Kaniamesenu Lulavelelo Luenu

1. Lulavelelo luka ua tu hana Yehova?

YEHOVA ua tu hana lulavelelo lua ku komouesa lua ku ka yoya miaka yose. Vamo va lavelela ku ka yoya miaka yose muilu mu ku pua tungelo. (1 Kol. 15:50, 53) Vunoni cingi ca vantu, va lavelela ku ka yoyela hano ha mavu ku miaka yose mu ndzolela na cihindu ca ku tantuluka. (Ku-So. 21:3, 4) Ngeci mukemuo, ambe nga tua lavelela ku ka yoyela muilu ni hano ha mavu, lulavelelo luetu lua pua lua seho cikuma.

2. Lulavelelo luetu luemana ha vika, kaha vika tu handekela ngoco?

² Mu Mbimbiliya lizi “lulavelelo,” va li pangesa mu ku lombolola ngecize “viuma via cili vi tua lavelela vi ka lipuisamo mpundu.” Kaha tuli na vusunga vuose nguetu, vi tua lavelela vi ka lipuisamo muomu Yehova ikeye na vi tumbula. (Loma 15:13) Tu tantekeya vika ua tu kulahesa kaha tu tantekeya naua nguetu ue ku puisamo lizi lieni. (Num. 23:19) Tuli na vusunga vuaco, muomu Yehova ua kala na cizango kaha na ngolo ya ku vi puisamo. Ngeci mukemuo, lulavelelo luetu ka luemanene ha vilota via ngoco; vunoni luemana ha viuma vi tu tantekeya mpundu ku pua vusunga.

3. Vika tu simutuila mu cilongesa cino? (Visamo 27:14)

³ Tatetu ua muilu ua tu lema cikuma, kaha ua tonda tu mu kulahele. (Tandenu Visamo 27:14.) Nga lulavelelo luetu muli Yehova lua ku kaniama, tu ka hasa ku vula visoti viose-ovio vi ka tu solokela na ku simpa cose kaha na ndzolela. Mu cilongesa cino, tu mona vati lulavelelo luetu lue ku tu niunga. Vunoni ntsimbu kanda, tu mona vati lulavelelo luetu lua pua ngue cikuateso ca vuato na cikoko. Mu nima yaco, tu lilongesa vati tu hasa ku kaniamesa lulavelelo luetu.

LULAVELELO LUETU LUA PUA NGUE CIKUATESO CA VUATO

4. Vati lulavelelo lua pua ngue cikuateso ca vuato? (VaHevelu 6:19)

⁴ Mu mukanda ua tumine kuli Vakua Kilistu va VaHevelu, kapostolo Paulu ua setekesele lulavelelo luetu na ngundzi ni nguetu, cikuateso ca vuato. (Tandenu VaHevelu 6:19.) Cingi ca mangendzi endele kapostolo Paulu, a puile a mu kalunga ndonga ngeci ua tantekeyele ngecize, vikuateso via vuato va kele na ku vi pangesa mu ku niunga vimbapolo linga kati vi hungumuke. Tangua limo, ua londele mu imo mbapolo kaha kuezile mahundzi a kama na niondzi. Ngeci ua muene vakua ku sunga mbapolo yaco, va asanga vikuateso via vuato mu ndonga linga mbapolo kati i hungumuke na ku ka liveta ku mavue. (Vili. 27:29, 39-41) Cikuateso ca vuato ce ku lingisa mbapolo kati i hungumuke. Na vuno vene, lulavelelo luetu lue ku tu lingisa kati tu hungumuke mu ku seza Yehova omo tu hita mu mahundzi a visoti. Lulavelelo lue ku tu kuasa ku simpa mutima, muomu tua tantekeya ngecize vuovuno visoti vi ka hua. Vulukenu ngecize, Yesu ua tu lunguile ngueni va ka tu luisa. (Yoa. 15:20) Ngeci mukemuo, ku singanieka ha viuma vi tua lavelela ku lutue ci hasa ku tu kuasa ku simpa na ku tualelelaho ku pangela Yehova.

5. Vati lulavelelo lua kuasele Yesu mua kele ku hiehi na kutsa?

⁵ Tu ci hilulenu vati lulavelelo lua kuasele Yesu ku kolesa, omo ku tsa ca vukenia ca mu lavelelele. Ha litangua lia Pentekosta ya 33 T.K.N, kapostolo Petulu ua tumbuile vumo vupolofeto vua ku livulu lia Visamo vua muesele ku simpa ca kele naco Yesu. Nguavuo: “Ntsitu yange i ka kala na ku lavelela: muomu ka u ka seza muono uange ku Vukalo vua Vatsi, cipue ka u ka tava uove mukua ku lela ku pola . . .  u ka nji sulisa na ndzolela ku meso ove.” (Vili. 2:25-28; Visa. 16:8-11) Vutuhu Yesu ua tantekeyele ngueni va mu tsiha, vunoni ua kele na lulavelelo lua ku kaniama ngecize Njambi a ka mu sangula kaha a ka kala na ndzolela ya ku liuana lueka naua na Ise muilu.—VaHe. 12:2, 3.

6. Vika ua handekele umo muanetu ku tuala ha lulavelelo?

⁶ Lulavelelo, lua kuasa vamuanetu na vandumbuetu vavengi ku kolesa. Ca ku muenako, tu hilulenu lungano lua umo muanetu ua lukakatela ua kala ku Inglaterra, lizina lieni Leonard Chinn. Mu Ndzita ya Katete ya Mavu Ose, va mu tualele mu kamenga muomu ua vianene kuya ku vusualale. Kaha va mu hakele mu kaliavuoso mu vingonde vivali, mu nima yaco va mu tualele ku vipanga via kayando. Mu nima ya ntsimbu, muanetu uaco ua sonekele ngueni: “Visoti vi nja hitile, via nji longesele seho i lua kala naluo lulavelelo mu ku tu kuasa ku kolesa. Tua kala na lungano lua Yesu, vapostolo na vapolofeto kaha naua tua kala na vikulaheso via cili via mu Mbimbiliya. Viose evi, vie ku tu hana lulavelelo lua kama na ku tu kuasa ku kolesa.” Mua vusunga, nga lulavelelo lua puile ngundzi kuli muanetu Leonard, kaha lu hasa ku pua naua ngundzi kuli yetu.

7. Vati vieseko vie ku kaniamesa lulavelelo luetu? (Loma 5:3-5; Tiango 1:12)

⁷ Lulavelelo luetu lue ku kaniama mu nima ya ku kolesa mu vieseko, ku limuena vukuasi vua Yehova na ku tantekeya ngecize tuli na ku mu ya ku mutima. (Tandenu Loma 5:3-5; Tiango 1:12.) Ngeci mukemuo, mu nima ya ku hita mu vieseko tue ku kala na lulavelelo lua ku kaniama ku hiana luze lu tua kele naluo mu tua lilongesele vusunga. Satana ua tonda vieseko vi tu zeyese, vunoni na vukuasi vua Yehova vieseko viaco vie ku tu kaniamesa kaha tue ku hasa ku vi vula.

LULAVELELO LUETU LUA PUA NGUE CIKOKO

8. Mu njila ika lulavelelo lua lifua na cikoko? (1 Tesalonika 5:8)

⁸ Mbimbiliya ya setekesa naua lulavelelo luetu ku cikoko. (Tandenu 1 Tesalonika 5:8.) Lisualale ue ku zala cikoko ku mutue, linga a hase ku liniunga ku vitua via hasa ku mu veta citozi. Mu ndzita yetu ya mu lutsilielo, netu tua pande ku niunga visinganieka vietu ku vieseko na visinganieka via ku vihia vie ku tu nakuila Satana. Ngeci mua cikoko ce ku niunga mutue ua lisualale, lulavelelo lue ku niunga visinganieka vietu linga tu tualeleho ku kakatela kuli Yehova.

9. Vika ve ku linga vantu nga ka vesi na lulavelelo?

⁹ Lulavelelo luetu lua muono ka ue ku hua, lue ku tu kuasa ku muesa mana na liano. Vunoni nga lulavelelo luetu lu zeya, tu hasa ku tavesa visinganieka via ngoco vi tu pikule na ku tu lingisa ku zimbalesa vutumbe vuetu vua ku ka tambula muono ka ue ku hua. Halakanenu via solokelele vamo Vakua Kilistu va kele ku Kolintu. Va likelele ku tsiliela mu cimo cikulaheso ca kama ca Njambi, lulavelelo lua cisangukilo. (1 Kol. 15:12) Ngeci Paulu ua va lekele ngueni, vantu ka va kele na lulavelelo, ve ku putuka ku puisamo vizango viavo viose mu ntsimbu oyo vene. (1 Kol. 15:32) Lelo lino, cingi ca vaze ka va kele na lulavelelo mu vikulaheso via Njambi, ve ku yoya ngue litangua lia mene ka lia keleko. Ngeci ve ku tonda ku puisamo vizango viose vi va solokela mu ntsimbu oyo vene. Vunoni etu, tua kulahela mu muono ua cili ua tu kulahesa Njambi ku lutue. Kaha lulavelelo luaco, lua pua ngue cikoko ca cimueso, lue ku niunga visinganieka vietu na ku tu kuasa linga kati tu likovelese mu muono ua ku kava lika masungu, uze u hasa ku vihisa vusamba vuetu na Yehova.—1 Kol. 15:33, 34.

10. Vati lulavelelo lu hasa ku tu niunga ku visinganieka via ku vihia?

¹⁰ Cikoko cetu ca lulavelelo, ci hasa naua ku tu niunga ku ku singanieka nguetu ku seteka kuya Njambi ku mutima capua ku lisina ngoco. Ca ku muenako, vamo va hasa ku singanieka nguavo: ‘Ange na limo litangua liahi nji ka kala ha kati ka vaze va ka yoya ku miaka yose. Muomu vuntu vuange ka vua puilemo, kaha na limo litangua liahi nji ka hasa ku yoya muaya vitume via Njambi.’ Vunoni vulukenu ngecize, Elifaze uze ua likuisile ku lembezieka Yombi, ua setekele ku mu kuva visinganieka viaco. Ngueni: “Muntu ikeye iyandzo amba a vuke?” Mu nima yaco, ua handekele naua ku tuala hali Njambi ngueni: “Tala, ikeye ke ku tsiliela veni va ku lela; cili melu ka a vukile ku meso eni.” (Yombi 15:14, 15) Evi via puile visaki via kama! Ka tuesi na vimpata na vimo viahi nguetu, Satana ikeye ua kele na ku sambeya visinganieka viaco. Satana a tantekeya ngueni, nga tu tavesa evi visinganieka vi tu kovele, lulavelelo luetu lu ka zimangana. Ngeci mukemuo, vianenu makuli aco kaha tualenu mana ku vikulaheso via Yehova. Yehova a tonda nenu mu ka yoye ku miaka yose. Kati mu takanie cipue kavundende kaha ua likuminia ku mi kuasa mu puisemo cizango caco.—1 Tim. 2:3, 4.

TUALELENUHO KU KANIAMESA LULAVELELO LUENU

11. Omo lia vika tua pande ku kala na lukakatela ntsimbu tu vandamena ku lipuisamo ca lulavelelo luetu?

¹¹ Ku niunga lulavelelo luetu linga lu tualeleho ku kaniama, ka ce ku pua ca casi vintsimbu vimo. Ku lavelela ntsimbu ya Njambi, ci hasa ku tu futula. Vunoni kati mu suve ngecize, Yehova ua kalako ku miaka yose kaha cifua ce ku muenamo ntsimbu, ca liseza na muze mu tue ku i muenamo yetu. (2 Pet. 3:8, 9) Yehova ue ku puisamo vutumbe vueni mu cifua ca cili cikuma. Vunoni vintsimbu vimo, ke ku lingamo ha ntsimbu i tua lavelela yetu. Vika honi vi hasa ku tu kuasa ku kaniamesa lulavelelo luetu, omo tu vandamena Njambi a puisemo vikulaheso vieni?—Tia. 5:7, 8.

12. Kuliya na VaHevelu 11:1, 6, vati lulavelelo lua likuata na lutsilielo?

¹² Nga tu tualelelaho ku kakatela kuli Yehova, lulavelelo luetu lu ka tualelelaho ku kaniama muomu ikeye a ka puisamo lulavelelo luaco. Kaha Mbimbiliya ya tokakana lulavelelo ku lutsilielo. Muomu linga tu kale na lulavelelo, tua pande ku tsiliela ngecize Yehova kua kala kaha “ikeye mukua ku lunguisa vaze ve ku mu lengeya.” (Tandenu VaHevelu 11:1, 6.) Muomu nga tu tsiliela mpundu nguetu Yehova kua kala, kaha tu ka lavelela na mutima uose nguetu a ka puisamo viose via kulahesa. Tu hilulenu vimo vinjila vi tu hasa ku koleselamo vusamba vuetu na Yehova, linga lulavelelo luetu lu kaniame.

13. Vati tu hasa ku suena mu hiehi na Njambi?

¹³ Puenu na ku vundila kuli Yehova na ku tanda Lizi lieni. Vutuhu ka tu hasa ku mona Yehova, vunoni tu hasa ku suena mu hiehi neni. Tu hasa naua ku handeka neni ku hitila mu civundilo, na ku kulahela ngecize a ka tu halakana. (Yele. 29:11, 12) Kaha etu co tu hasa ku halakana Njambi, mu ku tanda Lizi lieni na ku li hilula. Omo tu tanda ha vati Yehova ku nima ua niungile vaze va muesele lukakatela kuli ikeye, lulavelelo luetu lu ka tualelelaho ku kaniama. Muomu viose vi va soneka mu Lizi lia Njambi, “va vi sonekelele ku tu longesa, linga ku lukakatela na ku ku-lembezieka, via ku visoneka tu kale na ku lavelela.”—Loma 15:4.

14. Omo lia vika tua pande ku singanieka ha viuma via lingila Yehova vakuetu?

¹⁴ Puenu na ku hilula ha cifua ce ku puisilamo Yehova vikulaheso vieni. Tu ci hilulenu ha muzimbu ua Avilahama na Sala. Vose vavali va tuvakanene laza ha miaka ya lusemo. Vunoni Njambi ua va kulahesele ngueni, tangua a ka va vezikisa na muana. (Njen. 18:10) Vati ua lingile Avilahama? Mbimbiliya nguayo: “Ua tsilielele ngecize a kua ku kala ise ya miyati ya yingi.” (Loma 4:18) Vutuhu ku meso a vantu ca solokele ngue, ka kua kele mueka naua muahi mua ku puisilamo cikulaheso caco. Vunoni Avilahama ua tualeleho ku kukulahela ngecize, Yehova a ka ci puisamo. Kaha uze yala ua lutsilielo, ka lisinine ngoco ku lavelela. (Loma 4:19-21) Mizimbu ngeci mueyi, ye ku tu longesa ngecize tua pande ku kulahela muli Yehova ntsimbu yose ambe nga viuma vi soloka ngue ka citava naua vi lipuisemo.

15. Omo lia vika tua pande ku hilula ha viuma via tu lingila Njambi?

¹⁵ Hilulenu ha viuma via mi lingila Yehova. Puenu na ku singanieka ha vukuasi vu mua uana laza, omo lia ku lipuisamo ca vikulaheso via mu Mbimbiliya. Ca ku muenako, Yesu ua kulahesa ngecize Ise a ka tu hana vize via tu kambela mu muono. (Mat. 6:32, 33) Yesu ua tu kulahesa naua ngecize, Yehova a ka tu hana sipilitu santu mu tu ka mu vundilayo. (Luka 11:13) Kaha Yehova ua puisamo evi vikulaheso viaco. Citava halumo mu na vuluka naua vikulaheso vikuavo via puisamo Yehova ku tuala hali yenu. Ca ku muenako, ua kulahesa ku mi ecela ku vipi vienu, ku mi lembezieka na ku mi hana via kulia via mu lutsilielo. (Mat. 6:14; 24:45; 2 Kol. 1:3) Ngeci mukemuo, nga mu pua na ku hilula ha viuma via mi lingilaho Njambi, lulavelelo luenu ku tuala ha viuma via mi kulahesa lu ka kaniama.

VIUKILILENU MU LULAVELELO

16. Omo lia vika lulavelelo lua pua vuana vua seho?

¹⁶ Lulavelelo luetu lua muono ka ue kuhua, lua pua vuana vua seho vua tu hana Njambi. Tua lavelela na ndzolela ya kama muono ua cili ku lutue, uze u tuli na vusunga nguetu u ka lipuisamo mpundu. Lulavelelo luaco lua pua ngue cikuateso ca vuato, cize ce ku tu kuasa linga kati tu hungumuke na vieseko, ku luisa ni vene nga tua lavelela ku tsa. Kaha lua pua naua ngue cikoko, muomu lue ku niunga visinganieka vietu ku viuma via ku vihia na ku tu kuasa ku kakatela ku via cili. Lulavelelo luetu lua mu Visoneka, lue ku tu lingisa ku likuata vusamba na Njambi na ku muesa vukama vua cilemo cetu kuli ikeye. Mua vusunga, ku niunga lulavelelo luetu ce ku kaniamesa na ku tu kuasa mua kama.

17. Omo lia vika lulavelelo lue ku tu vuisa ndzolela?

¹⁷ Mu mukanda ua tumine kuli vakua Loma, kapostolo Paulu ua va kaniamesele ngueni: “Viukililenu mu ku lavelela.” (Loma 12:12) Paulu ua vuile ndzolela muomu ua kele na vusunga ngecize, nga a tualelelaho ku kolesa a ka tambula muono ka ue kuhua, muilu. Netu tue ku viukilila mu lulavelelo luetu, muomu tuli na vusunga nguetu Yehova a ka puisamo vikulaheso vieni. Ngue mua handekele mukua visamo ngueni: “Ua vezika uze . . . ku-lavelelela ceni ci li muli Yehova Njambi yeni: uze . . . a niunga vusunga ku miaka yose ya ya-ye”—Visa. 146:5, 6.