasele ku simutuila ha vu cili vua Yehova na cifua ca kele na ku va kuaselamo mu ku pua vusoko.

11. Tumbulenu vumo vukovelelo vu va kala navuo visemi Vakua Kilistu vua ku handeka na vana vavo.

¹¹ Lelo lino yoyesi ya vantu i na aluluka cikuma. Ku vihela via vingi visemi na vana vavo, ka ve ku uana ntsimbu ya ku kala hamo mu ku hita ca litangua. Visemi, halumo ve ku kala ku vipanga kaha vana co ku sikola. Ngeci mukemuo, visemi va pande ku tonda ntsimbu ya ku simutuila na vana vavo. (Efe. 5:15, 16; Filp. 1:10) Vumo vukovelelo vua ku lingamo, vua pua ha ntsimbu ya ku lemesa mu vusoko. Alexander umo muanetu ua mukuendze ua handekele ngueni: “Vatate, ve ku linga cose linga tu lemese mu vusoko, kaha ka ve ku tavesa na vimo viahi vi tanganese ntsimbu yaco. Mu nima ya cilongesa tue ku simutuila via vingi.”

12. Vika na pande ku vuluka mutue ua ndzivo ha ntsimbu ya ku lemesa mu vusoko?

¹² Nga mua pua mutue ua ndzivo, vika mu hasa ku linga mangana ku lemesa mu vusoko ciye ku mitima ya vana venu? Ca ku muenako, citava mu lilongese na vana venu livulu lietu lia liha Yoyenu mu Ndzolela ku Miaka Yose! Livulu liaco, lie ku kuasa ku simutuila. Mu ku linga mua tonda vana venu va mi leke visinganieka viavo na viuma vie ku vomisa mutima, kati mu pue na ku pangesa ntsimbu ya ku lemesa mu vusoko mu ku va tenukila ni ku va handekela. Kati mu niengue nga vintsimbu vimo vana venu va handeka viuma ka via litombuele na Mbimbiliya. Vunoni, puenu na ku va sangala omo lia ku handeka mpundu cifua ci ve ku livuilamo mu vusunga kaha va kaniamesenu va tualeleleho ku lingamo. Mu hasa lika ku kuasa vuino vana venu nga mu tantekeya vati mpundu ve ku livua ku mutima.

13. Vukovelelo vuka vukuavo va kala navuo visemi mu ku kuasa vana vavo va likuate vusamba na Yehova?

¹³ Visemi, puenu na ku tonda vukovelelo mu ku hita ca litangua vua ku kuasa vana venu va likuate vusamba na Yehova. Kati mu pue lika na ku lavelela noho ntsimbu ya ku lilongesa navo Mbimbiliya ina hete, amba mu va longese via Njambi houe. Halakanenu via handekelele umo cisemi ua mpuevo ua lizina Lisa ngueni: “Tue ku kuasa vana vetu va mone ku likata ca kala ha viuma via ku tanga na Yehova. Ca ku muenako, kueha ca katali uetu ca kele na ku zolesa vanike kaha tua kele na ku pangesa vukovelelo vuaco mu ku muesa ngecize Sakatanga uetu ua pua mukua ndzolela kaha ua lema muono ngeci muetu.”

14. Vika ca puila ca seho visemi ku longesa vana vavo ku hangula vuino vavusamba vavo? (Visimo 13:20)

¹⁴ Citume 4: Kuasenu vana venu, va hangule vavusamba va cili. Lizi lia Njambi lia muesa ha toma ngecize vavusamba vetu va kala na ndzili ya kama hali yetu—va hasa ku tu talekesa ku via cili ni ku via ku vihia. (Tandenu Visimo 13:20.) Visemi, vuno mu tantekeya vavusamba va vana venu ni? Vuno mua va monaho laza na ku simutuila navo cipue kamandende ni? Vika mu hasa ku linga mangana mu kuase vana venu ku hangula vavusamba vaze va lema Yehova? (1 Kol. 15:33) Mu hasa ku va kuasa ku linga vihangula via mana, mu ku lania vamuanetu vaze vali vuino mu lutsilielo mua ku lingile hamo vimo viuma via mu vusoko.—Visa. 119:63.

15. Vika va hasa ku linga visemi linga va kuase vana vavo ku kala na vavusamba va cili.

¹⁵ Halakanenu muzimbu ua umo cisemi ua yala lizina lieni Tony. Ua lombolola vie ku linga hamo lika na mpueyeni linga va kuase vana vavo ku likuata vusamba na vantu va cili. Ngueni: “Mu ku hita ca miaka, nange na mpueyange tue ku lania vamuanetu va vitso na vifua via ku liseza-seza ku ndzivo yetu. Tue ku lila hamo na ku lemesa hamo mu vusoko. Eyi ya pua njila ya cili cikuma ya ku tantekeyelamo vaze va lema Yehova kaha ve ku mu pangela na ndzolela. Vintsimbu vimo tue ku kala na civezikiso ca ku tambula tuniungi va ku zinguluka, vamisionaliu na vakuavo ku ndzivo yetu. Mizimbu, ntuima na ku lihana cavo, vie ku kuata mua kama ku mitima ya vana vetu na ku va kuasa va likuate vusamba vua kama na Yehova.” Visemi, lihakelenu kapandi ka ku kuasa vana venu va likate vusamba na vantu va cili.

KATI MU LIKELE CIPUE KU LI ECELELA!

16. Vati co nga muana a handeka ngueni ka tondo ku pangela Yehova?

¹⁶ Vati co nga vutuhu mue ku lihakela kapandi ka kama, umo ua vana venu a mi leka ngueni ka tondo naua ku pangela Yehova? Kati mu tuntile ku singanieka ngecize ka mua puisilemo vuino citeli cenu ca ku pua cisemi. Muomu Yehova ua tu hana tu vose hamo lika na muanenu vuana vua ku lihanguila viuma, ni nguetu muntu ku muntu ua kala na mpoko ya ku lihanguila nga a pangela Yehova ni kuahi. Nga mu nenu na hangula ku seza Yehova, tualelelenuho ku kala na lulavelelo ngecize tangua a ka hiluka. Vulukenu cisimo ca uze muana ua zimbalele. (Luka 15:11-19, 22-24) Uze mukuendze ua lingile viuma via vingi via ku vihia, vunoni ku ntsongo ua hilukile. Vunoni vamo va hasa ku handeka nguavo, “cize capua lika cisimo,” vuno vi hasa ku soloka cipue lelo lino? Eyo vi hasa! Evi vikevio via solokelele mukuendze ua lizina Elie.

17. Vati muzimbu ua Elie u na mi kaniamesa?

¹⁷ Ku tuala ha visemi veni, Elie ngueni: “Valihakelele kapandi kose ka ku nji longesa ku lema Yehova na Lizi lieni Mbimbiliya. Vunoni mu nja hetele ha vunkavala, nja putukile ku muesa lisino.” Elie ua putukile ku yoya muono ua vuongono kaha na ku viana kapandi kose ka va kele na ku lihakela visemi mu ku mu kuasa mu lutsilielo. Mua tundile ha ndzivo, ua putukile ku linga vupi. Vutuhu ngoco, vintsimbu vimo ua kele na ku simutuila via Mbimbiliya na umo ua vavusamba veni. Elie ngueni: “Ku tualelelaho ku simutuila-simutuila na uze mukuetu via Yehova ca nji lingisile naua ku tualelelaho ku singanieka hali Yehova. Kamandende-kamandende mbuto ya vusunga ize i va lihakelele kapandi ka kama visemi vange ku kuna mu mutima uange, vutuhu ya zuzuamene, ya putukile ku kola.” Mu nima ya ntsimbu Elie ua hilukile mu vusunga.c Aci singaniekenu ha ndzolela i va vuile visemi veni omo lia ku lihakela kapandi ka ku mu longesa ku lema Yehova vutuhu tele a cili ua mundende!—2 Tim. 3:14, 15.

18. Vati mue ku livua ku mutima ku tuala ha visemi ve ku lihakela kapandi ka ku longesa vana vavo ku lema Yehova?

¹⁸ Visemi, mua tambula civezikiso ca ku lifuila, ca ku longesa vaze va ka pangela Yehova mene. (Visa. 78:4-6) Mua vusunga, eci capua citeli ca kama. Kaha tu mi sangala cikumakuma ku kapandi ka mue ku lihakela ka ku tualelelaho ku kuasa vana venu! Nga mu tualelelaho ku lihakela kapandi ka ku kuasa vana venu va leme Yehova na ku va lela, ku va mamuna muli Yehova, kaha kalenu na vusunga ngecize Isuenu ua muilu a kevua ndzolela ya kama.—Efe. 6:4.